21°C , Partly cloudy | Kigali-Rwanda
Mbanda Gerald, umuyobozi ushinzwe itangazamakuru muri RGB

RGB: Ubwisanzure bw’itangazamakuru mu Rwanda bufite amanota 81,3%

Yanditswe na Sezibera Anselme

Ku ya 08-11-2018 saa 15:13:12

Ubushakashatsi bwakozwe n’Urwego rw’Igihugu rw’Imiyoborere, RGB, mu mwaka wa 2018 ku iterambere ry’itangazamakuru bwagaragaje ko ubwisanzure bw’itangazamakuru bwaje ku isonga n’amanota 81,3%.

Ibyo byatangarijwe inzego zinyuranye mu birori byo kwizihiza umunsi Nyafurika w’Itangazamakuru wabaye tariki ya 07 Ugushyingo 2018.

Ubushakashatsi buba bugamije kumenya uko itangazamakuru rihagaze, impinduka zabayeho, umusaruro watanzwe n’amavugurura yakozwe mu itangazamakuru, imbogamizi zihari n’ingamba zo guhangana nazo.

Ubushakashatsi ku bipimo by’iterambere ry’Itangazamakuru (RMB) 2018 bigizwe n’ibipimo umunani na byo bibumbiye mu byiciro 33. Gusa muri ibyo byiciro hiyongereyemo igipimo kijyanye n’ikizere abaturage bafitiye itangazamakuru, icyo kikaba ari gishya kuko kitari mu bushakashatsi bwabanje.

Muri ubwo bushakashatsi habajijwe abantu 11.872 barimo abaturage basanzwe 10.955, abanyamakuru 232, abacuruzi 325 n’abahagarariye imiryango itari iya Leta 320.

Mbanda Gerald, umuyobozi ushinzwe itangazamakuru muri RGB ari na we wamuritse ubwo bushakashatsi, agaragaza ko ibipimo 3 gusa ari byo byabashije kugira amanota ari hagati ya 75% na 81.3% bigatuma bifatwa nk’ibihagaze neza cyane, naho 5 bisigaye bigira amanota ari hagati ya 64% na 74.9% atuma biba mu bipimo bihagaze neza.

Mbanda ati: “Igipimo cy’Ubwisanzure bw’itangazamakuru ni cyo cyaje ku isonga n’amanota 81.3%, ikijyanye no kubahiriza amategeko n’amahame ngengamyitwarire agenga umwuga w’itangazamakuru cyaje inyuma n’amanota 64.2%.

Igipimo kijyanye n’Uburyo bwo kubona amakuru, cyazamutseho amanota 10.6% ugereranyije no mu 2016, mu gihe ikijyanye no kubahiriza amategeko n’amahame ngengamyitwarire agenga umwuga w’itangazamakuru cyasubiye inyuma ho amanota menshi 7.2% ugereranyije n’ayo cyagize muri RMB 2016”.

Hagaragajwe ko igipimo k’iterambere ry’itangazamakuru mu Rwanda kiri kuri 72.4% mu 2018. Mbanda avuga ko icyo gipimo cyazamutseho 2.8%, kuko mu bushakashatsi bwa 2016 (RMB 2016) cyari kuri 69.6%. Mu gihe mu 2013 icyo gipimo cyari ku manota 60.7%.

Mbanda Gerald, umuyobozi ushinzwe itangazamakuru muri RGB

Nyuma yo kumurikirwa ubwo bushakashatsi, Umunyamabanga Nshingwabikorwa w’Urwego rw’Abanyamakuru bigenzura mu Rwanda (RMC), Mugisha Emmanuel, atangaza ko bishimira intambwe itangazamakuru rimaze gutera, kandi ko uwo musaruro wavuye ku mavugururwa atandukanye yagiye akorwa.

Muri ayo mavugururwa avugamo itegeko rirebana no kugera ku makuru, kuba itangazamakuru ryarahawe uburenganzira bwo kwigenzura n’ibindi.

Umunyamabanga Nshingwabikorwa y’Inama Nkuru y’Itangazamakuru, MHC, Mbungiramihigo Peacemaker yishimiye ko itangazamakuru rikora akazi karyo neza kandi rigenda rigaragaza ko rikorera abaturage kubera ko igihugu gifite ibitangazamakuru byinshi bitanga amakuru atandukanye, bigatuma abaturage bagira agaciro bariha.

Hagandewe ku bibazo byagaraye muri ubwo bushakashatsi, hatanzwe inama zijyanye no kuvugurura amabwiriza agenga imikorerere y’ibitangazamakuru no kongera ubushobozi bw’abayobozi b’ibitangazamakuru.

Hari ugushyigikira ibitangazamakuru bifite gahunda yo kwishyira hamwe kugira ngo bizamure amikoro yabyo, gushyigikira ishyirwaho ry’ikigo cyo kubitsa no kuguriza cy’Abanyamakuru ariko n’ibitangazamakuru bigashishikarizwa gushyiraho uburyo bw’imikorere butuma bibona amafaranga mu buryo burambye.

TANGA IGITEKEREZO

Leave a Reply

Your email address will not be published. Required fields are marked *