23°C , Mostly cloudy with thundershowers | Kigali-Rwanda
Umuyobozi w'Akarere ka Rubavu wungirije ushinzwe imibereho myiza Uwampayizina Marie Grace (hagati) asaba abaturage kwiyandikishaho ubutaka(Foto Iyaremye Y)

Rubavu: Abaturage bishimiye ko begerejwe serivisi z’ubutaka

Yanditswe na Iyaremye Yves

Ku ya 07-12-2018 saa 15:59:30

Bamwe mu baturage bo mu Karere ka Rubavu mu mirenge itandukanye barishimira ko begerejwe serivisi z’ubutaka, aho zashyizwe mu Murenge wa Kanzenze muri gahunda y’icyumweru cyahariwe ubutaka.

Iyi gahunda yashyizweho mu rwego rwo kwegera abaturage bo mu mirenge ya Kanzenze, Nyakiliba, Mudende na Bugeshi ndetse n’abandi bari basanzwe bafite ikibazo cyo kwiyandikishaho ubutaka n’izindi serivisi.

Aba baturage bavuga ko kuri ubu bishimira uburyo ibijyanye na serivisi z’ubutaka bitakibagora kuko bagenda bashyirirwaho amahirwe bityo bagahabwa ibyangombwa bitabasabye gukora ingendo ndende no gutegereza igihe kirekire ahubwo babihabwa mu gihe cy’umunsi umwe.

Furaha Chantal ni umuturage wo mu Murenge wa Kanzenze ashima iyi gahunda kuko ngo igiye kuborohereza kubona ibyangombwa mu buryo bworoshye asaba ko yahoraho.

Yagize ati: “Aya mahirwe dusigaye duhabwa aradushimisha cyane biradufasha kuko mu bihe bisanzwe hari ubwo hajemo ubukererwe mu guhabwa serivisi z’ubutaka, ukaba wamara ibyumweru na bitatu utarabona ibyangombwa ariko hano twishimira ko umunsi wigomwe utahana icyangombwa cyawe, serivisi zikihuta kandi nta kukujyana mu bintu byinshi, turashima ubuyobozi bushyiraho icyumweru cy’ubutaka dusaba ko byahoraho, kuko kutandikisha ubutaka biraduhombya binabangamira iterambere ryacu.”

Umuyobozi w’Akarere ka Rubavu wungirije ushinzwe imibereho myiza Uwampayizina Marie Grace (hagati) asaba abaturage kwiyandikishaho ubutaka(Foto Iyaremye Y)

Gasuku Oscar ushinzwe ibikorwa remezo n’imiturire mu Karere ka Rubavu asaba abaturage kubyaza umusaruro aya mahirwe baba bahawe, gusa ngo impamvu haba habayeho kongera gutanga amahirwe usanga mu gihe bashyizeho icyumweru cy’ubutaka ababikeneye ari benshi rimwe na rimwe bamwe bagacikanwa.

Agira ati: “Iyi gahunda igamije gufasha buri muturage ushaka serivisi z’ubutaka kuzibona, hari ubwo dutegura iyi gahunda ikarangira abaturage bose batagezweho bikadusaba ko dutanga andi mahirwe, turasaba abaturage kubyaza umusaruro aya mahirwe kuko ni ingenzi, ni ingirakamaro, serivisi zirihuta kuko ibisabwa byose n’abakenewe kugira ngo umuntu abone icyangombwa bose tuba turi kumwe bikoroha.”

Umuyobozi w’Akarere ka Rubavu wungirije ushinzwe imibereho myiza y’abaturage Uwampayizina Marie Grace yibukije abaturage ko ubutaka butabanditseho atari ubwabo bityo bakwiye gushishikariza n’abandi kubwandikisha.

Agira ati: “Abaturage basabwa kumenya ko kwiyandikishaho ubutaka ari inyungu zabo kuko biguha uburenganzira ku butaka wiguriye bitandukanye no kubutunga butakwanditseho cyane ko bishobora gutuma ubuhuguzwa, serivisi igihe zabegerejwe basabwa kuzibyaza umusaruro.”

Ikegeranyo cyakozwe n’umuryango wa Transparency International Rwanda muri uyu mwaka kigaragaza ko mu turere umunani twakozweho ubushakashatsi, Rubavu iza ku mwanya wa kabiri nyuma y’Akarere ka Kayonza aho iki kegeranyo kigaragaza ko hari ugutinda kwa serivisi z’ubutaka bikurura ruswa n’akarengane rimwe na rimwe, ngo iyi gahunda irihutisha izi serivisi.

TANGA IGITEKEREZO

Leave a Reply

Your email address will not be published. Required fields are marked *