17°C , Partly sunny | Kigali-Rwanda
Imihanda mishya irimo kubakwa izaba yarangiye muri Gicurasi uyu mwaka (Foto Iyaremye Y)

Rubavu:Barishimira ko imihanda ya kaburimbo irimo kubakwa yahinduye isura y’umugi wabo

Yanditswe na  IYAREMYE YVES

Ku ya 18-02-2018 saa 17:02:58

Abaturage bo mu mujyi wa Gisenyi mu karere ka Rubavu, bavuga ko bishimira impinduka umugi wabo uri kugenda ugaragaza, wubakwamo imihanda mishya ya kaburimbo ndetse n’ibindi bikorwaremezo.

Imihanda mishya irimo kubakwa izaba yarangiye muri Gicurasi uyu mwaka (Foto Iyaremye Y)

Musabyimana Mussa, umwe mu baturage batuye mu mujyi wa Gisenyi, yagize ati:“Ibyiza birarushaho kwiyongera uko bwije n’uko bukeye, turishimira uburyo iyi mihanda n’ubwo itararangira yatangiye kuduha umucyo, mu mugi hatangiye kugaragara impinduka igaragarira buri wese, kandi noneho n’abahaturiye batangiye gukora amavugurura, ku buryo umugi ugiye kurushaho kwiyongera.”

Nk’abaturage natwe twiteguye gukomeza kuyibyaza umusaruro mu buryo bwose bushoboka, tuhakorera ibikorwa by’iterambere bifatika, tunoza ubuhahirane n’ibindi bitandukanye, ibi bikorwa tubishimira ubuyobozi bwacu ku bw’imiyoborere myiza badahwema kutugezaho.”

Umuyobozi w’Akarere ka Rubavu Habyarimana Gilbert, yemeza ko iyi mihanda mishya iri kubakwa mu kwezi kwa Gicurasi k’uyu mwaka izaba yarangiye, ndetse yashyizweho n’amatara ayicanira.

Avuga ko imihanda mishya ya kaburimbo iri kubakwa muri uyu mujyi wa Gisenyi irimo uri gukorwa ahitwa Mbugangari, undi uva ahitwa mu Koromero ugakomeza kuri Radiyo Rubavu ifite hafi 4km.

Iyi mihanda ije yunganira iyari isanzwe mu guteza imbere ubuhahirane, kugaragaza ubwiza bw’umugi, ndetse no gukemura ikibazo cy’amazi yasenyeraga abatuye uyu mugi.

Ubuyobozi bw’Akarere ka Rubavu butangaza ko iyi mihanda ya kaburimbo iri kubakwa iri muri gahunda y’imihigo y’uyu mwaka wa 2017/2018, kandi ko imirimo iri kugenda neza .

Habyarimana yagize ati:“Iyi mihanda ije mu kuzamura ubuhahirane, kurushaho kunoza umugi wacu, abaturage basabwa byinshi bijyanye no kuyibyaza umusaruro kandi na none basabwa kubaka iruhande rwayo inyubako zijyanye n’igihe, birinda akajagari n’ibindi bisa nabyo, kandi kuyifata neza nk’uko bikwiye kandi natwe tuzahora turebera uko bihagaze.”

TANGA IGITEKEREZO

Leave a Reply

Your email address will not be published. Required fields are marked *