17°C , Partly sunny | Kigali-Rwanda

REB: Abarimu bihugure ntibazategereze amahugurwa y’Icyongereza

Yanditswe na Rutayisire Emile

Ku ya 14-01-2020 saa 18:41:50
Dr. Ndayambaje uyobora REB

N’ubwo abigisha mu nderabarezi bagiye gukorerwa isuzuma ry’Icyongereza, abataramenya neza urwo rurimi barasabwa kujya bihugura ntibaterere agati mu ryinyo ngo Leta izakomeza ijye ibahugura kandi barashyiriweho uburyo bwo kujya nabo bihugura ubwabo.

Ibi byatangajwe n’ubuyobozi bw’Ikigo cy’Igihugu kita ku burezi (REB) kuri uyu wa kabiri tariki 14 Mutarama 2020, ubwo icyo kigo cyashyikirizaga abayobozi b’amashuri nderabarezi impamyabumenyi 3,859 z’abanyeshuri bayarangijemo mu mwaka wa 2019.

Ishuri nderabarezi rya Mururu ryo mu Karere ka Rusizi  ni ryo ryahawe igihembo cyo kuba baritwaye neza mu bizamini nk’indashyikirwa mu mashuri nderabarezi 16 ari mu Rwanda. Iri shuri ryahawe Televiziyo (Flat  TV) ya rutura izafasha ubuyobozi kujya bwereka abanyeshuri n’abarezi amakuru anyuranye ndetse n’ibindi bikorerwa ahandi.

Umuyobozi mukuru wa REB, Dr. Irénée Ndayambaje, yavuze ko Icyongereza ari ururimi rwemejwe ko rugomba kumenywa neza mu mashuri, iyo ikaba ari yo mpamvu abarimu na bamwe mu bayobozi mu bigo by’amashuri by’inderabarezi (TTC) bagiye gukorerwa isuzumabumenyi kugira ngo hagaragare ubushobozi bwabo mu rurimi rw’Icyongereza bigishamo. Gukora iryo suzumabumenyi biri muri gahunda y’igihugu, rikazakomereza no mu bandi barimu.

Ubwo yavugaga ko hagiye kuba isuzumabumenyi mu rurimi rw’Icyongereza ni bwo yaboneyeho kubibutsa uruhare rw’abigisha mu kwihugura ubwabo mu Cyongereza badategereje amahugurwa bazahabwa na Leta.

Yagize ati “Mu kwa mbere umwaka ushize ni bwo hafashwe icyemezo cy’uko Icyongereza kigomba kumenywa neza nk’ururimi rw’imyigishirize mu mashuri yacu. Nta bundi buryo twamenya igipimo abarimu bacu bariho hadakozwe isuzumabumenyi ryo ku rwego mpuzamahanga, ngo tumenye niba umwarimu runaka afite ubushobozi bwo kwigisha muri urwo rurimi”.

Yakomeje avuga ko nka REB bahisemo gutangirira mu mashuri y’inderabarezi kuko ari ho hategura abazaba abarezi, bityo bakazabona abarezi bazarangiza bafite ubushobozi muri urwo rurimi. Ati “Tugiye guhera rero ku barimu, abayobozi b’ibigo ndetse n’abashinzwe amasomo”.

Nyuma y’icyo gikorwa ngo bazareba urwego buri muntu ariho, bityo abari ku kigero cyo hasi bagenerwe amahugurwa azabazamurira igipimo cy’urwo rurimi gihuzwe n’ibikenewe mu mashuri ariko yongera kubibutsa akomeje ko umwarimu ari uhora yihugura kandi ko batagomba gutegereza ngo Leta izabaha amahugurwa kuko byose bisaba ubushobozi butari buke.

Iryo suzumabumenyi rizatangira muri uyu mwaka, rizaba riri ku rwego mpuzamahanga kuko rizakorwa ku bufatanye bwa REB ndetse n’Ikigo cy’Abongereza cya British Council.

Abarimu ntibatewe ubwoba n’iryo suzumabumenyi. Maniragaba Germain, umwe mu barimu bo muri TTC akaba yigisha mu ishuri nderabarezi rya Muhanga, avuga ko nta bwoba atewe n’iryo suzuma, cyane ko rigamije kubongerera ubumenyi.

Agira ati “Twese tugomba kumenya Icyongereza nk’ururimi dukoresha twigisha kuko bidufitiye akamaro nk’abarezi ndetse n’abanyeshuri. Ntabwo iri suzuma rinteye ubwoba kuko hari urwego ndiho kandi nizeye, ikindi ntabwo bagamije kwirukana uwo bazasanga ari ku rwego rwo hasi, ahubwo ni ukugira ngo badufashe kuzamuka”.

Umuyobozi wa TTC Muhanga, Jeanne d’Arc Mukabatesi, avuga ko umwarimu agomba guhora yiga, ari yo mpamvu iryo suzuma baryiteguye. Avuga kandi ko nabo ubwabo bazi neza ko kwihugura ari ngombwa kugira ngo bakomeze bazamure urwego bariho mu bumenyi bw’Icyongereza. Nawe agaruka ku byiza byo gukorerwa isuzuma, ko hatagamijwe kubirukana ahubwo ko hagamijwe kumenya urwego bariho bagahabwa ubufasha.

Ati “Iryo suzumabumenyi turaryiteguye, ikizamini tuzagikora nta kibazo, cyane ko abarimu dufite bose babyigiye kandi bashoboye. Icyiza ni uko ntawuzirukanwa ahubwo hazakurikiraho amahugurwa bitewe n’uko bazasanga duhagaze. Ubundi twagombye kwihugura ubwacu tudategereje REB kuko umwarimu agomba guhora yiga kandi umwarimu mwiza n’uhora yihugura”.

REB ivuga ko impamyabumeyi zatanzwe zabonetse bwa mbere ku buryo bwihuse, cyane ko zikorerwa mu Rwanda mu gihe zakorerwaga hanze ba nyirazo bakazibona nyuma y’umwaka bikabakerereza.

Ubu ngo ni byiza kuba zihuta kuboneka kuko ba nyirazo zihita zibafasha mu kuzuza ibyangombwa byabo byo gusaba akazi badatinze, cyane ko hari gahunda yo kongera umubare w’abarimu bitewe n’uko abanyeshuri na bo bakomeje kwiyongera.

Umuyobozi mukuru wa REB, Dr. Irénée Ndayambaje avuga ko gukora impamyabumenyi byabatwaye icyumweru mu gihe iyo bazikoresha hanze y’Igihugu nk’uko mbere byakorwaga byari gutwara igihe kigera ku mwaka.

Yagize ati, “Igikorwa cyo gukora impamyabumenyi z’abanyeshuri mu gihe gito ni ikintu kibaye bwa mbere mu Rwanda kandi bikorwa neza. Mbere tugikoresha dipolome mu mahanga, bikaduhenda ndetse bigatwara n’igihe byamaraga nk’umwaka kuko hari igihe Dipolome zazaga ugasanga banditse amazina nabi kubera ko yandikwaga n’abantu batazi Ikinyarwanda bigasaba kongera kozisubizayo ngo bazikosore ugasanga bitwaye igihe kinini”.

Akomeza avuga ko kuri ubu izikozwe ziba zanditse neza  kandi zagahabwa abarangije hakiri kare ku buryo nabo bagiye gupiganira umwanya wo kuba abarezi no gusuzumwa niba ururimi rw’icyongereza baruzi koko.

Dr. Ndayambaje asanga Leta kuba yarafashe ikemezo cyo gukorera Dipolome mu Rwanda ndetse no kuhandikira ibitabo ari ikintu kiza kuko hari amafaranga igihugu cyunguka kandi kikanunguka n’igihe cyatakaraga hoherezwa ibigomba gukorwa kandi nabyo hakaba igihe usanga bitakozwe neza bigomba gukosorwa.

Imvaho Nshya yaganiriye na  Mukurarinda Pie uri mu kiruhuko k’izabukuru wahoze ari umwarimu mu mashuri yisumbuye ayitangariza ko Leta yafashe ikemezo kiza cyo kwandikira dipolome mu Rwanda ndetse n’ibitabo.

Agira ati” Nigishije imyaka 35 mu mashuri yisumbuye ariko ikintu nahuye nacyo giteye ikibazo ni ibitabo by’abanyeshuri ndetse n’ibitabo by’abarimu kuko wasangaga ari bike ugereranyije n’ababikeneye. Nta kintu kibi nko kwigisha umwana adafite igitabo cye kuko iyo atashye abasha gusubiramo neza ibyo yize  . Kuba ibitabo bisigaye byandikirwa mu Rwanda ndetse ugasanga baratse uburenganzira bwo kwandukura ibihari bizatuma buri mwana abona igitabo ke ndetse n’abarimu babone ibitabo bihagije ku buryo umuco wo gusangira igitabo kimwe ku bana barenga babiri ucika.”

Akomeza avuga ko no kwandikira Dipolome mu Rwanda nabyo ari byiza kuko bitazongera kuzajya bitinza dipolome z’abana bitumen babasha gukora gahunda zabo neza kuko hari n’ababa bashaka guhita bakomeza amashuri yabo mu gihe babonye Buruse zo hanze.

Umwanditsi:

Rutayisire Emile

Tanga Igitekerezo

Email yanyu ntigaragazwa ku rubuga. Amazina na Email ni ngombwa.