19°C , Partly cloudy | Kigali-Rwanda

RSSB ishora imari iharanira ahazaza heza h’Abanyarwanda

Yanditswe na Ntawitonda Jean Claude

Ku ya 28-02-2019 saa 09:36:56
Umushinga wa Vision City uri mu bikomeje guhindura Isura y'Umujyi wa Kigali

Ishoramari ry’Ikigo cy’Ubwiteganyirize mu Rwanda (RSSB) rigamije kubaka iterambere rirambye ry’Igihugu binyuze mu guteganyiriza abanyamuryango by’igihe kigufi n’igihe kirekire, kubungabunga ubuzima n’imibereho byabo, kubaka ibikorwa remezo biramba kandi byunguka n’ibindi.

Kugera ku ntego no gukomeza gukora ibikorwa bifite inyungu rusange bituruka ku bwizigame bw’abanyamuryango, buba bugomba kubyazwa umusaruro utuma abiteganyiriza babona ibyo RSSB ibagomba byiyongereyeho inyungu.

Umuyobozi Mukuru wa RSSB Tusabe Richard, yatangarije Imvaho Nshya ko iri shoramari rikorwa hagamijwe kugira uruhare rufatika mu iterambere rirambye ry’ubukungu bw’Igihugu.

Yagize ati “Duhindura ubukungu bw’Igihugu dushora imari aho twumva mu by’ukuri bifitiye igihugu akamaro mu buryo burambye atari ugukurikira inyungu gusa, kuko ushobora kuzikurikira na none wa muturage w’Igihugu cyacu atibonamo cyangwa se ugasanga nta mpinduka ugize ku iterambere.”

Mu guharanira gutanga umusaruro, RSSB yibanda ku mishinga ibyara inyungu mu gihe kirekire iteganya ko abanyamuryango bakiri bato bazabona umusaruro wo kwizigamira neza kandi ku gihe.

Hari amafaranga ashorwa mu nyubako zigezweho, kandi zijyanye n’igihe, andi akagurwamo imigabane mu bigo bitandukanye bityo bikongera abakozi n’umusaruro bibona, kuzigama mu bigo by’imari bityo na byo bigakoresha ayo mafaranga mu kuguriza Abanyarwanda n’ibindi.

Inyubako za RSSB zahinduye isura y’imigi y’u Rwanda

Ishinga y’ubwubatsi ya RSSB irigaragaza, kandi ikoranwa ubuhanga hagamijwe ko uburambe bwayo bujyana n’ikerekezo k’Igihugu.

Iyo ugeze mu migi RSSB yatangiye gushoramo imari binyuze mu myubakire, inyubako ihita ihura n’imboni ni imwe mu zamaze kubakwa hagamijwe kuzigamira Abanyarwanda by’igihe kirekire, bitewe n’ubwiza, umwihariko w’uburambe mu myubakire ndetse zikaba zinajyanye n’igihe.

Umushinga wa ‘Vision City’ ni umwe mu mishinga ikomeye ugizwe n’amacumbi aciriritse mu Mujyi wa Kigali yatangiye kugurishwa Abanyarwanda, hakaba harimo gutegurwa ikiciro cyayo cya kabiri kigenewe abantu bafite ubushobozi buringaniye n’uburi hejuru.

Undi mushinga ni uw’amazu aciriritse wa Batsinda aho ikiciro cya mbere cyatanze umusaruro, ubu icya kabiri cyagenewe abafite ubushobozi buringaniye kikaba kigeze kuri 20% gishyirwa mu bikorwa.

Umuyobozi Mukuru wa RSSB Tusabe Richard yagize ati “Dukomeje inzira yo kuziba icyuho kiri mu mazu ajyanye n’igihe tubihuza n’ubushobozi bw’abafatabuguzi bacu. Indi mishinga tukirimo kuganira n’abashoramari ni iya Kinyinya aho dufite ubutaka bunini turateganya kuhubaka amazu agera ku 10.000. Hari n’umushinga w’ahitwa ku Ijuru rya Gasogi aho duteganya kubaka amazu 7.000 agenewe abafatabuguzi baciriritse.”

Uretse mu Mujyi wa Kigali hubatswe na Santere y’imikino (Recreation center Kacyiru), hari n’izindi nyubako zubatswe mu Karere ka Musanze, Rwamagana, Nyagatare, Muhanga, Nyanza na Karongi.

Mu gihembwe cya mbere cy’umwaka wa 2018/2019, ubukode bw’inyubako z’Ikigo cy’Ubwiteganyirize mu Rwanda (RSSB) bwinjije miriyari 1 na miriyoni zisaga 442.

RSSB iramara Abanyarwanda impungenge ko itazigera ishora imari mu mishinga yakurura igihombo, kuko ahenshi ishora ni mu mitungo itimukanwa iba iteganyirizwa kunguka mu myaka myinshi kandi ibaze nk’uko bikorwa n’ahandi ku Isi.

Akomeza agira ati “Ntushobora gushora imari uyu munsi ngo nyuma y’imyaka ine ushake kunguka. Hari abantu bitiranya ishoramari rya RSSB no kurangura aho ugura ikontineri ukaba uzi ngo urungukamo amafaranga aya n’aya. Icyo twakwizeza Abanyarwanda ni uko iyi mishinga turimo gushyiramo amafaranga izunguka mu gihe kiri imbere, kandi dufite politiki y’ishoramari ivuga ko hari ibigomba gushorwamo amafaranga n’igipimo kitagomba kurenga”.

Muri ibi bipimo harimo kuba RSSB idashobora kurenza 15% by’amafaranga ifite mu gihe ishora hanze y’Igihugu, kurenza 30% ashorwa mu kigo kimwe n’ibindi.

Ishoramari rya RSSB mu mitungo itimukanwa ryageze mu mpera za 2018 rifite agaciro ka miriyari 960 na miriyoni zisaga 472, rikaba ritanga ikizere k’inyungu ihoraho y’igihe kirekire cyane ko hagikorwa imishinga yinjiza inyungu.

Isura ya nijoro y’inyubako ikoreramo RSSB ku rwego rw’Igihugu iherereye mu Karere ka Nyarugenge

Umushinga wa Vision City uri mu bikomeje guhindura Isura y’Umujyi wa Kigali

Inyubako ya RSSB i Musanze ikoreramo inzego n’ibigo binyuranye

Imwe mu nyubako za RSSB iherereye mu Mujyi wa Kigali rwagati

Ikicaro gikuru cya RSSB

Tusabe Richard, Umuyobozi Mukuru wa RSSB

Umwanditsi:

Ntawitonda Jean Claude

Tanga Igitekerezo

Email yanyu ntigaragazwa ku rubuga. Amazina na Email ni ngombwa.