17°C , Intermittent clouds | Kigali-Rwanda
Minisitiri w'Ubutegetsi bw'Igihugu Kaboneka Francis yasabye ababyeyi n'urubyiruko kugira uruhare mu guhashya ibiyobyabwenge (Foto Iyaremye Y)

Rubavu: Kaboneka yasabye ababyeyi kudashora amafaranga mu biyobyabwenge

Yanditswe na IYAREMYE YVES

Ku ya 11-01-2018 saa 07:48:34

Minisitiri w’ubutegetsi bw’igihugu Kaboneka Francis yasabye ababyeyi kwirinda gushora mu bucuruzi bw’ibiyobyabwenge kuko byabageza ahantu habi.

Yabigarutseho ejo hashize tariki 10 Mutarama 2018, ubwo yari mu karere ka Rubavu, aho yasabye urubyiruko n’Abanyarwanda muri rusange kugira uruhare mu guhashya ikibazo k’ibiyobyabwenge gikomeje gufatwa nk’icyorezo cyane mu rubyiruko.

Minisitiri w’Ubutegetsi bw’Igihugu Kaboneka Francis yasabye ababyeyi n’urubyiruko kugira uruhare mu guhashya ibiyobyabwenge (Foto Iyaremye Y)

Yagize ati “N’ubwo wowe mubyeyi ugenda ukarangura ibiyobyabwenge, wibwira ko uharanira iterambere ry’urugo, ubigaburira urubyiruko ni rwo ruzahindukira rugasenya ibyo wibeshya ko urimo kugeraho, ikindi kuri ubu harimo gukazwa ibihano, ku buryo uzajya afatwa ashobora no kujya afungwa burundu.”

Minisitiri Kaboneka avuga ko ibiyobyabwenge n’uwabyise izina yari yabibonye ko bituma ubwenge buyoba, aho byangiza umutekano kandi ko kugira ngo umutekano ugerweho bitashoboka igihe hari ibiyobyabwenge.

Atanga urugero nko ku bakinnyi b’umupira igihe umuntu ashobora kujya mu kibuga kubera byagusaritse, umupira waza ukagira ngo ni agashashi; ku bw’iyo mpamvu asaba buri wese kubireka kuko uwayobye ubwenge asenya, adatekereza iterambere.

Yagize ati: “Guteza imbere akarere n’igihugu bisaba kuba dufite Abanyarwanda bafite ubwenge n’ibitekerezo biganisha ku iterambere aho nsaba ko twese ababyeyi, abana, urubyiruko, dusabwe ubufatanye mu guhangana n’iki kibazo.”

Yasabye ko buri rwego rwafatanya mu guhangana n’iki kibazo, abari mu biyobyabwenge bakabakurayo, bakaza bakigishwa kubaka.

Agira ati “Rubyiruko hari abibeshya ngo baranywa ibiyobyabwenge ngo bagira imbaraga, burya nuko ubwenge buba bwayobye uwabinyoye aba yiyica yisenya kandi asenya igihugu, rubyiruko igihugu kirabakunda cyabashoyemo amafaranga menshi kirashaka ko muba abantu bazima bafite ubuzima n’intego yo kuzabaho ejo, birababaza kubona umukobwa, umuhungu wangiritse wiyandarika wanabaye ruvumwa, ntitubishaka dushaka urubyiruko rwiza ruharanira guteza imbere igihugu narwo muri rusange.”

Umuyobozi mukuru wa Polisi y’igihugu, IGP Gasana Emmanuel, yavuze ko nta terambere u Rwanda rwageraho hatabayeho uruhare n’imbaraga mu kurwanya icyorezo cy’urumogi.

Avuga ko inzego z’umutekano zitabishobora zonyine hatabayeho ubufatanye mu kurwanya iki ikibazo, yemeza ko abamaze igihe kinini bafatirwa mu biyobyabwenge ari urubyiruko kandi ari rwo rufatwa nk’imbaraga z’igihugu.

Ati “Tugiye kongera imbaraga ku mipaka, ariko dukeneye ubufatanye na buri wese, ibi bintu bishobora gutuma igihugu gisubira inyuma mu iterambere, kikadindira, ni ikibazo ndabizeza ubufatanye kandi twashyizeho ingamba zikarishye zigamije kubirwanya nko kongera ibihano n’ibindi bitandukanye.”

Mukeshimana Agnes ni umubyeyi, avuga ko bagiye kugira uruhare rufatika mu kurwanya ko ibiyobyabwenge bikomeza kuba icyorezo aho afatanyije n’abandi batazarebera.

Mu karere ka Rubavu hangijwe ibiyobyabwenge ibilo 420 by’urumogi, gin litiro 1900 na kanyanga litiro 1300 byose bifite agaciro ka miliyoni 42.

TANGA IGITEKEREZO

Leave a Reply

Be the First to Comment!

avatar