21°C , Partly cloudy | Kigali-Rwanda

Rubavu: Kiosque 50 zo mu mujyi wa Gisenyi zigiye gukurwaho

Yanditswe na admin

Ku ya Nov 17, 2017

Ubuyobozi bw’Umurenge wa Gisenyi mu karere ka Rubavu, buratangaza ko bwafashe umwanzuro wo guhagarika ubucuruzi bukorerwa mu tuzu bita ‘Kiosque’, zikanasenywa mu rwego rwo kurushaho kunoza umugi no kwimakaza isuku.

Ubuyobozi bw’uyu murenge unafite igice cyose cy’umujyi wa Rubavu, buvuga ko ubu bucuruzi wasangaga buri ahantu hafi ya hose no mu mugi hagati, aho ngo wabonaga bidatanga isura nziza.

Kiosque 50 zo mu mujyi wa Gisenyi zigiye gukurwaho bitarenze uku kwezi (Foto Iyaremye Y)

Uwimana Vedaste, umunyamabanga nshingwabikorwa w’Umurenge wa Gisenyi, yagize ati “Twafashe uyu mwanzuro mu rwego rwo kurushaho kunoza umugi, hari ibikorwa byinshi birimo gukorwa muri gahunda yo kuzamura Rubavu cyane ko yatoranyijwe mu migi 6 yunganira Kigali.

Ahazasenywa ni aho kaburimbo zimaze kugera, hari utwo tuzu twacururizwagamo tugiye gusenywa kandi n’amazu atajyanye n’igihe nayo agomba gusenywa.”

Akomeza avuga ko abaturage bakwiye kumva inyungu zo gukorera ahantu hajyanye n’igihe, ndetse n’ikerekezo igihugu kihaye cyo kuzamura imigi, ikindi nuko abaturage bagomba kumva ko kuvugurura umugi hari n’impinduka ikwiye kubaho.

Muri iki gikorwa cyo gusenya izo Kiosque, izigomba gusenywa ni mirongo itanu. Italiki ntarengwa ba nyira zo bahawe akaba ari iya 24 Ugushyingo 2017. Bamwe mu  bacuruzi bakoreraga ubucuruzi buciriritse muri utwo tuzu, bavuga ko babwiwe ko bagomba kujya gushaka ahandi bakorera, gusa ngo kuhabona ntibiboroheye kuko bari baramaze gufatisha aho bakoreraga.

Nshimiyimana Gerard, umwe mu baturage bacururizaga muri ‘Kiosque’ yabwiye Imvaho Nshya ko bifuza ko iki gikorwa cyakoranwa ubushishozi kugira ngo bazabanze babone aho bakorera.

Ubuyobozi buvuga ko ku ikubitiro kiosque zizasenywa ari izo mu mugi rwagati, ariko uko iminsi izagenda yicuma n’izindi ziri mu nkengero y’umugi nazo ziteza akajagari, zizagenda zivanwaho.

IYAREMYE YVES