19°C , Mostly clear | Kigali-Rwanda
Ubuyobozi bwa REB n'abafatanyabikorwa baganira ku byiza by'ibitabo ibihumbi 40 batewemo inkunga na Guverinoma ya Suwedi

REB yashyikirijwe ibitabo 40.000 bigamije kwimakaza amahoro n’indangagaciro mu mashuri

Yanditswe na RUTAYISIRE EMILE

Ku ya 12-06-2019 saa 15:09:28

Ibitabo 40 000 byashyikirijwe Ikigo k’Igihugu gishinzwe guteza imbere Uburezi (REB), kugira ngo biboneke byatewe inkunga na Leta ya Suede binyuze mu muryango wayo, SIDA (Swedish International Development Cooperation Agency), uharanira Demokarasi n’uburenganzira bwa muntu, inkunga icishwa muri Aegis Trust, Umuryango urwanya Jenoside ukorera ku rwibutso rwa Jenoside yakorewe Abatutsi rwa Kigali ku Gisozi.

Mu muhango wo kwakira ibyo bitabo wabaye ku wa kabiri tariki ya 11 Kamena 2019, Uwari uhagarariye Umuryango  wa Leta ya Suede uharanira Demokarasi n’Uburenganzira bwa muntu SIDA, Kirenga Clement yavuze ko Leta ya Suede ibinyujije mu muryango wayo, SIDA,  inkunga igaca muri Aegis Trust bateye inkunga y’iyandikwa ry’ibitabo bigera ku bihumbi 40 bigamije kwimakaza amahoro n’indangagaciro mu Banyarwanda cyane cyane bihereye mu bana bakiri bato kuko  ibyo bitabo ari ibifasha abarimu gutanga amasomo yabo neza  ku buryo buri somo ribamo umwanya wo kuvuga ku mahoro n’indangagaciro.

Kirenga yagize ati: “Umuhanga yavuze ko amahoro ataba ahari intambara gusa ahubwo amahoro ni aba hagati y’umuntu na mugenzi we, amahoro yo mu mutima”.

Dr. Rwanamiza Erasme umukozi w’Aegis Trust ushinzwe ishami ry’uburezi avuga ko ibitabo byahawe REB birimo amoko abiri kimwe  kikaba kirimo inzira ifasha umurezi ubwe kugira ngo asobanukirwe uburezi bugamije kwimakaza amahoro n’indangagaciro icyo ari cyo, zikamufasha uburyo yiyumvisha yabishyira mu bikorwa mu gutegura amasomo ye anayatanga.

Igitabo cya kabiri kigizwe n’ingero z’amasomo anyuranye mu rwego rwa buri somo ryose ryigishwa mu Rwanda no mu rwego rw’imyaka yose y’amashuri kuva hasi kugeza hejuru amasomo anyuranye agaragaza ukuntu buri somo ryose rishobora kwakira uburezi bugamije amahoro.

Dr. Rwanamiza asobanura ko ibyo bitabo byateguwe bigamije gukiza kamere muntu, agira ati: “Muri kamere muntu usanga umuntu akurura yishyira, uko kwishyira kugatuma ava mu burenganzira bwe,  akajya mu bureganzira bw’undi, ugasanga arashaka kwikubira  cyangwa usanga yakwambura abandi uburenganzira bwabo, bigakurura amakimbirane. Ni yo mpamvu abantu baba bagomba kureba uburyo bayakemura,  batayakemura akazamuka ariko akurura urugomo ugasanga abantu babuze amahoro kandi bagombye kuyahana kuko buri wese aba ayakeneye nk’uko mugenzi we ayakeneye kandi buri wese aba yumva ashaka kumva atekanye.”

Mutanguha Freddy Umuyobozi Nshingwabikorwa wa Aegis Trust, umuryango urwanya Jenoside n’ingengabitekerezo yayo avuga impamvu bifuje gushyira mu masomo yose inyigisho zigamije kwimakaza amahoro n’indangagaciro agira ati” Twabonye ko Abanyarwanda bafite indangagaciro zabaranze kuva kera twumva twazigarura  kugira ngo zishobore kuduha amahoro arambye mu gihugu cyacu.”

Akomeza avuga ko ari byiza ko ayo masomo ashyirwa mu mashuri akigishwa abana babyiruka kugira ngo  na bo bashobore gukurikiza umurongo Aegis Trust yiyemeje wo guharanira amahoro no kubana neza nk’Abanyarwanda harwanywa ingengabitekerezo ya Jenoside aho yaturuka hose hagamijwe guteza imbere u Rwanda.

Madamu Tusiime Angelique Umuyobozi Mukuru wungirije wa REB yatangaje ko uburezi bugamije amahoro n’indangagaciro  ari ikintu kigomba kwitabwaho n’umwarimu uwo ari we wese. Ati: “Ni yo yaba yigisha imibare cyangwa ikindi cyose nta bwo bibuza ko yazanamo indangagaciro ndetse n’amahoro mu myigishirize ye.”

Yasobanuye ko atari isomo ryihariye rihari ahubwo ko ari uburyo bwo kuzana mu isomo inyigisho z’amahoro n’indangagaciro. Ibitabo bikaba bije gufasha buri mwarimu kumenya uburyo uburezi bugamije amahoro n’indangagaciro  ashobora kubyinjiza mu isomo rye, akizera ko bizagira uruhare mu gukomeza kwimakaza amahoro Abanyarwanda bashaka ndetse n’indangagaciro. Yashimiye abateye inkunga kugira ngo ibitabo biboneke kuko amahoro akenewe na buri wese.

N’ubwo ibitabo ari 40.000 bitangana n’umubare w’abarimu bose, buri kigo kizaba gifite ibitabo bashobora gusaranganya ndetse ahari mudasobwa na murandasi bage bifashisha ikoranabuhanga babisome. Ibyo bitabo bikaba byaratwaye amafaranga y’u Rwanda agera kuri miriyoni 70.

Ubuyobozi bwa REB n’abafatanyabikorwa baganira ku byiza by’ibitabo ibihumbi 40 batewemo inkunga na Guverinoma ya Suwedi

TANGA IGITEKEREZO

Leave a Reply

Your email address will not be published. Required fields are marked *