24°C , Intermittent clouds | Kigali-Rwanda
Aba baturage ba RDC bagaragazaga ko bashyigikiye Perezida Félix Tshisekedi ku wa 24 Mutarama 2019 umunsi arahira i Kinshasa (Foto AFP)

RDC: Perezida Félix Tshisekedi mu rugendo rutoroshye

Yanditswe na Kayira Etienne

Ku ya 31-01-2019 saa 09:50:36

Perezida Félix Antoine Tshisekedi Tshilombo wa Repubulika Iharanira Demokarasi ya Kongo (RDC), yatangiye urugendo rutoroshye rwo kuyobora igihugu kimaze imyaka myinshi mu bibazo by’inzitane.

Nyuma y’umuhango wo gushyikirizwa inshingano z’Umukuru w’Igihugu ku wa 24 Mutarama 2019, Perezida mushya yatangiye guhura n’ibibazo bijyanye ahanini n’imibereho y’abenegihugu agomba kubonera umuti uko byagenda kose kugira ngo bakunde bizere ko aje ari igisubizo ugereranyije n’abamubanjirije kuyobora Kongo.

Radio Mpuzamahanga y’u Bufaransa RFI, itangaza ko ku wa 27 Mutarama, iminsi itatu nyuma yo guhabwa inshingazo za Perezida, Félix Tshisekedi yakiriye inkuru y’uko abanyeshuri bo muri Kaminuza ya Lubumbashi (UNILU) bigaragambije polisi ngo irasa 3 muri bo bahita bapfa.

Bamwe mu banyehsuri bigaragambije muri Kaminuza ya Lubumbashi bahasiga ubuzima

Abo banyeshuri bo muri Kaminuza yo mu cyahoze ari Intara ya Katanga, ngo bigaragambije kubera ibura ry’umuriro w’amashanyarazi n’amazi no kubera ibiciro bihanitse by’amafaranga basabwa mu kwiga ndetse n’ayo batanga mu modoka rusange zitwara abagenzi mu mugi wa Lubumbashi.

RFI iti «Perezida Félix Tshisekedi, yagombaga gutanga umurongo icyo kibazo gikemurirwamo nta kuzuyaza. Ku mugoroba w’uwo munsi, Vital Kamerhe, Umuyobozi w’Ibiro by’Umukuru w’Igihugu yatangaje ko Minisitiri ufite mu nshingano amashuri makuru na za kaminuza agomba kuzisobanura kuri ibyo bibazo byateje imyigaragambo, kandi ko ibyemezo byo kongera ibiciro by’amafaranga asabwa abiga biteshejwe agaciro.»

Ku wa Kabiri 29 Mutarama, mu Murwa Mukuru Kinshasa abatwara imodoka zitwara abagenzi bo muri Sosiyete «Transco» bazindukiye mu myigaragambyo, banga gukora akazi ngo kubera ko batabaha ibirarane by’umushahara wabo bamaze igihe bishyuza ntibasubizwe.

Radio Okapi iti «Mu rwego rwo gukemura iki kibazo, ku gicamunsi cyo kuri uwo wa Kabiri Vital Kamerhe n’Abaminisitiri uw’Imari n’uwa budget bahise bajya kuganira n’ubuyobozi bwa sosiyete Transco. Nyuma y’uwo mubonano, Perezidansi yatangaje ko imishahara y’abo bashoferi igomba gutegurwa bakishyurwa akazi bakoze.»

Abatwara imodoka muri iyo sosiyete ngo barishimye bemeza ko guhera ahari ejo hashize ku wa Gatatu basubira mu kazi kabo kubera ikizere bahawe na Perezida.

Kuri iki kibazo k’ibura ry’amazi n’amashanyarazi muri UNILU (Université de Lubumbashi), nk’uko bitangazwa na Radio Okapi, ejo ku wa 30 Mutarama Perezidansi ya Repubulika yohereje itsinda ry’impuguke mu by’amazi n’amashanyarazi kugira ngo bazaveyo bakiboneye igisubizo kirambye.

Minisiteri y’Ubutegetsi bw’Igihugu nanone, yohereje i Lubumbashi inzobere z’abapolisi kujya gucukumbura icyatumye hapfa abanyeshuri 2 bo muri kaminuza n’umwana umwe wo mu yisumbuye ndetse n’umupolisi kugira ngo ababyitwayemo nabi bazabiryozwe hisunzwe ubutabera.

Ibibazo byose bivuzwe hejuru n’uburyo hashakwa umuti wabyo bidatinze, bigaragaza ko Perezida mushya wa RDC yatangiye urugendo rutamworoheye kuko hari n’ibyemezo bimwe yafashe ariko hakaba hari ababyitambika kubera ko atagishije inama cyangwa bidashimishije abasanzwe bakora muri urwo rwego rwa Leta.

Aba baturage ba RDC bagaragazaga ko bashyigikiye Perezida Félix Tshisekedi ku wa 24 Mutarama 2019 umunsi arahira i Kinshasa (Foto AFP)

TANGA IGITEKEREZO

One Comment on “RDC: Perezida Félix Tshisekedi mu rugendo rutoroshye”

  1. Uyu ni ukumusengera kuko ikigaragara bazamunaniza. MU badepite babarirwa muri 500 ishyaka rya Kabila ryihariye abagera muri 350. Kuba president udafite majorite’ muri parlement biragora kuyobora. Kabila azamuyoboreramo ikigaragara.

Leave a Reply

Your email address will not be published. Required fields are marked *