23°C , Mostly cloudy | Kigali-Rwanda
Uwampayizina Marie Grace Umuyobozi w'Akarere ka Rubavu wungirije ushinzwe imibereho myiza (uwa mbere ibumoso) yerekwa bimwe mu bikorwa by'abafite ubumuga (Foto Iyaremye Y)

Rubavu: Abafite ubumuga barashima urwego bamaze kugeraho biteza imbere

Yanditswe na Iyaremye Yves

Ku ya 07-12-2018 saa 15:48:19

Abagize Koperative Twisungane Mudende ihuje abafite ubumuga n’abandi baturage batabufite ikorera mu Murenge wa Mudende mu Karere ka Rubavu, baravuga ko yababereye igisubizo ibavana mu bwigunge n’ubukene.

Bahamya ko kuri ubu bafite ikizere cy’ahazaza heza bashingira ku bikorwa by’ubuhinzi n’ubworozi bwa kijyambere bakora, bikaba byarabafashije kwiteza imbere.

Nyiradede Mariya, uvuka mu Murenge wa Mudende akaba ari na ho atuye afite ubumuga bw’akaguru k’ibumoso yemeza ko mu gihe k’imyaka ine amaze muri Koperative Twisungane Mudende ihinga ibirayi n’ibigori ikanorozanya amatungo anyuranye, yababereye igisubizo ku bibazo bari bafite.

Agira ati : « Mbere y’uko nyijyamo wasangaga turi abantu bari mu rugo batiteza imbere, twibona nk’abantu badafite icyo bashoboye, twisuzugura umuntu yumva nta cyo amaze, ndi hano muri koperative iyo duhinze tuba turi kwiteza imbere nta munyamuryango wacu wagira ikibazo ngo tureke kumwitaho, nta warwara ngo tunanirwe kumwitaho. »

Akomeza agira ati: « Turahinga ibirayi, twamara kunguka tukagurira abanyamuryango amatungo magufi n’abandi banyamuryango basigaye tukabarihira Mituweli ikindi ni yo umunyamuryango agize ikibazo turakimukemurira akazatwishyura ariko ikibazo twagikemuye.’’

Ubuyobozi bw’Akarere ka Rubavu buvuga ko mu rwego rw’Akarere ka Rubavu, ubu habarurwa amakoperative 13 y’abafite ubumuga, muri yo 12 afite ubuzima gatozi.

Umuhuzabikorwa wungirije w’Inama y’Igihugu y’Abafite ubumuga mu Ntara y’Iburengerazuba, Hakizimana Verien, yemeza ko aya makoperative amaze kugera ku ntambwe ishimishije by’umwihariko harimo n’ari ku rwego mpuzamahanga.

Agira ati : « Amakoperative dufite mu rwego rw’intara ageze kuri 40, imikorere yayo igeze ku rwego rushimishije, bishatse kuvuga ko intambwe bagezeho biteza imbere itandukanye n’aho bari bari batarajya muri ayo makoperative. Impinduka iragaragara wenda dufashe urugero kuri koperative COTRARU y’abanyamagare muri Rubavu, ahantu bageze harashimishije, no mu bihugu duturanye bya EAC hari byinshi bashaka kuza kwigira kuri iyi koperative, kandi natwe turakora ngo dukomeze tugere kure. »

Uwampayizina Marie Grace Umuyobozi w’Akarere ka Rubavu wungirije ushinzwe imibereho myiza (uwa mbere ibumoso) yerekwa bimwe mu bikorwa by’abafite ubumuga (Foto Iyaremye Y)

 

Umuyobozi wungirije ushinzwe imibereho myiza y’abaturage mu Karere ka Rubavu, Uwampayizina Marie Grace, asaba imiryango itita ku burenganzira bw’abafite ubumuga kubicikaho kuko babavutsa amahirwe, asaba abafite ubumuga kwegera abandi bakishyira hamwe, ababigerageje mu bafite ubumuga batandukanye no gusabiriza ndetse no kwigunga.

Agira ati : « Turishimira urwego abafite ubumuga bagezeho kuko berekana ko bashoboye bamaze kwiteza imbere mu buryo bwose bushoboka, turasaba ko ahakiri umuco mubi wo guhisha umuntu ufite ubumuga bazadutungira agatoki kandi dushishikariza abafite ubumuga gukomeza kwiteza imbere babyaza umusaruro amahirwe ahari.»

Zimwe mu mbogamizi abafite ubumuga bavuga ko zikibazitiye mu iterambere harimo ubujiji aho basaba amahugurwa mu ngeri zinyuranye, ikibazo cyo guhezwa hamwe na hamwe, ikiguzi gihenze k’insimburangingo ndetse n’abubaka inzu z’amagorofa ntibabagenere inzira.

TANGA IGITEKEREZO

Leave a Reply

Your email address will not be published. Required fields are marked *