Rugby: Lions de Fer izahura na Thousand Hills ku mukino wa nyuma

Yanditswe na NKOMEJE GUILLAUME

Ku ya 12-08-2019 saa 17:26:06
Ikipe ya Lions de Fer izahura na Thousand Hills RFC ku mukino wa nyuma wa Playoffs 2019

Lions de Fer 21-17 Resilience

Thousand Hills 27-06 Muhanga Thunders

Lions de Fer RFC na Thousand Hills RFC ni zo kipe zatsindiye kuzahura ku mukino wa nyuma w’irushanwa rihuza amakipe yabaye ane ya mbere muri shampiyona ya Rugby “National Rugby League Playoffs 2019” y’uyu mwaka wa 2019.

Aya makipe yombi yakatishije itike yo kugera ku mukino wa nyuma wa « Playoffs 2019 » yitwaye neza asezerera abo bari bahanganye mu mikino ya ½ k’irangiza yabereye ku kibuga cyo kuri Croix Rouge ku Kacyiru, tariki 10 Kanama 2019.

Ikipe ya Lions de Fer RFC ikaba yarageze ku mukino wa nyuma w’iri rushanwa rya «Playoffs 2019»  nyuma yo gusezerera ikipe ya Resilience RFC yari yageze ku mukino wa nyuma mu 2018 iyitsinze ibitego 21 kuri 17.

Uyu mukino ukaba wari wahuje iyi kipe Lions de Fer RFC yari yabaye iya kabiri mu gice cya Kigali kitwa “Central League” ndetse na Resilience RFC yari yabaye iya mbere mu gice cy’Amajyepfo “Southern League”.

Ku rundi ruhande, ikipe ya Thousand Hills RFC nayo yageze ku mukino wa nyuma wa «Playoffs 2019 » isezereye ikipe ya Muhanga Thunders RFC muri ½ k’irangiza iyitsinze ibitego 27 kuri 06.

Uyu mukino kandi ukaba wari wahuje ikipe ya Thousand Hills RFC yabaye iya mbere mu gice cya Kigali “Central League” naho ikipe ya Muhanga Thunders RFC yari yabaye iya kabiri mu gice cy’Amajyepfo “Southern League”.

Nk’uko bitangazwa n’ishyirahamwe ry’umukino wa Rugby mu Rwanda “RRF”, riyoborwa na Kamanda Tharcisse ni uko umukino wa nyuma wa “Playoffs 2019” ari nawo uzatanga igikombe cya shampiyona ya Rugby “Rugby National League 2019” y’uyu mwaka wa 2019 uzaba tariki 31 Kanama 2019.

Kigali Sharks RFC itarabashije kugera muri ½ cya “Playoffs 2019” ni yo yari yatwaye igikombe cya shampiyona y’umwaka ushize wa 2018, itsinze Resilience RFC ku mukino wa nyuma ibitego 27 kuri 14.

Ikipe ya Lions de Fer izahura na Thousand Hills RFC ku mukino wa nyuma wa Playoffs 2019

Umwanditsi:

NKOMEJE GUILLAUME

Tanga Igitekerezo

Email yanyu ntigaragazwa ku rubuga. Amazina na Email ni ngombwa.