20°C , Mostly cloudy with thunderstorms | Kigali-Rwanda

RCA yagaruje miliyoni 84 yanyerejwe mu makoperative y’abamotari

Yanditswe na TWAGIRA WILSON

Ku ya Aug 20, 2018

Ubuyobozi bw’Ikigo k’Igihugu cy’Amakoperative mu Rwanda bwatangaje ko muri miliyoni 205 yanyerejwe mu makoperative y’abamotari agera kuri miliyoni 84 ubu yamaze kugaruzwa ku bufatanye n’Inzego z’ubutabera.

Umuyobozi w’Ikigo cy’Igihugu gishinzwe guteza imbere Amakoperative, Harerimana Jean Bosco

Umuyobozi wa RCA, Prof. Harerimana Jean Bosco, avuga ko kugeza ubu igenzura rimaze gukorwa n’Ikigo ayobora ryagaragaje ko nubwo hari amafaranga yanyerejwe atari make, hari n’izindi ngamba zo kuyagaruza ku bufatanye n’inzego z’ubutabera.

Ati: “Tumaze gufata abantu bagera kuri 72 kubera imicungire mibi bavugwaho kugira ngo babibazwe n’inzego zibishinzwe. Kugeza ubu muri miliyoni 205 zanyerejwe mu makoperative y’abamotari, igenzura ryerekanye ko tumaze kugaruza agera kuri miliyoni 84  z’amafaranga y’u Rwanda, kuko bituma abanyamuryango bakomeza kugirira ikizere koperative zabo”.

Naho ku micungire ya koperative mu zindi nzego, Prof. Harerimana Jean Bosco avuga ko igenzura rigiye gukomeza gukorwa no mu zindi koperative zo mu buhinzi n’ubworozi, ibi bizakomeza gushyirwamo imbaraga  hagamijwe gufasha no kurinda ko umutungo w’abanyamuryango utakomeza kuhangirikira, ahubwo ugafatwa neza, bakagirira ikizere amakoperative yabo.

Yavuze ko ku bufatanye n’Urwego rw’igihugu rufite mu nshingano ubugenzacyaha, uru rwego rwakomeje kwakira amadosiye y’abanyereza umutungo w’abanyamuryango b’amakoperative mu Rwanda, kandi ngo bikaba birimo gutanga umusaruro utanga ikizere ku bagize amakoperative y’abamotari, n’ayandi mu gihugu.

Prof. Harerimana Jean Bosco, Umuyobozi mukuru w’Ikigo cy’Amakoperative mu Rwanda, akaba yizeza abanyamuryango b’amakoperative ko ingamba zafashwe mu rwego rwo kurinda umutungo w’abanyamuryango kandi ugafatwa neza.