22°C , Partly sunny | Kigali-Rwanda

RDB yiteguye guhanga imirimo 30.000 mu myaka 5 mu bukerarugendo

Yanditswe na Sezibera Anselme

Ku ya 30-09-2019 saa 03:52:28
Umuyobozi ushinzwe ubukerarugendo mu Rwanda Kariza Belise iburyo hamwe na Rica Rwigamba umuyobozi wa Mastercastercard mu Rwanda biyemeza ubufatanye (Foto RDB)

Ubuyobozi bw’Urwego rw’Igihugu rw’Iterambere (RDB) buragaragaza ko bwiteguye guhanga imirimo 30.000 kagenewe urubyiruko by’umwihariko mu birebana n’ubukerarugendo kugira ngo bashobore guhaza isoko rikomeza kugenda rizamuka.

Byatangarijwe mu muhango wo kwizihiza umunsi Mpuzamahanga wahariwe ubukerarugendo ku Isi hose witabiriwe n’inzego zitandukanye za Leta n’abafatanyabikorwa ba Leta hamwe n’abikorera ku giti cyabo hagaragazwa ibimaze kugerwaho mu rwego rwo guteza imbere urubyiruko mu bigendanye n’ubukerarugendo.

Umuyobozi w’ishami rishinzwe ubukerarugendo muri RDB Kariza Belise, avuga ko ubukerarugendo ari urwego rukomeye cyane mu Rwanda kuko rubasha kwinjiza amadovize akaba ari narwo rwa mbere ku rutonde rw’ibyinjiza amadovize menshi. Intego mu gutanga akazi, ni uko mu myaka itanu hazaba hahanzwe imirimo ibihumbi 30 mu bukerarugendo.

Kariza agira ati: “Ubukerarugendo bugeze ku rwego rwo gutanga umusanzu usaga 100.000 by’imirimo kandi dushaka ko bikomeza kwiyongera, hari ibikorwa byinshi birimo gukorwa byerekeranye n’ubukerarugendo twifuza ko hashyirwamo imbaraga nyinshi mu gutanga akazi kuko abari ku isoko ari benshi bagakeneye, bisobanuye ko hari ubufatanye busabwa hagati ya Guverinoma n’abafatanyabikorwa.”

Avuga ko kugira ngo gukomera k’urwego rw’ubukerarugendo bigerweho byagizwemo uruhare na Guverinoma ku bufatanye n’abandi bafatanyabikorwa haba ari mu rwego rwo guteza imbere ibikorwa by’ubukerarugendo, guteza imbere amahoteri, kuko ibyo byose byagiye bibasha guhanga akazi ku bantu benshi no kubyazwa amafaranga.

Kariza avuga ko nubwo hari ibyagiye bigerwaho hari n’ahagaragaye ibyuho birimo umubare muto w’ababurimo ndetse n’ubumenyi butaragera aheza bw’ibyo bashoboye gukora.

Mu mwaka wa 2017 u Rwanda rwatangiye kugendera kuri Gahunda ya Guverinoma y’Imyaka irindwi, imwe mu ntego ni uguhanga imirimo mishya ibyara inyungu Miliyoni imwe n’ibihumbi 500 muri iyo myaka irindwi, ni ukuvuga imirimo ibihumbi 214 buri mwaka.

Kimwe mu byitezweho koroshya ihangwa ry’iyo mirimo, ni uguteza imbere amashuri y’ubumenyingiro, umubare w’abiga imyuga ukazamuka, kuko Leta yizera ko imyuga ifasha umuntu kwihangira imirimo mu buryo bworoshye, ndetse bikanatuma igihugu kibasha kubaka ubukungu bushingiye ku bumenyi nk’uko cyabyiyemeje.

Umuyobozi w’ishuri Rikuru ry’Ubumenyingiro rya Rwanda Polytechnic Dr. Gashumba James, avuga ko abantu bakwiye gutoza abana babo kurangwa n’umuco wo kwiga kandi bakanatozwa gukora badasuzugura imirimo bita ko iciriritse. Ni muri urwo rwego avuga ko hariho gahunda yo kwigisha urubyiruko gukunda akazi bagashishikarizwa gukunda imyuga bagakora akazi neza bakakanoza.

Ibyo bizanashimangirwa ku bukangurambaga bw’amezi 12 ateganywa gukorwa mu mashuri ya TVET bagafashwa guhindura imyumvire bafite. Atanga urugero rwo mu gihugu cy’u Busuwisi aho urubyiruko rugera kuri 80% usanga rugana mu mashuri y’imyuga n’ubumenyingiro kandi bakaba ari byo bakoramo barangije.

Dr. Gashumba akomeza avuga ko hariho na gahunda yo kurangiza kubaka ishuri rya ‘Hospitality Management Institute’ vuba rizajya rifasha abakora n’abize muri urwo rwego rw’ubukerarugendo.

Agira ati: “Nta bwo dushaka abantu biga bagenda bahabwa impamyabumenyi gusa, niyige arangize age gukora hanyuma yongere akomeze mu ishuri gutyo gutyo bizamufasha kugira ubumenyi kuko azajya aba afite ibyo yavanye aho yakoraga. Iryo shuri ntirizajya ryigamo abafite impamyabushobozi gusa ahubwo rizajya rinajyamo abafite uburambe bw’imyaka igera kuri 3 akora hanyuma ahabwe amahirwe yo kuzamura ikiciro k’imyigire.”

Dr. Gashumba avuga ko kugeza ubu umubare w’abakobwa n’abahungu mu biga ibigendanye n’ubukerarugendo ujya kungana ariko abakobwa bakajya kuba benshi.

Muri Gahunda ya Guverinoma y’Imyaka irindwi izwi nka NST1 (2017-2024), biteganyijwe ko mu mwaka wa 2024 u Rwanda ruzaba rwinjiza miriyoni y’amadorari 800 ruvuye kuri miriyoni 404 z’amadorari rwariho muri 2017.

Umwanditsi:

Sezibera Anselme

Tanga Igitekerezo

Email yanyu ntigaragazwa ku rubuga. Amazina na Email ni ngombwa.