22°C , Partly cloudy | Kigali-Rwanda
Urujya n'uruza mu bucuruzi bwambukiranya umupaka hagati y'u Rwanda na Kongo biteza imbere abakora ubwo bucuruzi n'ibihugu muri rusange

Rubavu: Ubucuruzi bwambukiranya imipaka bwabateje imbere

Yanditswe na MUGISHA BENIGNE

Ku ya 09-02-2018 saa 07:37:39

Ubucuruzi bwambukiranya imipaka bwatejwe imbere, bwahaye imirimo abaturage benshi bo mu Karere ka Rubavu, bibafasha kwiteza imbere no kugira imibereho myiza.

Urujya n’uruza mu bucuruzi bwambukiranya umupaka hagati y’u Rwanda na Kongo biteza imbere abakora ubwo bucuruzi n’ibihugu muri rusange

Bamwe mu baturage bakora ubucuruzi bwambukiranya imipaka bo mu Karere ka Rubavu barishimira ko bwabahaye imirimo, bakaba babasha kubona ikibatunga.

Mubashankwaya Mathias ni umwe mu baganiriye n’Imvaho Nshya, yavuze ko amaze imyaka isaga 10 akora ubucuruzi bwambukiranya umupaka, aho yirirwa muri Repubulika Iharanira Demokarasi ya Kongo (DRC) acuruza inkweto n’amasakoshi y’abagore, bikaba bimutungiye urugo, kuko abasha kubona ibirayi by’abana, akabona mituweli ndetse akabasha no kubishyurira amafaranga y’ishuri.

Ati “Maze imyaka isaga 10 nkorera ubucuruzi muri DRC ngataha ku Gisenyi, bumaze gutezwa imbere ku mpande zombi, kuko ubu tutagihohoterwa muri Kongo nka kera, turagenda tugacuruza nabo bakaza mu Rwanda bagacuruza, tukongera guhurira ku mupaka nimugoroba buri ruhande rutaha iwabo.”

Gusa ngo hari ubwisanzure badafite kubera ingeso mbi ikirangwa muri iki gihugu yo kwakwa ruswa.

Ndegeya Amrani we yikorera imizigo ayivana mu Rwanda ayijyana muri Kongo, avuga ko uyu murimo umushimisha, cyane ko atajya yiburira, avuga ko ku munsi ashobora gukorera amafaranga asaga 5000 ngo hari n’ubwo ayarenza, agakorera akabakaba ibihumbi icumi.

Yagize ati “Maze imyaka itari mike nkora aka kazi, nagatangiye nkiri umusore, kamfasha gushaka umugore, ndubaka ubu mfite abana 2, umuhungu n’umukobwa.”

Ndegaya utuye muri santere ya Mahoko, avuga ko nta murimo udakiza uretse uwo kwiba no kuroga, akaba asaba urubyiruko gukura amaboko mu mufuka bagashaka imirimo aho bishoboka, byaba ngombwa bakayihanga.

Uretse abaturage ba Rubavu, n’abaturage ba Kongo bemeza ko ubucuruzi bwambukiranya imipaka bwatejwe imbere ku mpande zombi, bukaba butunze abatari bake mu batuye umujyi wa Goma n’inkengero zawo kuko babona amafaranga abatungira imiryango, nk’uko bigarukwaho na Mateso Haminadabu, Umunyekongo urangura imyaka mu Rwanda akajya gucuruza muri Kongo.

Yagize ati “Nkoreye ubucuruzi mu Rwanda imyaka myinshi ntabasha kumenya umubare, mbasha gutunga urugo rwange, umugore abona igitenge gishya buri mwaka, abana bariga kandi babona ibyo kurya nange nta kibazo mfite mbasha no kwicarana n’abandi bagabo tukaganirira ku icupa nyuma y’imirimo.”

Avuga ko atagira ibyo acuruza bihamye, ngo ubucuruzi bwe bugendana n’imyaka yeze mu Rwanda, aho usanga ku mwero w’ibirayi acuruza ibirayi, ku mwero w’ibishyimbo agacuruza ibishyimbo akanacuruza akenshi ifu y’ubugari bw’imyumbati kuko ikunzwe cyane muri Kongo.

Wilonja Wilson na we ni umunyekongo ufite ubumuga ukora ubucuruzi bwambukiranya imipaka, aturuka muri Kongo akaza kurangura inkoko n’inkwavu mu Rwanda, yemeza ko bimutunze ngo n’ubwo afite ubumuga bw’igihe kirere, ngo nta bwo yigeze asabiriza ku muhanda kuko abasha gukora afashijwe n’igare rye.

Ati “Mfite ubumuga ariko mbasha gukora nk’abandi bose, nzindukira mu Rwanda kurangura inkoko n’inkwavu nkazijyana muri Kongo, mbikora neza mfashijwe n’igare ryange kuko mbasha kuzipakira ngasubira iwacu nkazicuruza muri za resitora, mu tubari no mu baturage bifuza kurya inkoko n’inkwavu. Bintungiye umuryango kandi nange meze neza nta kibazo mfite.”

Wilonja agira inama abafite ubumuga bagisabiriza ku muhanda gushaka icyo bakora kitabangamiwe n’ubumuga bafite kuko ubwenge babuhuje n’abandi n’ubushake bwo gukora bukaba ari ngombwa kugira ngo babeho kandi neza.

Umuyobozi w’Akarere ka Rubavu Habyarimana Gilbert avuga ko ubucuruzi bwambukiranya imipaka bwatejwe imbere ku mpande zombi, abaturage b’ibihugu byombi bakabasha guhahirana bigatuma bagarurirana ikizere hagati yabo bakanabana nk’abavandimwe kuko bahurira mu murimo umwe w’ubucuruzi bwambukiranya umupaka.

Yemeza ko urujya n’uruza rw’abantu ku mupaka muto uhuza u Rwanda na Kongo rubarurwamo abantu bari hagati y’ibihumbi 45 na 50 ku munsi kandi ko nta kibazo ruteje, ko umutekano ari wose kuri uwo mupaka, ngo n’ikimenyimenyi Abanyarwanda n’Abanyekongo barabisikana bamwe bajya iw’abandi abandi bavayo, ngo nta kibazo na kimwe bahura na cyo.

Ati “Ubucuruzi bwambukiranya imipaka bugira uruhare mu kuboneka kw’imirimo mu baturage no mu rubyiruko by’umwihariko, bakaba babasha kwikemurira ibibazo ubwabo.”

Yongeraho ko ubucuruzi bwambukiranya imipaka bwongera umusaruro mbumbe w’igihugu ndetse n’igihugu cya Kongo kikabyungukiramo.

Avuga kandi ko ubucuruzi bwambukiranya imipaka bushimangira imibanire y’ibihugu byombi n’abaturage babyo, ku buryo bagirana ubusabane no kwizerana ndetse n’ubufatanye muri byose.

TANGA IGITEKEREZO

Leave a Reply

Be the First to Comment!

avatar