23°C , Mostly cloudy | Kigali-Rwanda
Umuhuzabikorwa wa gahunda ya EBM mu Kigo k’Igihugu gishinzwe Imisoro n’Amahoro, Mbera Emmy

RRA: Abasora 4.500 bamaze kubona EBM ya 2

Yanditswe na Twagira Wilson

Ku ya 11-01-2019 saa 13:34:46

Umuhuzabikorwa wa gahunda ya EBM mu Kigo k’Igihugu gishinzwe Imisoro n’Amahoro Mbera Emmy, avuga ko kuva mu mwaka wa 2017 EBM yatangizwa, kugeza ubu abasora bamaze guhabwa ikoranabuhanga rya EBM ikiciro cya 2 cyangwa “version 2” bageze ku 4 500.

Avuga ko bakomeje kwiyongera, asaba ko n’abasora bakirimo gukoresha ikoranabuhanga ry’ikiciro cya mbere bakwimuka bagatangira gukoresha iya kabiri kuko rifitiye inyungu abasora barimo abanini n’abato.

Mu kiganiro n’Imvaho Nshya, Mbera avuga ko nyuma yo gutanga ikoranabuhanga rya EBM 2 ku basora, ubuyobozi bw’Ikigo k’Igihugu gishinzwe Imisoro n’Amahoro RRA babafasha kubaha amahugurwa arebana n’uburyo iryo koranabuhanga rikoreshwa kandi bakabibakorera ku buntu aho yaba ari hose akorera mu gihugu atarinze kuza ku biro by’imisoro n’amahoro.

Akomeza agira ati: “Kugeza ubu abasora bamaze kwiyandikisha muri TVA bamaze guhabwa ikoranabuhanga rya EBM ya kabiri bagera ku 4 500, kandi baracyakomeza kwiyongera, turasaba ko n’abandi bataratangira gukoresha iri koranabuhanga bakwimuka bagatangira kurikoresha kuko rifite ibyiza byinshi biborohereza mu kazi kabo.”

Umwe mu bacuruzi banini ukorera mu gace kitwa Quartier Matheus, Munyantore Pierre Claver, asanga hari ibyiza by’iri koranabuhanga rya EBM ya 2, kuko ngo agitangira gukoresha iyo serivise hari ubufasha yahawe n’Ikigo k’Imisoro n’Amahoro, kuko ahanini byorohereza n’abari mu byiciro by’abasora banini batigeze bagira amahirwe yo kujya mu ishuri ariko bafite ibikorwa by’ubucuruzi bifite agaciro gasaga miriyoni 20.

Ubuyobozi bwa RRA bwatangaje ko igikorwa cyo kugenzura abadakoresha EBM neza, kizakomeza ndetse RRA itangaza ko abacuruzi bo mu Mujyi wa Kigali bamaze gufungirwa amaduka kubera kudakoresha neza EBM.

Icyakora hari abagera kuri 12 bahawe imbabazi na Komiseri Mukuru w’Ikigo k’Igihugu k’Imisoro n’Amahoro, Ruganintwari Pascal, biyemeza gukoresha neza EBM.

Ni Nyuma yo gutakamba kw’Umuyozi w’Urugaga rw’abikorera mu rwego rw’Umujyi wa Kigali, Bitwayiki Andre.

Muri rusange mu gihugu cyose Ikigo k’Igihugu k’Imisoro n’Amahoro gifite abasora banditse mu byiciro by’abatanga umusoro ku nyongeragaciro TVA basaga 25 000.

Umuhuzabikorwa wa gahunda ya EBM mu Kigo k’Igihugu gishinzwe Imisoro n’Amahoro, Mbera Emmy

TANGA IGITEKEREZO

Leave a Reply

Your email address will not be published. Required fields are marked *