25°C , Partly sunny | Kigali-Rwanda
Abaturage b'Akarere ka Gasabo bakangurirwa kujya batanga amahoro ku bukode bw'ubutaka badakererewe

RRA yashyizeho uburyo bworohereza abaturage kwishyura amahoro y’ubukode bw’ubutaka

Yanditswe na admin

Ku ya 19-12-2017 saa 07:53:04

Ikigo k’Igihugu k’imisoro n’amahoro (RRA) gikomeje kugaragaza uruhare rwacyo mu gushyiraho uburyo bushya bwiswe “RRA Iwacu” bwegereza serivisi zo kwishyura amahoro y’ubukode bw’ubutaka abaturage bazikeneye, ibyo bikaba bikorwa binyuze mu bukangurambaga bwatangirijwe mu murenge wa Kinyinya mu karere ka Gasabo.

Nk’uko Komiseri wa RRA wungirije ushinzwe imisoro y’Inzego z’ibanze Karasira Ernest abitangaza, ubwo buryo bwa “RRA Iwacu” bwashyizweho bugamije gufasha abaturage kubahiriza izo nshingano mbere y’itariki 31 Ukuboza 2017, hafungurwa ibiro 6 bishya mu Mujyi wa Kigali byo kwakira abashaka serivisi z’amahoro ku bukode.

Karasira avuga ko abantu baseta ibirenge mu minsi ya mbere bakaza mu matariki ya nyuma. Mu rwego rwo gufasha abasora kubahiriza inshingano zabo, abakoresha murandasi bashobora kuyikoresha ndetse hakaba hari n’uburyo bwo gukoresha telefoni bishyura imisoro n’amahoro.

Asobanura ko ubutaka bwishyura amahoro y’ubukode burimo ubwagenewe gutura, inganda, ubucuruzi n’ubwagenewe guhingwa burengeje hegitari ebyiri ndetse n’ubundi Inama njyanama yagena.

Karasira atangaza ko mu kwezi k’Ukuboza 2017 Mu karere ka Gasabo hagomba kwishyurwa amafaranga 3 011 186 301 ariko kugeza tariki 12 Ukuboza 2017, hamaze kwishyurwa agera kuri 598 210 712 bingana na 20%

Mu karere ka Nyarugenge hagomba kwishyurwa amafaranga 720 632 291 ariko kugeza tariki 12 Ukuboza 2017 hamaze kwishyurwa angana na 97 661 525 bingana na 14%

Mu karere ka Kicukiro hagomba kwishyurwa amafaranga 2 621 144 982 ariko kugeza tariki 12 Ukuboza 2017 hamaze kwishyurwa 361 333 041 bingana na 14%

Akomeza avuga ko “RRA Iwacu” izafasha abaturage kwirinda ibibazo baba batateganyije mu igenamigambi ry’imiryango yabo n’ibikorwa bindi bakora, abibutsa ko gutanga neza umusoro bituma umuntu yiteza imbere, abaturage bakaba basabwa kwitabira gutanga imisoro n’amahoro kugira ngo iterambere rirusheho kwihuta.

Umuyobozi w’Akarere ka Gasabo Rwamurangwa Stephen yemeza ko umusoro ari ingenzi cyane mu gutuma ibikorwa bigenewe abaturage bishoboka.

Ashima ubufatanye na RRA, avuga ko bafasha akarere gukusanya imisoro ikenewe kuko umusoro uri mu mihigo kandi ukaba n’umuhigo utuma n’indi yose igerwaho.

Yibukije abaturage ko bagomba gufata igikorwa cyo gusora nk’icyabo, bityo bakitabira kugikora kuko kibafitiye akamaro. AtiUmusoro ntiwagombye kuba umuzigo. Gusora ni inshingano n’uburenganzira bwa buri muntu.”

Kuradusenge Felicien, umuturage mu murenge wa Kinyinya, yashimye igikorwa cya ‘RRA Iwacu’ kuko cyamufashije kuzuza inshingano ze zo gusorera ahamwegereye.  Avuga ko nk’umuturage usobanukiwe aba yumva atewe ishema no gutanga umusanzu we ku gihugu asora. Ati: “Gutanga umusoro mba numva ari ishema ryanjye.”

Rwasa Daniel wo mu kagari ka Kagugu mu murenge wa Kinyinya na we avuga ko muri iki gikorwa yabashije gusobanukirwa n’ibibazo yari asanzwe afite byerekeranye n’ubutaka ndetse n’imisoro asabwa, akaba avuga ko bimuha agaciro kumva ko atanga umusoro ukubaka ibikorwa remezo bitandukanye bimufitiye akamaro ubwe ndetse n’abandi banyarwanda.

Nk’uko byagarutsweho hamwe mu hamaze gufungurwa ibiro bishya mu Mujyi wa Kigali, hari mu murenge wa Kinyinya, Ndera na Kacyiru mu karere ka Gasabo. Mu karere ka Nyarugenge byashyizwe ku murenge wa Mageragere n’uwa Kigali, mu gihe  mu karere ka Kicukiro ibiro bishya byashyizwe ku murenge wa Masaka n’uwa Kanombe.

SEZIBERA ANSELME

TANGA IGITEKEREZO

Leave a Reply

Be the First to Comment!

avatar