19°C , Partly sunny | Kigali-Rwanda
Abadepite banyuzwe n'uko ingengo y'imari ikoreshwa (Foto Iyaremye Y)

Rubavu:Abadepite bashimye aho Akarere kageze gashyira mu bikorwa imihigo kahize

Yanditswe na IYAREMYE YVES

Ku ya 11-02-2018 saa 08:15:45

Abadepite bagize Komisiyo y’ingengo y’imari n’umutungo by’igihugu mu Nteko Ishinga Amategeko y’u Rwanda, basabye abayobozi n’abakozi b’Akarere ka Rubavu guharanira kwesa imihigo, kugira ngo babashe kwikura ku mwanya wa nyuma bajeho mu mihigo y’umwaka ushize.

Abadepite banyuzwe n’uko ingengo y’imari ikoreshwa (Foto Iyaremye Y)

Ubwo aba badepite bagaragarizwaga uko ingengo y’imari y’umwaka wa 2017-2018 irimo gukoreshwa mu mezi atandatu ashize, bishimiye uko irimo gukoreshwa ndetse n’urwego ibikorwa bigezeho.

Bagaragarijwe imishinga minini y’iterambere n’igipimo k’ishyirwa mu bikorwa rya buri mushinga, iteganyabikorwa ry’Akarere n’ishyirwa mu bikorwa rya gahunda nziza y’itangwa ry’amasoko.

Depite Kayitare Innocent, umwe mu bagize iri tsinda ry’abadepite basuye aka karere, yavuze ko ibyo bagaragarijwe bitanga ikizere cy’uko ingengo y’imari irimo gukoreshwa neza mu mezi atandatu ashize, mu kwesa imihigo 70 yahizwe n’Akarere ka Rubavu, kuri ubu imaze kweswa ku kigereranyo cya 57%.

Yagize ati “Turabona hari impinduka igaragara mu bijyanye no gukurikirana ibyo bahize, aho bigeze haratanga ikizere bigaragaza ko bizatanga umusaruro, icyo tubasaba ni ugukomeza gushyiramo imbaraga bita kuri buri muhigo, bawukurikirana umunsi ku wundi.”

Ubuyobozi bw’Akarere ka Rubavu bwagaragarije aba badepite ko n’ubwo bakomeje gukora cyane ngo imihigo babashe kuyesa, ariko bagifite imbogamizi zituma hari imwe mu mihigo idindira.

Murenzi Janvier, umuyobozi w’Akarere ka Rubavu wungirije ushinzwe imari n’iterambere ry’ubukungu, yemeza ko bungukiye byinshi muri uru ruzinduko rw’aba badepite.

Yagize ati “Buri gihe iyo baje baradusuzuma, bituma natwe tureba aho tugeze, ahari intege nke tugashyiramo imbaraga, ibi ni ibintu byiza bigenda bidufasha mu nshingano zacu za buri munsi, aho tugeze ni heza kandi natwe turakora ibishoboka byose ngo turusheho.”

Akomeza avuga ko bagiye kurushaho gukorana nk’ikipe bagamije kwihutisha ibyo bakora, kugira ngo umwaka uzarangire imihigo yose yararangije kweswa, ndetse bararengejeho mu rwego rwo kwikura ku mwanya wa nyuma babonye umwaka ushize.

 

TANGA IGITEKEREZO

Leave a Reply

Be the First to Comment!

avatar