19°C , Partly cloudy | Kigali-Rwanda
Umukino wa Rugby umaze gutera imbere mu Rwanda

Rugby: RRF iremeza ko uyu mukino umaze kugera ku rundi rwego

Yanditswe na Nshim Janvier

Ku ya 11-10-2018 saa 11:01:51

Araire Alexender, Perezida w’ishyirahamwe ry’umukino wa Rugby mu Rwanda, “RRF” yemeza ko uyu mukino mu Rwanda umaze kugira byinshi wahindutseho bigaragaza ko umaze gutera imbere.

Ibi yabitangaje ubwo hasozwaga shampiyona y’igihugu “Mindsky National Rugby Ligue 15 Aside” y’uyu mwaka wa 2018 yasojwe tariki 06 Ukwakira 2018. Kigali Sharks Rugby Football Club yaje gutwara igikombe itsinze ku mukino wa nyuma, ikipe ya Resilience RFC ibitego 27 kuri 14.

Uyu muyobozi avuga ko iyi shampiyona yaberetse ko uyu mukino umaze gutera imbere. Ati “Navuga ko shampiyona y’uyu mwaka idusigiye ishusho y’uko hari iterambere. Twabonye umuyobozi wa Tekinike, Claude Aime Ezoua, asura amakipe urebye umukino hari ikintu cyagiye kiyongeramo”.

Yavuze ko bamaze gukora amahugurwa 3 y’abatoza mu gihugu cyose ndetse banateganya no gukora andi kuko hari byinshi ahindura ku mikinire y’abakinnyi.

Araire Alexender anagaragaza ko kuba Resilience RFC yo mu Karere ka Rusizi, yarabashije kugera ku mukino wa nyuma ari ikimenyetso cy’uko hari iterambere muri uyu mukino.

Yagize ati “Kuba ikipe ya Resilience iturutse i Rusizi, imaze imyaka itatu ikina, iza igatsinda ikipe z’i Kigali zimaze imyaka 10 zikina, ni ubwa mbere igeze ku mukino wa nyuma na byo biri mu bigaragaza ko hari iterambere.”

Umukino wa Rugby umaze gutera imbere mu Rwanda

Araire Alexender atangaza ko bateganya kwakira andi makipe abiri mashya, bityo akaba yazava ku makipe 8 yakinnye shampiyona y’uyu mwaka, akaba yagera ku makipe 10. Ayo makipe abiri mashya ni IPRC-Kigali ndetse na Rulindo.

TANGA IGITEKEREZO

Leave a Reply

Your email address will not be published. Required fields are marked *