18°C , Partly cloudy | Kigali-Rwanda

Rubavu: Abarokotse Jenoside bagiye kubakirwa inzu zisaga 18

Yanditswe na IYAREMYE YVES

Ku ya 11-09-2018 saa 09:27:12

Abarokotse Jenoside batishoboye bagiye kubakirwa n’ubuyobozi bw’Akarere inzu zisaga 18 muri uyu mwaka w’ingengo y’imari 2018/2019 mu rwego rwo kubafasha kubaho neza no gutura ahantu heza.

Ubuyobozi bw’Akarere ka Rubavu buvuga ko abarokotse Jenoside batishoboye batuye mu murenge wa Rugerero mu karere ka Rubavu bagenda bubakirwa inzu uko ubushobozi bugenda buboneka, muri uyu mwaka w’ingengo y’imari hakaba hagiye kubakwa inzu zisaga 18 zizatuzwamo imiryango 36 aho imwe izajya ituzwamo  imiryango 2.

Umuyobozi w’Akarere ka Rubavu Habyarimana Gilbert yemeza ko kugeza ubu hari inzu zisaga 93 zamaze kubakirwa imiryango y’abarokotse Jenoside batishoboye.

Yagize ati: “Mu rwego rwo gukomeza gufasha abatishoboye barokotse Jenoside, gutura neza ubusanzwe inzu bari barahawe zari zishaje zitakijyanye n’igihe tugezemo kubera ko n’abazibahaye hari ibintu byinshi batashyizemo twateganyije kubaka inzu zigezweho zituzwamo imiryango 2 muri imwe, uyu mwaka zizubakwa zikomeze zibunganire.”

Mukasekuru Ange umwe mu batuye mu nzu zamaze kubakwa mu murenge wa Rugerero, Akarere ka Rubavu ashima uburyo ubuyobozi bwiza bukomeza kubafasha gutura ahantu heza, babakura mu nzu zashoboraga no kuba zabagwaho bagatuzwa ahantu heza ngo bibasubiza ikizere.

Agira ati: “Twe twamaze kwimurirwa mu nzu nziza badusaniye ni ibintu bitwongerera ikizere biradufasha cyane kuko izo twari dutuyemo wabonaga zifite ibibazo ziva cyane ku buryo mu gihe k’imvura bisaba kujya ahagerageza, ukarara udasinziriye, amazi ntayo mbese bari baraziduhaye zituzuye neza zidakomeye ku buryo byari byoroshye kuba zadusenyukiraho. Izi baduhaye natwe icyo dukora ni ukuzitaho nkuko bikwiye ntizisenyuke cyangwa ngo zangirike”.

Ubuyobozi bw’akarere bukomeza buvuga ko usibye kubaka izi nzu banakurikirana bafasha aba batishoboye kuba bagira uturima tw’igikoni, kuba batura ahantu hameze neza cyane n’ibindi bitandukanye, gusa bubasaba kujya bita kuri izo nzu bakazikorera isuku bazirinda kwangirika kandi no ku miryango itarafashwa kubona inzu zimeze neza ngo bizagenda bikorwa uko ubushobozi n’abafatanyabikorwa bazajya baboneka.

TANGA IGITEKEREZO

Leave a Reply

Your email address will not be published. Required fields are marked *