17°C , Thunderstorms | Kigali-Rwanda

REMA yatangije amarushanwa agamije gukora ubukangurambaga bwo  kurwanya ibihumanya ikirere

Yanditswe na  IYAREMYE YVES

Ku ya 19-05-2019 saa 11:25:45
Abitabiriye irushanwa ryateguwe na REMA mu gukora ubukangurambaga bwo kwirinda ibihumanya ikirere

Ubuyobozi bw’Ikigo k’Igihugu Gishinzwe kubungabunga Ibidukikije “REMA” bwatangije amarushanwa y’umupira w’amaguru muri tumwe mu turere tugize Intara y’Iburengerazuba mu rwego rwo gukaza ubukangurambaga mu kurwanya ibihumanya ikirere.

Uturere twibanzweho muri aya marushanwa harimo Akarere ka Nyabihu, Ngororero, Rubavu na Rutsiro aho amarushanwa ari kwitabirwa n’amakipe y’abakobwa n’abahungu nyuma hagatangwa ubutumwa bugamije kubungabunga amashyamba n’ibindi byatuma haboneka umwuka mwiza wo guhumeka.

Ubuyobozi bw’iki kigo buvuga ko bwibanze kuri utu turere kuko twegereye Parike y’igihugu ya Gishwati na Mukura babashishikariza gutera ibiti byinshi kuko ngo hari umushinga wo kuhabungabunga kugira ngo hasubirane umwimerere waho.

Nizeyimana Alexis ushinzwe guhuza amakuru ajyanye n’ibidukikije muri REMA yemeza ko ubukangurambaga buhoraho by’umwihariko iyo begereje itariki bizihizaho umunsi mpuzamahanga wo kubungabunga ibidukikije ariko kuri iyi nshuro bahisemo gukinisha amakipe yatsinze muri irushanwa ry’Umurenge Kagame Cup 2019 muri buri karere bakabyifashisha bakora ubukangurambaga.

Agira ati: “Amakipe arakina ariko mu gihe baruhutse tugatanga ubutumwa by’umwihariko uyu mwaka ni ukubashishikariza kwirinda gutwika, kwita ku modoka kugira ngo  zidasohora umwuka uhumanya ikirere bityo Abanyarwanda babashe kubona umwuka bahumeka mwiza utabangiza.”

Akomeza avuga ko iki gikorwa kinyuze mu mushinga witwa RAFREC ubungabunga Parike ya Mukura na Gishwati bakomeje gushishikariza abaturage kubungabunga amashyamba, inkengero z’imigezi n’ibindi byose bihurira muri utu turere ukoreramo kandi ubukangurambaga buzakomeza.

Muri aya marushanwa ku munsi wa mbere ikipe zo mu karere ka Nyabihu na Ngororero zarakinnye birangira mu bakobwa ari 0-0 kuri penalite Ngororero itsinda 5 kuri 4 za Nyabihu naho mu bahungu Ngororero itsinda Nyabihu  ibitego 2-0. Iyi mikino yabereye ku  kibuga cya Bigogwe mu Karere ka  Nyabihu.

Umwe mu bakinnyi ba Ngororero, Twahirwa Abdoul  yagize ati: “Twishimiye kuba twatsinze  Nyabihu twe duhora twiteguye kandi turateganya kuba twakwegukana n’ibikombe mu mikino izakomeza kuko twihaye intego ko nta kipe izaducika kuko tugiye gukomeza imyitozo ku buryo tuzaba twiteguye cyane.”

Ku wa Gatandatu tariki 18 Gicurasi 2019,  mu bagabo, Rubavu yasezereye  Rutsiro kuri penaliti 5-4 nyuma yo kunganya 0-0 naho mu bagore Rutsiro isezerera Rubavu iyitsinze igitego 1-0. Tariki 31 Gicurasi 2019 ni bwo hazaba imikino ya nyuma izabere  mu Karere ka Rutsiro kuri Sitade ya Mukebera.

Abitabiriye irushanwa ryateguwe na REMA mu gukora ubukangurambaga bwo kwirinda ibihumanya ikirere

Umwanditsi:

 IYAREMYE YVES

Tanga Igitekerezo

Email yanyu ntigaragazwa ku rubuga. Amazina na Email ni ngombwa.