22°C , Mostly cloudy | Kigali-Rwanda
Abanyeshuri bazajya babazwa mu buryo bw'ikoranabuhanga

REB iriga uburyo abana bazajya babazwa mu buryo bw’ikoranabuhanga

Yanditswe na MUGISHA BENIGNE

Ku ya 12-07-2018 saa 06:04:25

Ikigo k’igihugu cy’uburezi (REB) cyatangiye kwiga uburyo abanyeshuri bazajya babazwa hifashishijwe uburyo bw’ikoranabuhanga.

Abanyeshuri bazajya babazwa mu buryo bw’ikoranabuhanga

Ibi ni ibyaganiriweho mu nama y’umunsi umwe yahuje abakozi ba REB basanzwe bakorera mu mashuri y’ikoranabuhanga ndetse n’ibizamini, ubuyobozi bushinzwe ikoranabuhanga muri REB n’impuguke z’Ishami ry’Umuryango w’abibumbye ryita ku burezi n’umuco (UNESCO KFIT Rwanda).

Afungura iyi nama ku mugaragaro, Dr Niyizamwiyitirira Christine, umuyobozi w’ishami ry’ikoranabuhanga muri REB, yatangaje ko iyi nama igamije gusuzumira hamwe uburyo abanyeshuri bazajya babazwa mu buryo buboneye hakoreshejwe ikoranabuhanga.

Ati “Uburyo bwa e-assessment buzafasha kwihutisha imirimo, buri munyeshuri azajya asanga ibibazo muri mudasobwa hanyuma ahite yandika ibisubizo, kandi mudasobwa ni yo izajya ikosora umunyeshuri ikamuha amanota. Ibyo bizorohereza akazi mwarimu ndetse n’umunyeshuri aho azajya abona neza ikosa yakoze bityo akaba yanarikosora mu buryo bwihuse”.

 Uyu muyobozi ushinzwe ikoranabuhanga muri REB agaragaza ko ubu buryo bw’imibarize bwateganyijwe muri gahunda y’integanyanyigisho nshya (CBC) yatangiye gukoreshwa mu mashuri mu mwaka wa 2016 kugeza ubu.

Biteganywa ko hazakoreshwa uburyo buhoraho bw’imibarize (Formative assessment) hamwe n’uburyo bw’imibarize bukorwa nyuma ya buri kiciro k’imyigire (Summative assessment).

Muri iyi nama y’umunsi umwe, umushinga wa UNESCO – KFIT Rwanda, ubifashijwemo n’impuguke Dr. Maina Wagioko yagaragaje uburyo butandukanye bw’iyi mibarize, hasigaye ko REB izafata umwanya ikabisuzuma.

 

 

TANGA IGITEKEREZO

Leave a Reply

Be the First to Comment!

avatar