20°C , Mostly cloudy | Kigali-Rwanda

RDRC itegurira ababaye abasirikare kuba Abanyarwanda b’intangarugero

Yanditswe na admin

Ku ya Nov 23, 2017 saa 11:56

Komisiyo y’Igihugu yo gusezerera no gusubiza mu buzima busanzwe abahoze ari abasirikare (RDRC) yashyize imbaraga mu guharanira ko abahoze ari abasirikare baba Abanyarwanda bashoboye, bafite imbaraga, uburere  n’ubwenge, kugira ngo bajyane n’umuvuduko w’iterambere ry’igihugu ari inararibonye n’intangarugero mu byo bakora byose.

Amazu yubakirwa abavuye kurugerero mu bice bitandukanye byi gihugu

Mu kiganiro Umuyobozi wa RDRC Mukantabana Séraphine yagiranye n’Imvaho Nshya, yashimangiye ko abahoze ari abasirikare n’abahoze mu mitwe yitwara gisirikare ari andi maboko yunganira iterambere agomba guhabwa agaciro gakomeye.

Yagize ati “Dushaka ko abantu bahoze mu gisirikare bagira ubuzima buzira umuze kugira ngo bashobore kugeza igihugu ku majyambere arambye, bagire ubukire, amahoro n’umutekano.”

RDRC yatangiye mu mwaka wa 1997 hagabanywa abari mu ngabo z’u Rwanda (RDF), mu 2001 hakurikiraho gusezerera abavuye mu mitwe ikorera mu mashyamba ya Repubulika Iharanira Demokarasi ya Congo n’ahandi.

Mu myaka 17 ishize abahoze mu mitwe yitwaje intwaro bafashijwe gusubira mu muryango nyarwanda bararenga ibihumbi 11 bakiriwe mu byiciro 60. Iyo uteranyijeho n’abahoze mu ngabo zabohoye igihugu (RPA), abasezerewe mu ngabo z’igihugu RDF, abahoze ari abasirikare ba FAR (Ex-FAR) bose basubijwe mu buzima busanzwe bagera ku 69,421.

Abatahuka bava mu mashyamba ya Congo mu masomo Ii Mutobo

Abavuye mu mashyamba bafashwa mu buryo butandukanye kuko hari abatahuka ari bakuru bakanyura mu kigo cya Mutobo giherereye mu karere ka Musanze, ababakomokaho bagafashwa mu buryo bwihariye.

Abana batarageza ku myaka 18 bahoze bakorana n’izo nyeshyamba bakirirwa mu kigo cyabugenewe giherereye mu murenge wa Muhoza, Akarere ka Musanze bakabanza kumvwa ku bibazo byabahungabanyije.

Iyo bamaze kumvwa bitabwaho bagafashwa kwakira no kwirengagiza ibyo bahuye na byo abashoboye gusubira mu ishuri bisanzwe bagahabwa ayo mahirwe, abandi bakigishwa imyuga n’ubumenyi ngiro.

Abibumbiye mu makoperative bageze kure mu iterambere

Uretse abahisemo kwikorera ku giti cyabo, bamwe mu bibumbiye mu makoperative barashimira uburyo RDRC yayabaye hafi kuva bagitangira none ubu bakaba bageze ku rwego ruhimishije.

Kajebukeye Maimuna Perezidante wa Koperative Tuzamurane

Kajebukeye Maimuna Perezidante wa Koperative Tuzamurane igizwe n’abanyamuryango barenga 20, ikaba ikorera amasabune yo kumesa n’ay’amazi (Savon Liquide) mu karere ka Rwamagana, yemeza ko RDRC yababaye hafi mu rugendo rwo kwiteza imbere.

Yagize ati “Ikintu cya mbere RDRC yadukoreye ni uko yabanje kuduha amahugurwa kuko mu mudugudu w’abamugariye ku rugamba (ku Muyumbu) nta muntu utarabihuguriwemo. Yatwubakiye amazu dukoreramo kandi ikomeza kudukurikirana iduha inama.”

Mbabazi Norah Perezidante wa Koperative Umuhoza ihuje abagore basezerewe mu gisirikare n’abagore b’abagabo bahoze mu ngabo, yemeza ko bavuye mu bwigunge.

Iyi koperative ikorera mu karere ka Kicukiro igizwe n’abanyamuryango 13, ikaba yaratangiye ari itsinda ariko iza kunganirwa na RDRC kugeza ubwo ibaye koperative idoda imyenda, kuyihindura amabara no gushyiraho amafoto n’ibindi

Mbabazi ati “RDRC yadushakiye abaduteye inkunga y’amafaranga y’u Rwada miliyoni,tuguramo imashini zo kudoda, ubushobozi bwo kugura imyenda, gushaka abarimu bigisha ibijyanye n’ubudozi, noneho dukora  na ‘salon’ y’imisatsi. Ubu twatangiye kuboha imipira y’imbeho y’abanyeshuri n’imipira isanzwe dukoresheje intoki, no guhindura imyenda amabara.”

Mbabazi Norah Perezidante wa Koperative Umuhoza

Ikigo cya Mutobo kirategurirwa kuba icyitegererezo

Mukantabana ashimangira ko mu guharanira ko abahoze ari abasirikare baba intangarugero mu byo bakora, hari gahunda bagenerwa zirimo kubatoza gukunda igihugu no kubumbatira umutekano wacyo bagamije kugera ku majyambere arambye.

Uwamugariye ku rugamba mugikorwa cyo kwita ku inka za kooparative abamo mu karere ka kicyukiro.

Bigishwa uburere mboneragihugu na mboneza muco bibafasha kubana neza n’imiryango y’abasivili basanga. Bigishwa kandi imyuga n’ubukorikori bakanahurizwa mu makopperative mu kwiteza imbere no guteza imbere igihugu cyabo.

RDRC irateganya ko Ikigo cya Mutobo cyakira abahoze mu mitwe yitwaje intwaro n’indi yitwara gisirikare cyavugururwa kikaba icy’icyicyitegererezo (Excellence) kugira ngo abari mu mashyamba n’abamaze gutahuka bagurirwe amahirwe y’ubumenyi.

Mukantabana ati “Turateganya ko Mutobo haba Ikigo cy’Icyitegererezo (Center of Excellence). Nukenera umuntu uzi umwuga kandi ushoboye, uhere ku wavuye i Mutobo.  Turi kuvugana na WDA na Banki y’Isi kugira ngo baduhe ubushobozi buhagije bariya bantu tubigishe imyuga ku buryo icyo bakoze utagira irari ryo kujya kugura ahandi.”

Iyi gahunda ngo inajyanye no gushimangira agaciro k’ibikorerwa mu Rwanda kuko abahawe ubumenyi bazashyira ibicuruzwa byinshi ku isoko ry’u Rwanda no ku rwego mpuzamahanga.

Abakiri mu mashyamba bahabwa amakuru bibonera

RDRC ikoresha uburyo bunyuranye bwo gushikshikariza abakiri mu mashyamba gutahuka burimo ikiganiro “ISANGE MU BANYU gihita kuri Radiyo Rwanda buri wa Kabiri guhera saa kumi n’ebyiri n’igice za nimugoroba (18:30) kugeza saa moya (19:00) gikangurira abakiri mu mashyamba gutahuka.

Iki kiganiro cyumvwa na benshi kuko Radiyo Rwanda irumvikana cyane mu mashyamba ya Repubulika iharanira Demokarasi ya Congo no mu bindi bihugu by’abaturanyi.

Hanakoreshwa imbuga nkoranyambaga nka za Whatsapp, Twitter, Facebook n’izindi, ariko by’umwihariko Skype ifasha kuganira imbonankubone abafite ibibazo n’amakenga bakahava bayashize.

Mukantabana yagize ati “Nabonye aho dutangiriye gukoresha Skype byaragize akamaro kuko barushaho kumva, cyane cyane ko tuzana n’abatahutse mbere yabo bakabaganiriza. Mbere baravugaga bati ‘uriya watahutse mbere mwumvise ntabwo ari we, ni ijwi rye bafashe baramwishe. Ubu rero iki kinyoma cyabo cyaratahuwe kuko ubu tuzana wa muntu akabaganiriza bamureba.”

Ubu ni uburyo bwa Skype bwifashishijwe muri iki kiganiro hagati ya RDRC n’impunzi ziri muri Kongo

Abatahuka na bo bahabwa uburyo bw’itumanaho bakavugana na bagenzi babo basize mu mashyamba bigatuma abahamagawe n’inshuti zabo bishimira gutahuka ntacyo bishisha.

RDRC inakorana n’imiryango mpuzamahanga n’Ingabo ziri mu butumwa bwa Loni mu Burasirazuba bwa Repubulika Iharanira Demokarasi ya Congo (MONUSCO) mu gutanga amakuru no kumenya uko Abanyarwanda babayeho mu mashyamba.

Itumanaho rikoreshwa ririzewe uretse imbogamizi nke zirimo umurongo wa internet udakora neza, n’abayobozi baba badashaka gutahuka. Mukantabana ati “Ubona kenshi ba bandi basa n’aho bafite ubudahangarwa muri ririya shyamba, bo ntabwo baza kuri Skype. Bohereza abagore n’abana n’abandi bantu boroheje.”

Ubuyobozi bwa RDRC burashishikariza abakiri mu mashyamba gutahuka hakiri kare kuko abageze mu Rwanda babayeho neza ku buryo barenze kuri bamwe mu bo basanze mu gihugu.

Abasubizwa mu buzima busanzwe bose bafashwa kwiga imyuga n’ubumenyi ngiro, kwiga guhinga no korora kijyambere, kwibumbira mu makoperative, ikoranabuhanga no gukunda igihugu.

Basobanurirwa gahunda za Leta zibafasha kwiteza imbere, bagashyirwa mu byiciro by’ubudehe, abatishoboye bagahabwa ubufasha bwose bugenerwa abatishoboye burimo Girinka, gahunda ya NEP Kora Wigire  n’izindi.