17°C , Mostly cloudy | Kigali-Rwanda

RRA yafashe abigana ibirango byayo bigakoreshwa ku bicuruzwa bitandukanye

Yanditswe na SEZIBERA ANSELME

Ku ya 12-06-2019 saa 15:03:13

Ikigo k’Igihugu k’Imisoro n’Amahoro (RRA) cyagaragaje bamwe mu baturage bakoresha ibirango byayo bidahuye n’ukuri bakabikoresha cyangwa bigashyirwa ku bicuruzwa bitujuje ubuziranenge kugira ngo bacuruze babeshya abaguzi mu kubashakamo indonke z’amafaranga.

Abafashwe na RRA bamaze gushyikirizwa inzego zibishinzwe nyuma bagaragarizwa itangazamakuru ejo hashize  ku ya 11 Kamena 2019.

Dufatanye Theophile umwe mu bafatiwe muri icyo cyaha aganira n’itangazamakuru asobanura ko yahamagawe n’umukobwa kuri terefone ngo aze amutume ariko  bataziranye bahuriye mu kabari k’uwitwa Turamahoro Siriyaki ari na we wamutumye ibyo birango.

Dufatanye avuga ko ibyo yatumwe nta cyo abiziho, atazi icyo bikora, kuko yahawe amafaranga 30 000 by’u Rwanda akajya ku muhanda akabihabwa bipfunyitse.

Avuga ko atigeze agira amakenga y’ibyo atwaye kuko bitamuvunnye, akanumva nta cyo yishinja ahubwo icyaha cyabazwa uwamutumye ariwe nyiri akabari Tugiramahoro Siriyaki. Ubusanzwe Dufatanye avuga ko akorera akazi k’ubukarani mu Mujyi wa Kigali aho apakurura amarangi.

Akomeza avuga ko akimara gufatwa n’inzego z’ubugenzacyaha yamenyeshejwe ko ibirango yari atwaye bitemewe n’amategeko agatabwa muri yombi hamwe na bagenzi be.

Tugiramahoro Siriyaki ufite akabari ahitwa Kabakene hafi y’aho Polisi ikorera kwa Kabuga, avuga ko tariki ya 10 Kamena 2019 ari bwo yagenderewe n’umukobwa mu kabari ke akamubwira izina ry’umuntu uziranye na Siliyaki witwa Claude wagiye Uganda.

Bagiranye ibiganiro baranasengererana ariko amusaba uwo yamutuma mu Gatsata, amwemerera kumuha umwana ajya atuma ariwe Dufatanye Theophile wavuzwe hejuru.

Agira ati: “Yampaye 50 000 y’u Rwanda dufataho 30 000 ayaha uwo musore afata moto ajya mu Gatsata hashize iminota 40 agarukana ibintu bifunze nange nza kureba mu gihe dushungereye ni bwo twatawe muri yombi na Polisi, baboneraho no gusuzuma inzoga basanze mu kabari ngo zisuzumwe ubuziranenge barebe uko zimeze.”

Avuga ko arangura mu maduka Nyabugogo ahitwa kwa Kashikashi uba ufite ubwoko bwose bw’inzoga nubwo we atamushinja gucuruza ibitujuje ubuziranenge ariko akagaragaza ko yasanganywe Konyagi na Waragi zisaga 10.

Muri make Tugiramahoro yishinja ko ibyabaye byabereye mu iduka rye kandi ibyahafatiwe bigikurikiranwa ngo bisuzumwe nk’umuntu wagira icyo abivugaho. Arasaba ko ubugenzuzi n’iperereza byakora akazi kabyo bakamenya ukuri aho kuri.

Komiseri wungirije ushinzwe abasora muri RRA Mukashyaka Drocelle, avuga ko abo bantu bafashwe n’abakozi ba RRA ku bufatanye na Polisi bafatirwa mu murenge wa Muhima mu kabari kitwa “Abeza Village” ku itariki ya 10 Kamena 2019 bakekwaho inyereza ry’imisoro.

Mukashyaka atangaza ko bafatanywe impapuro cyangwa ibimenyetso by’imisoro ku byaguzwe (Tax Stamps) ziri ku nzoga z’imbere mu gihugu cyangwa ku zitumizwa mu mahanga bigaragaza ko zishyuriwe amahoro zitinjiye mu buryo bwa magendu.

Avuga ko muri ako kabari ibyo bimenyetso by’impimbano byahasanzwe, hamwe n’imifuniko myinshi y’inzoga zo mu bwoko bwa waragi, bahasanga n’ibyapa byomekwa ku macupa mu rwego rwo kugaragaza ubwoko bwazo.

Mukashyaka avuga ko abafashwe bafite uburyo bakora izo nzoga z’inkorano bazipfundikiza ya mifuniko barangiza bakomekaho bya byapa by’ibihimbano bitari ibyabo.

Agira ati: “Ibyo ni byo byatumye dukurikirana abantu bose bari muri urwo ruhererekane ndetse tukanafata Nyiri akabari Tugiramahoro hamwe n’uwo atuma Dufatanye. Ni muri urwo rwego tugiye gukorana n’izindi nzego ngo zisuzume zimenye niba izo nzoga koko zujuje ubuziranenge, ariko twe by’umwihariko turareba ikoreshwa ry’ibyo birango”.

Mukashyaka avuga ko ibyakozwe ari inyereza rikomeye ry’umusoro binahombya Leta kuko ibirango bafatanywe babikoresha mu buryo bw’ibihimbano ku bicuruzwa byo mu gihugu n’ibindi byinjira, ikindi ni uko iryo nyereza rishobora kwangiza ubuzima bw’Abanyarwanda.

Mu rwego rwo kwirinda kugwa muri uwo mutego Mukashyaka akangurira abantu kujya bakorana n’abantu bazwi batabagusha mu makosa, ahera aho agaragaza ingamba za RRA mu kurinda ibirango bya RRA, avuga ko bidashobora kwiganwa bitewe n’ibiyirimo, ikagira imashini zigenzura ibindi birango bishobora kuza byigana, hakabaho no kwigisha abantu kubyirinda no gufatanya n’inzego zishinzwe gukumira ibyaha no kunyereza imisoro.

Mu birango mpimbano bombi bakurikiranyweho birimo ibishyirwa ku nzoga z’inkorano(Foto Sezibera)

TANGA IGITEKEREZO

Leave a Reply

Your email address will not be published. Required fields are marked *