20°C , Mostly cloudy | Kigali-Rwanda

REG na WASAC bibutse abari abakozi ba ELECTROGAZ bazize Jenoside yakorewe Abatutsi 1994

Yanditswe na BUGINGO FIDELE

Ku ya 08-04-2021 saa 14:15:10

Kuri uyu wa Kane taliki 08 Mata 2021,  Abayobozi bakuru   ba Sosiyete y’u Rwanda Ishinzwe Ingufu (REG)  ndetse n’ Ikigo Gishinzwe Amazi n’Isukura mu Rwanda “WASAC” bibutse ku nshuro ya 27  abahoze ari abakozi ba ELECTROGAZ bazize Jenoside yakorewe Abatutsi mu 1994, igikorwa cyabereye ku Rwibutso ruherereye ku cyicaro gikuru cya REG, mu Karere ka Nyarugenge, Umujyi wa Kigali.

Uyu muhango  watangijwe no gushyira indabo kuri uru rwibutso  mu rwego rwo kwibuka no guha icyubahiro  abari abakozi ba ELECTROGAZ  173 bishwe muri Jenoside yakorewe Abatutsi mu 1994.

Ing. Dusenge Alfred Byigero, Umuyobozi Mukuru wa WASAC mu ijambo rye yongeye kwibutsa ibihe biteye ubwoba Abatutsi banyuzemo mu gihe cya Jenoside. Yakomeje yibutsa abitabiriye  uyu muhango  ko Abanyarwanda bazakomeza kwibuka Jenoside yakorewe Abatutsi mu 1994, uko ibisekuruza bizagenda  bisimburana, kandi ko buri mwaka WASAC izajya igenera inkunga abarokotse  Jenoside yo mu 1994 yakorewe Abatutsi.

Ati: “Muri uyu mwaka, twahaye amazi meza umudugudu umwe  w’abarokotse  Jenoside mu Karere ka Ruhango,turateganya  gukomeza gufasha imiryango y’abarokotse  Jenoside yakorewe Abatutsi mu 1994 kugira ngo tubahe icyubahiro.”

Perezida w’Inama y’Ubuyobozi muri REG, Dr. Didacienne Mukanyiligira yavuze ko ibyabereye mu Rwanda bibabaje cyane kandi ko adashobora kubona amagambo yo kubigaragaza ariko yizera ko Jenoside itazongera kubaho ukundi. Yahumurije imiryango y’abazize Jenoside yakorewe Abatutsi mu 1994 anashimira Ubuyobozi bwa REG kuba bwarakomeje umuco w’ubumwe ku kazi.

Ati: “Ndasaba abantu bose gukomeza kurwanya ingengabitekerezo ya Jenoside kandi bakanakomeza kubahiriza indangagaciro z’ubumwe n’ubwiyunge. Twiteguye gutanga umusanzu wacu mu gushyigikira abarokotse Jenoside, kubera ko ibikomere byatewe na Jenoside yakorewe Abatutsi mu 1994 bihora mu buzima bwabo bwa buri munsi.”

Mu rwego rwo kwibuka ku nshuro ya 27 Jenoside yakorewe Abatutsi mu 1994, REG yatanze  amashanyarazi mu mudugudu w’icyitegererezo (IDP Model Village)  wubakiwe  abarokotse Jenoside mu Karere ka Muhanga mu gihe WASAC yatanze amazi ku mazu 45 y’abarokotse Jenoside mu Karere ka  Ruhango Akarere. Ibigo byombi kandi byatanze miliyoni 4 z’amafaranga y’u Rwanda mu rwego rwo gushyigikira ibikorwa bya IBUKA mu minsi 100 yo kwibuka.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.