20°C , Partly cloudy | Kigali-Rwanda

RDC: Mu mezi abiri ashize, abaturage ibihumbi 100 bavuye mu byabo

Yanditswe na Kayira Etienne

Ku ya 12-02-2020 saa 15:41:45
Aba ni abaturage bo mu gace ka Djugu bari mu nkambi iri hafi y'ibitaro bikuru bya Bunia mu 2018 (Foto Radio Okapi)

Ishami ry’Umuryango w’Abibumbye rishinzwe impunzi HCR, ritangaza ko rihangayikishijwe n’umutekano muke ukomeje kubera muri Teritwari ya Beni, mu Burasirazuba bwa Repubulika Iharanira Demokarasi ya Congo (RDC).

Impungenge z’iri shami rya Loni, ni ukubona uburyo mu mezi abiri ashize abaturage b’Abasivire basaga ibihumbi 100 bahunga bava mu byabo kubera ubwicanyi bamaze imyaka itari mike bakorerwa n’imitwe inyuranye y’inyeshyamba.

Ibi byatangajwe na Andrej Mahecic, umuvugizi w’Ishami ry’Umuryango w’Abibumbye ryita ku mpunzi mu kiganiro yagiranye n’abanyamakuru ku wa 11 Gashyantare 2020, ku kicaro gikuru cya Loni kiri i Genève mu Buswisi.

Ati «Ibitero imitwe y’inyeshyamba yagabye ku benegihugu bo mu midugudu n’imigi ibarizwa mu butware bw’i Watalinga, hafi y’umupaka wa Uganda na RDC mu kwezi k’Ukuboza, byatumye ibihumbi n’ibihumbi by’abana, abagore n’abagabo bahunga bata ibyabo berekeza mu mujyi wa Nobili no mu nkengero zawo».

Ubuyobozi bwa HCR bumenyesha ko biteye agahinda kubona ngo abaturage bo mu Ntara ya Kivu y’Amajyaruguru muri rusange, n’abo muri Teritwari ya Beni by’umwihariko mu burasirazuba bwa Repubulika Iharanira Demokarasi ya Congo babayeho mu buzima bwo kwicwa no guhora bahunga iwabo kandi hari ubutegetsi bugomba kubacungira umutekano.

Mahecic ati «Ikibabaje cyane ni uko abo baturage basaga 100 000 bo muri Beni no mu bice bindi byo muri Kivu y’Amajyarugu, bongeye guhunga bari bamaze igihe gito bagarutse iwabo bibwiye ko umutekano wagarutse. Bahunze muri Mata 2019, mu Gushyingo barahunguka. Bakimara kuhagera abitwaje intwaro n’inyeshyamba za ADF zikomoka Uganda, zabagabyeho ibitero zibicamo abagera kuri 252 nkuko twabimenyeshejwe n’abayobozi bo mu nzego z’ibanze».

Izo mpunzi ngo zabwiye HCR ko n’aho ziri mu nkambi zo mu gihugu imbere ngo bafite ubwoba bw’uko bagabwaho ibitero bikabarimbura bibasanze ahantu hamwe.

Muri icyo kiganiro n’Abanyamakuru, nkuko byemejwe na Radio Okapi ku wa 12 Gashyantare 2020, Andrej Mahecic yamenyesheje ko abo banyekongo bahunze mu byabo i Beni no mu nkengero zayo, ngo babayeho mu buzima bubi mu tuzu tw’ibyatsi bigondagondeye bonyine.

Ati «Umutekano wabo ushobora guhungabana igihe icyo ari cyo cyose. Abahunze ngo bagwiriyemo abagore n’abana bakeneye kwitabwaho kimwe n’izindi mpunzi zose. Bakeneye aho gukinga umusaya hakozwe neza, hari ibiribwa, amazi meza, ubuvuzi, isuku ndetse no kwigisha abana babo kuko biri mu burenganzira bw’ibanze bwa muntu».

Ishami ry’Umuryango w’Abibumbye ryita ku mpunzi HCR, rimenyesha ko muri RDC hari impunzi z’imbere mu gihugu zisagaho gato miriyoni 5. Uyu mubare ngo uruta cyane uw’impunzi zindi zibarizwa ku mugabane w’Afurika. Abakozi b’iri shami rya Loni bari mu Ntara ya Kivu y’Amajyaruguru, muri Kivu y’Amajyepfo, muri Tanganyika muri Katanga ndetse no muri Ituri.

Muri ibyo bice byose bya Kongo-Kinshasa, HCR ngo igerageza gufasha Abanyekongo bahunga umutekano muke umunsi ku munsi. Nibura HCR ngo ikeneye miriyoni 150 z’amadorari y’Amerika kugira ngo ibashe kugoboka izo mpunzi zo mu gihugu imbere. Kuri ubu iri shami ngo rifite amafaranga angana na 4% by’akenewe yose.

Umwanditsi:

Kayira Etienne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.