18°C , Mostly cloudy | Kigali-Rwanda
Gen. Kabarebe yasabye abaturage batujwe mu mudugudu w'Ikitegererezo wa Bahimba kubyaza umusaruro amahirwe bahawe (Foto Iyaremye Y)

Rubavu: Kabarebe yasabye abatujwe na Leta kutagurisha inzu bubakiwe

Yanditswe na IYAREMYE YVES

Ku ya 06-10-2018 saa 16:02:45

Minisitiri w’Ingabo, Gen. James Kabarebe yasabye abatujwe mu Mudugudu w’Ikitegererezo wa Bahimba wo mu Murenge wa Nyundo mu Karere ka Rubavu gufata neza inzu bubakiwe.

Umudugudu w’ikitegerezo wa Bahimba watujwemo imiryango 48 y’abatiishoboye n’abavanywe mu manegeka (Foto Iyaremye Y)

Ni nyuma y’aho mu Murenge wa Rweru mu Karere ka Bugesera hagaragaye ikibazo cy’abagurishije inzu Leta yabubakiye nk’abatishoboye birukanwe muri Tanzania mu mwaka wa 2006.

Minisiteri y’Ubutegetsi bw’Igihugu ivuga ko bitemewe kugura cyangwa kugurisha inzu Leta yubakiye umuturage utishoboye, ariko hari abagiye babirengaho.

Gen Kabarebe yasabye abo mu Mudugudu wa Bahimba kudakora ikosa ryo kugurisha izo nzu batujwemo.

Ati: “Inzu mwahawe musabwe kuzifata neza, hari aho byagiye bigaragara ko hari abahabwa inzu ejo ugasanga bazisambuye barimo kugurisha, mwahawe umudugudu mwiza ufite byose bikenerwa ngo mubihereho mwiteza imbere.”

Gen Kabarebe yabivugiye mu muhango wo gutaha ku mugaragaro uwo mudugudu wuzuye utwaye amafaranga y’u Rwanda asaga miliyari imwe na miliyoni magana abiri.

Gen. Kabarebe yasabye abaturage batujwe mu mudugudu w’Ikitegererezo wa Bahimba kubyaza umusaruro amahirwe bahawe (Foto Iyaremye Y)

Yashimiye uruhare rwa buri wese mu gutuma iki gukorwa kigenda neza, asobanurira abahawe inzu amahirwe yose bahawe agiye kubafasha kwiteza imbere.

Minisitiri w’Ingabo yavuze ko iyi ari intambwe yo gufasha abatujwe muri uyu mudugudu kugera kure. Ati: “Muhawe inzu nziza zo guturamo mubaho neza, muhawe amashuri abanyeshuri bagiye kwiga, mugiye korora mufite n’amahirwe menshi cyane.”

“Igihugu cyacu gifite byose byadufasha gutera imbere, mukure amaboko mu mufuka mukore mugire icyo mwimarira, mugomba gukora mukivana mu bukene byanze bikunze.”

Umuyobozi w’Akarere ka Rubavu, Habyarimana Gilbert, yavuze ko uyu mudugudu uje ari igisubizo, cyane ko ibikorwa remezo bawushyizemo bizagera kuri benshi.

Agira ati: “Hari ivuriro rifasha abatuye muri Nyundo, hari ishuri ry’imyaka 4 rigiye kwifashishwa mu kugabanya ubucucike bw’abanyeshuri biga mu bigo bitandukanye byegereye Bahimba, tuzakomeza kuba hafi y’abaturage tubakangurira kurushaho kwifashisha amahirwe bahawe biteza imbere kandi n’ibitari byahagera birimo icyumba mberabyombi kizifashishwa mu kuzamura imyidagaduro, isoko, umuhanda ukoze neza na byo bizakorwa mu gihe kidatinze.”

Nyirabarihira Ancilla, umwe mu batishoboye watujwe muri uyu mudugudu, yavuze ati “Nari mu kiciro cya mbere cy’ubudehe ariko nyuma yo gutuzwa muri uyu mudugudu, icyo kiciro nkivuyemo ngiye mu cya kabiri.”

Yunzemo ati “Nzabigeraho mbikesha amahirwe y’iterambere negerejwe. Mbere twari dutuye ahantu habi turi mu bukene ariko twatujwe ahantu heza hari umuriro, amazi, amashuri n’ibindi bigiye kudufasha kwiteza imbere, ngiye guharanira gukora cyane.”

Uyu mudugudu watangiye kubakwa muri Mutarama 2017 wuzura muri Kanama 2018.

Ugizwe n’inzu 12 aho imwe iturwamo n’imiryango 4 kuri ubu hakaba hatujwemo imiryango itishoboye n’indi yakuwe mu manegeka igera kuri 48.

Gen Kabarebe atemberezwa ishuri mu mudugudu wa Bahimba

Gen James Kabarebe n’abandi bashyitsi bataha umudugudu w’ikitegerezo wa Bahimba(Ifoto Iyaremye Y)

Gen Kabarebe hagati, Umuyobozi w’Akarere ka Rubavu, Habyarimana Gilbert (ibumoso) , n’umunyamabanga nshingwabikorwa w’Intara y’Iburengarazuba bagera ahazororerwa (Ifoto Iyaremye Y)

Gen James Kabarebe n’abandi bashyitsi bataha umudugudu w’ikitegerezo wa Bahimba (Ifoto Iyaremye Y)

TANGA IGITEKEREZO

Leave a Reply

Your email address will not be published. Required fields are marked *