Rugby: Ikipe y’u Rwanda  igiye kwerekeza muri Cote d’Ivoire ifite intego yo gutsinda

Yanditswe na BUGINGO FIDELE

Ku ya 19-11-2019 saa 18:36:33
Ikipe y'u Rwanda mu mukino wa Rugby “Silverbacks” igiye kwerekeza muri Cote d'Ivoire

Tariki 23-11-2019

Cote d’Ivoire-Rwanda (Abidjan)

Ikipe y’u Rwanda mu mukino wa Rugby “Silverbacks” izahura n’ikipe y’igihugu  ya Cote d’Ivoire mu mukino wo gushaka itike y’igikombe cy’Afurika “Rugby Africa cup” uzabera  Abidjan muri Cote d’Ivoire tariki 23 Ugushyingo 2019.

Kuri uyu wa Gatatu tariki 20 Ugushyingo 2019 ni bwo ikipe y’u Rwanda izahaguruka i Kigali yerekeza   Abidjan muri Cote d’Ivoire ahazabera uyu mukino.  Iyi kipe izahaguruka  saa moya n’iminota 40  z’umugoroba (19h40)  irare i Nairobi muri Kenya hanyuma bazagere muri Cote d’Ivoire ku wa Kane tariki 21 Ugushyingo 2019 saa sita (12h00).

Uyu mukino  ni uwo gushaka igihugu cya 3 kizava hagati y’u Rwanda na Cote d’Ivoire kigomba kwiyongera ku bihugu bibiri biri mu itsinda B ari byo Maroc na Kenya.

Ikipe y’u Rwanda yari yatangiye imyiteguro tariki 25 Nzeri 2019 aho  umutoza mukuru w’ikipe y’igihugu, Claude Ezoua yari yahamagaye  abakinnyi 49  mu myitozo kugira ngo hatoranywamo 22 bagomba gukina  uyu mukino wa Cote d’Ivoire.

Nyuma y’imyitozo ya nyuma yabereye kuri Sitade Amahoro i Remera, umutoza Claude Ezoua yatangaje ko  ikipe imeze neza kandi yiteguye kwitwara neza.

Yakomeje avuga ko  Cote d’Ivoire ifite abakinnyi bakomeye kandi bafite ubunararibonye ariko yizeye abakinnyi be kuko bazagerageza gushyira ingufu mu bwugarizi. Ati : “ Byose mu mukino birashoboka.”

Kapiteni w’ikipe y’u Rwanda,  Kanyamahanga Donath yatangaje ko imyiteguro yagenze neza ko bari bamaze hafi amezi abiri  bitegura. Yakomeje avuga  ko nk’abakinnyi bajyanye intego yo kuzamura imbendera ry’igihugu.

Perezida w’ishyirahamwe ry’umukino wa Rugby mu Rwanda “RRF”, Kamanda Tharcisse yatangarije Imvaho Nshya ko biteguye  igihe guhagije kandi bizeye ko bazitwara neza.

Yakomeje avuga ko uyu mukino, ikipe y’u Rwanda iwutsinze  yakwinjira mu itsinda rikomeye ririmo Kenya na Maroc aho amakipe yatangira gukina  imikino yo mu matsinda umukino ubanza n’uwo kwishyura hanyuma iyitwaye neza ikabona  itike y’imikino y’igikombe k’Isi kizabera mu Bufaransa muri 2023.

Kamanda yavuze ko n’ubwo bagiye guserukira igihugu batabonye ubufasha nk’uko bari basanzwe babugenerwa na Minisiteri ya Siporo. Ati : “ Nta kintu  badufashije, inkunga twabonye twahawe n’abaterankunga nka  BK n’abandi yadudashije gutegura ikipe ariko abakinnyi bagiye nta mafaranga y’impamba (frais de mission) batwaye.”

Yakomeje avuga ko bagerageje kuganiriza aba bakinnyi babereka ko bagomba guhagararira igihugu gusa asaba ko  Minisiteri  yafasha amakipe y’igihugu kimwe kugira ngo banatange n’umusaruro umwe.

Muri iyi mikino, mu itsinda A harimo  Namibia, Zambia n’ikipe izava hagati ya Madagascar na Nigeria naho itsinda C rikabamo  Uganda, Algeria n’ikipe izava hagati ya Senegal na Mauritius naho itsinda D rikabamo  Tunisia, Zimbabwe n’ikipe izava hagati ya Ghana na Botswana.

Abakinnyi 22 b’u Rwanda  bagiye kwerekeza  muri Cote d’Ivoire

Hari Dushimimana Emmanuel, Ndimurwango Moise, Rukundakuvuga Martin, Bunani Janvier, Ngizwenayo Bernabe, Mwiseneza Seraphin, Habimana Eric, Rugwiro Olivier, Kazungu Patrick, Kanyamahanga Donath, Twizeyimana  Jean Leonard, Bikamba Ismael, Niyoyita Pierre, Hakizimana Jean De Dieu, Isimbi Carlos Jean Pacifique, Ufitimfura Donatien, Ikorukwishaka Patrick, Gasore Shariff, Kwizera Steve, Iradukunda Ombeni, Tuyishime Pompidou   na  Habumugisha Moise.

Abakinnyi b’ikipe y’u Rwanda ubwo bari mu myitozo ya nyuma kuri Sitade Amahoro

Umutoza, Claude Ezoua yereka abakinnyi uburyo bagomba gukina

Abakinnyi bari kumwe n’umutoza ndetse na Perezida wa RRF, Kamanda (uwa mbere iburyo mubicaye imbere)

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.