22°C , Partly sunny | Kigali-Rwanda

RDB: Nta mukerarugendo wasubitse gahunda kubera cya gitero cyo mu Kinigi

Yanditswe na Mutungirehe Samuel

Ku ya 09-10-2019 saa 17:25:44
Umuyobozi mukuru wa RDB, Akamanzi Clare yaganiriye na ba mukerarugendo mbere y'uko bajya gusura ingagi mu gitondo cyo kuwa gatatu, bamubwira uko bishimiye gusura ingagi zo mu Rwanda

Umuyobozi Mukuru w’Urwego rw’Igihugu rw’Iterambere RDB, Akamanzi Clare, yatangaje ko nyuma y’uko abagizi ba nabi bateje umutekano muke mu gace ka Kinigi k’ibirunga gakorerwamo ubukerarugendo mu karere Musanze, abakerarugendo basobanuriwe ibyabaye n’uko inzego z’umutekano zibungabunze umutekano kugeza ubu nta mukerarugendo wigeze asubika gahunda yo gusura ingagi.

Yabitangaje ubwo mu gitondo cyo kuri uyu wa Gatatu tariki ya 09 Ukwakira 2019 yari amaze kuganira na ba mukerarugendo bagera ku 127 baturutse mu bihugu bitandukanye byo ku Isi nka Australia, Leta Zunze Ubumwe z’Amerika n’ahandi, bazindukiye gusura ingagi zo mu birunga.

Akamanzi Clare, Guverineri Gatabazi n’abahagarariye inzego z’umutekano bagize umwanya wo kuganira n’abafite hotel zicumbikira ba mukerarugendo i Musanze baganira ku buryo umutekano wabo wizewe n’uko nta cyahungabanyije ibikorwa by’ubukerarugendo mu minsi yakurikiye ikibazo cyabaye mu Kinigi

Akamanzi yababwiye ko umutekano wa ba mukerarugendo ari wo wa mbere mu gihugu, anabasobanurira ibyabaye mu minsi ine ishize ubwo abanzi b’Igihugu bageragezaga guhungabanya umutekano uko byagenze, aho baturutse muri mashyamba ya Repubulika Iharanira Demokarasi ya Congo, n’uko inzego z’umutekano ku bufatanye n’abaturage zahise zikemura ikibazo mu buryo bwihuse, abasaba kuryoherwa n’uruzinduko rwabo mu Rwanda mu rwego rwo kugera ku nzozi zabazanye.

Yabwiye itangazamakuru ko nubwo ibyo byabaye, ariko nta mukerarugendo n’umwe wigeze asubika gahunda yo gusura ingagi, ko ubwitabire bw’abasura ingagi bukomeje kuzamuka, ku buryo mu minsi ine ishize abarenga 600 basuye ingagi n’ubu bakiza.

Akamanzi akomeza agira ati “Ni yo mpamvu ndi hano nange, kugira ngo nizeze ba mukerarugendo ko turi Igihugu gitekanye, ibikorwa mu bukerarugendo birakomeje nk’ibisanzwe; dufite abakerarugendo barenga 600 baje mu gihugu cyacu mu minsi ine ishize kandi ndatekereza ko nubwo ibyo byabaye mu Kinigi ikizere kiracyari mu bakerarugendo no mu baturage bitewe n’inzego z’umutekano zatabaye vuba bwangu, kandi bagerageza gutanga amakuru ku baturage ku byabaye kandi ndumva ari yo mpamvu nta mukerarugendo wigeze asubika gahunda kuko bizeye ko nubwo byabaye inzego zacu z’umutekano n’Igihugu bashyize imbere umutekano mu buryo bwihuse kandi ni ikintu twishimira nk’Igihugu kiri imbere mu bukerarugendo.”

Bamwe muri ba mukerarugendo baganiriye n’itangazamakuru, bahamije ko umutekano wabo bawizeye kuko nta kintu na kimwe kigeze kibahungabanya kandi baje mu Rwanda kuko basanzwe bumva ko ari Igihugu cy’ubukerarugendo gifite umutekano wizewe.

Dr. Lisa Hirian waturutse muri Leta zunze Ubumwe z’Amerika, yagize ati “Nageze mu Rwanda ku cyumweru nijoro nguma i Kigali, ubu naje kureba ingagi, mfite umutekano uhagije, maze n’iminsi muri Kigali umugi utekanye ku Isi. Meze neza ahantu hose ndi kunyura dusura.”

Jill Spink waturutse muri Australia yagize ati “Dufite umutekano uhagije, twavuye ku kibuga k’indege hari umutekano mwiza twinjira muri kajugujugu itugeza hano, nta kibazo nigeze mpura nacyo kandi birashimishije kuba hano.”

Gordon Higman uyoboye abaturutse muri Amerika na we yagize ati “Nabwira abandi bakerarugendo kuza mu Rwanda. Kuva ku kibuga k’indege ni heza, buri kintu cyose ni kiza cyane kandi dufite umutekano 100%, nta kibazo na kimwe turabona cyaduhungabanya. Dukunda Iguhugu cyanyu, dukunfa abaturage kandi ikindi mufite isuku cyane, nta sashi n’imwe wabona mu gihugu, ni ibintu byiza.”

Guverineri w’Intara y’Amajyaruguru, Gatabazi Jean Marie Vianney, yabwiye itangazamakuru ko ubu nta n’umuntu wamenya ibyabaye kuko kuva uwo mugoroba wo kuwa gatanu inzego z’umutekano zakemuye ikibazo vuba na bwangu ubu abaturage bakomeje imirimo yabo y’ubuhinzi, ubworozi no kwakira abakerarugendo nk’ibisanzwe muri Kinigi na Musanze muri rusange.

Guverineri Gatabazi Jean Marie Vianney yagize umwanya wo kwishimana na ba mukerarugendo bazindukiye gusura ingagi mu birunga (Foto RDB)

Nyuma yo gusuhuza no kuganira na ba mukerarugendo bagiye gusura ingagi, Umuyobozi mukuru wa RDB Akamanzi Clare, abahagarariye inzego z’umutekano za gisirikare na polisi n’inzego z’ibanze, baganiriye na ba nyiri amahoteri bakira ba mukeratugendo babatangariza ko nabo nta kibazo byigeze bitera ba mukerarugendo kuri uwo munsi na bukeye kuko hari na benshi batagize icyo bumva kuko inzego z’umutekano zakemuye ikibazo mu maguru mashya, abakerarugendo babyuka bakomeza ibikorwa byabo nk’ibisanzwe mu birunga basura ingagi.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.