26°C , Partly sunny | Kigali-Rwanda

Rubavu : Ba Gitifu b’utugari bose bashyikirijwe internet ya 4G 

Yanditswe na Imvaho Nshya

Ku ya 25-05-2020 saa 17:43:56

Utugari 32 twari dusigaye tutarahabwa Internet ya 4G muri 80 tugize Akarere ka Rubavu twayishyikirijwe, dusabwa kuyibyaza umusaruro mu kunoza no kwihutisha serivisi baha abaturage bifashishije iri koranabuhanga.

Ibikoresho bya murandasi byatanzwe ndetse n’ifatabuguzi ry’umwaka bifite agaciro k’amafaranga y’u Rwanda angana na miriyoni 15 n’ibihumbi birenga 385.

Abanyamabanga Nshingwabikorwa b’utugari bahawe izi Internet, bagaragaza impinduka iyo internet igiye kuzana muri serivisi baha abaturage.

Murekatete Aline wo mu kagari ka Rwaza mu Murenge wa Rugerero, yagize ati : “Iyi internet twari tuyikeneye cyane mu kwihutisha ibyo dukorera abaturage kuko hari n’ubwo umuturage yasangaga nta mafaranga (Megabytes) dufite muri telefone zacu kuko ari zo twifashishaga bityo serivisi yagombaga kubona ku buryo bwihuse ikadindira. Iyi internet izadufasha cyane kunoza akazi kacu ka buri munsi. ”

Abanyamabanga Nshingwabikorwa b’utugari basabwe gufata neza ibikoresho bahawe

Mugenzi we w’Akagari ka Rwangara mu Murenge wa Cyanzarwe Sinzabakwira Ladislas, na we yagize ati :” Internet twari tuyikeneye cyane kuko hari ubwo twabaga dukeneye gutanga raporo zihuta bikadusaba kubanza kujya ku biro bw’Umurenge kuko ariho twashoboraga gusanga Internet. Kuba tuyibonye biradufasha kurushaho kuzuza inshingano zacu ndetse izajya inafasha abaturage bacu gusaba services bakeneye no mu zindi nzego. ”

Mu muhango wo gushyikiriza Abanyamabanga Nshingwabikorwa b’utugari iyo internet, Umuyobozi w’Akarere wungirije ushinzwe ubukungu Nzabonimpa Deogratias, yagaragaje ko bayihawe mu rwego rwo kurushaho kunoza no kwihutisha serivisi zahabwaga abaturage.

Yagize ati :”Twiyemeje gukomeza gushyira umuturage ku isonga, ni yo mpamvu dukomeza gukora ibishoboka byose kugira ngo serivisi umuturage ahabwa ibe inoze kandi ayibone ku buryo bwihuse hifashishijwe Ikoranabuhanga rigezweho.”

Yongeyeho ati : “Icyo dusaba ni ugufata ibyo bikoresho neza kugira ngo bizarambe ndetse by’umwihariko bigakoreshwa mu nyungu rusange z’abaturage hagamijwe kubahindurira ubuzima aho na bo bagomba gutozwa kuyikoresha bisabira serivisi no mu zindi nzego ziri hejuru y’Akagari. ”

Yagaragaje ko izi Internet zihawe Utugari 32 zije ziyongera kuri 48 zisanzwe zarashyikirijwe utundi tugari.

Abanyamabanga Nshingwabikorwa bishimiye ko bahawe ikoranabuhanga rigiye kwihurisha imirimo yabo ya buri munsi

Umuyobozi w’Akarere wungirije ushinzwe ubukungu Nzabonimpa Deogratias

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.