19°C , Mostly cloudy | Kigali-Rwanda
Umuyubozi Mukuru wa RSSB Gatera Jonathan asobanurira PAC uburyo kongererwa inshingano bitababujije gucunga neza umutungo (Foto N. J.Damascene)

RSSB yashimiwe gucunga umutungo neza nyuma yo kongererwa inshingano

Yanditswe na NSENGIYUMVA J.DAMASCENE

Ku ya 13-06-2018 saa 05:44:45

Komisiyo ishinzwe gukurikirana imikoreshereze y’imari ya Leta mu Nteko Ishinga Amategeko (PAC) yashimye Ikigo cyubwiteganyirize mu Rwanda (RSSB) ko cyacunze umutungo neza nyuma yo kongerwa inshingano.

Umuyubozi Mukuru wa RSSB Gatera Jonathan asobanurira PAC uburyo kongererwa inshingano bitababujije gucunga neza umutungo (Foto N. J.Damascene)

Ejo hashize tariki 12 Kamena 2018 ni bwo Ikigo cyubwiteganyirize mu Rwanda kitabye Komisiyo ishinzwe gukurikirana imikoreshereze y’imari ya Leta mu Nteko Ishinga Amategeko (PAC) igishimira kuba cyarabashije gucunga umutungo neza n’ubwo mu nshingano zacyo hari hiyongereyemo ibindi bigo bibiri birimo ubwisungane mu kwivuza n’ibijyanye no gukomeza guhemba ababyeyi bagiye mu kiruhuko cy’amezi atatu nyuma yo kubyara.

Mu mbogamizi ikigo RSSB cyagaragaje, ni uko ikigo cy’ubwisungane mu kwivuza cyagenzuwe bwa mbere kimaze kujya mu nshingano za RSSB bituma amakosa yose yagaragayemo abazwa iki kigo. Indi mbogamizi RSSB yagaragaje, ni uko mbere yo kongerwa inshingano itabanje guhabwa igihe ngo ikore inyigo yimbitse ndetse inarebe ko ifite ubushobozi bwo kwakira ibindi bigo.

Bimwe mu bibazo Komisiyo ya PAC iyobowe na Hon. Nkusi Juvenal yagaragarije RSSB harimo kutita ku nama ihabwa n’Umugenzuzi Mukuru w’Imari ya Leta bigatuma kugeza ubu muri raporo iheruka yaragaragayemo ibibazo mirongo bijyanye no kudacunga umutungo neza, kuba hari ibigo bitishyurira abakozi ubwiteganyirize kandi byabakase amafaranga maze nyuma y’igihe runaka baza kwaka amafaranga y’ubwiteganyirize bw’izabukuru bagasanga batarateganyirijwe, bityo ugasanga umuturage ari we uharenganiye.

Mu kwisobanura ikigo RSSB cyagaragaje ko n’ubwo nta we ukwiye kwishimira amakosa, ariko amakosa 80 ari make ukurikije uko ikigo kingana. Mu magambo ye, Umuyobozi Mukuru w’Ikigo RSSB Gatera Jonathan yagize ati “Mu by’ukuri nta we ukwiye kwishimira amakosa, ariko ukurikije uko ikigo RSSB kingana wasanga twaragerageje, gusa bitweretse aho duhagaze”.

Gatera yakomeje avuga ko muri miliyari 16 z’amafaranga y’u Rwanda amenshi afitwe n’ibigo bya Leta birimo kaminuza y’u Rwanda ifitemo angana na 45%, ibigo mpuzamahanga bifitemo 30% andi asigaye akaba afitwe n’ibigo byahagaze bitagikora. Yongeyeho ko itegeko rihana umukoresha udateganyiriza abakozi risobanutse bityo ari yo nzira bagiye kugana.

Ibi byose ni bimwe mu bituma igenamigambi rya RSSB ridindira bikanatizwa umurindi n’ibindi bigo RSSB yagiye yongererwa, ndetse n’izindi mbogamizi ziterwa n’uburyo bw’imikorere (system) basanganywe bugomba guhinduka.

Nyuma y’imyaka 3 Komisiyo ya PAC isuye ikigo RSSB, yatangaje ko ibona harakosowe byinshi ariko kandi bagomba kugaragaza ingengabihe y’uko tumwe mu tubazo tukigararamo tugomba gukemuka ndetse n’ikibazo cy’ubwisungane mu kwivuza kigashakirwa umuti urambye kuko ibikenewe bikomeza kwiyongera kandi Leta ikaba itazakomeza kuzamura umusanzu utangwa n’umuturage.

 

TANGA IGITEKEREZO

Leave a Reply

Be the First to Comment!

avatar