17°C , Partly sunny | Kigali-Rwanda
Ubanza iburyo ni Umuyobozi Mukuru wa RBC Dr. Jeanine Condo n'Umuyobozi wungirije, James Kamanzi bari imbere ya PAC (Foto Gisubizo G)

RBC yashimiwe kwivugurura mu gukoresha neza imari ya Leta

Yanditswe na MUTUNGIREHE SAMUEL

Ku ya 12-06-2018 saa 08:15:45

Ubuyozi bw’ikigo k’igihugu cy’ubuzima RBC, bwitabye Komisiyo ishinzwe gukurikirana imikoreshereze y’imari ya Leta mu Nteko Ishinga Amategeko (PAC), bashimirwa bimwe mu byo bakosoye muri raporo y’Umugenzuzi w’Imari ya Leta y’umwaka wa 2015-16, kuko hari byinshi bitagarutse nk’amakosa mu mikoreshereze y’imari nk’uko byajyaga bigarukwaho igihe cyose bitabaga PAC.

Ubanza iburyo ni Umuyobozi Mukuru wa RBC Dr. Jeanine Condo n’Umuyobozi wungirije, James Kamanzi bari imbere ya PAC (Foto Gisubizo G)

Perezida wa PAC, Nkusi Juvenal, yagaragarije ubuyobozi bw’ikigo RBC bimwe mu bibazo bikiri mu bikorwa bikoreshwa amafaranga y’ingengo y’imari bagenerwa, ahanini na byo bishingiye mu guhuza k’ubuyobozi bwabo na Minisiteri y’Ubuzima ibashyiriraho umurongo bagenderaho na bo bagashyira mu bikorwa ibyo igihugu kiyemeje.

Muri ibyo bibazo birimo ibikoresho bimwe byaguzwe, biguriwe ibitaro byarangiza bagasanga bigomba kujyanwa ku bindi bitaro ariko icyo byaguriwe cyo bigakoreshwa mu guha serivise z’ubuzima Abanyarwanda.

Nta kibazo k’imiti idakoreshwa cyongeye kumvikana muri raporo y’Umugenzuzi w’Imari ya Leta yaganiriweho n’ubuyobozi bw’ikigo RBC mu rwego rw’ubuvuzi.

Komisiyo ya PAC iyobowe na Nkusi Juvenal yagaragarije RBC ko hakiri aho bari kubaka inzu ababyeyi babyariramo, ku bitaro bya Rwamagana ariko itararangira kandi igihe cyarageze, bisobanurwa ko habayemo ikibazo cya rwiyemezamirimo wabagoye, kandi na Minisiteri zombi, iy’Ubuzima n’iy’Imari n’Igenamigambi babizi kuko umunsi ku munsi bagishakira igisubizo kugira ngo ababyeyi babone serivisi zigezweho kuko umushinga ugeze kuri 98% urangira.

Depite Nkusi ati “Tubashimiye ko nibura muri mu badafite ibibazo mu gukoresha nabi imari ya Leta (clean audit), muri mu bigo bya Leta bicunzwe, mushyira imbaraga mu kugirwa inama, ariko hakaba hari biriya bibazo bijyanye n’imikorere, mushobora kongera mukamenya gutondeka imibare mujyana n’amategeko”.

Umuyobozi Mukuru w’ikigo RBC, Dr. Jeanine Condo yabwiye itangazamakuru ko RBC kimwe n’ibindi bigo bya Leta bagize ibibazo byinshi bijyanye no gushyira ibintu ku murongo, ariko hari ingamba bafashe kugira ngo batongera gukoresha nabi imari ya Leta bagenerwa.

Ati “Uko twabigenje, twegereye abayobozi, Umugenzuzi Mukuru n’abandi baduha inama y’uko twagombye gukora. Ibyo twakoze ni ibintu byoroshye cyane, ni ugukorera hamwe, tukagira intego imwe, turangije dushyiraho uko twisuzuma, hari ibintu byinshi byagiyeho, ubu ni byo uyu munsi byatumye tuva mu bagirwa inama.

Turashimira inzego zose na Minisiteri y’Ubuzima  yadufashije kugira ngo ibintu byose bigerweho, uyu munsi mu bijyanye n’imari turi mu batarayikoresheje nabi turanizera ko umwaka utaha n’imyaka iri imbere tuzagerageza tubone raporo nzima ku micungire y’imari ya Leta kandi birashoboka”.

Dr. Condo, yakomeje avuga ko n’aho abadepite bagize PAC baberetse ko hakiri ibibazo ku bikoresho byaguzwe ntibige aho bigomba kujya n’ibikoresho byarangije manda, uyu mwaka babikosoye, ubu ibikoresho byose bikaba bitangirwa ahantu hamwe bafatanyije na Minisiteri y’Ubuzima ibakuriye.

Ati “Uyu mwaka twabonye amabwiriza aho ibikoresho byose bizajya bitangirwa ahantu hamwe; turimo gukorana na Minisiteri y’Ubuzima kugira ngo duhe ububasha uburyo bwashyizweho buzaba bubishinzwe (system), tugire ikintu kimwe gishobora kureba ibikenewe byose, aho bigeze, aho bizava n’ibitaro bikeneye ibikoresho.

Ndakeka ko sisiteme ihari kandi mu ntangiriro za Nyakanga tuzaba twabahaye ububasha, ibintu byose bizaba biri ku murongo ku buryo tuzajya tubikurikirana umunsi ku wundi n’ibikenewe hose, ndakeka ibibazo bizagenda bikemuka buhoro buhoro”.

Yijeje ko mu myaka iri imbere RBC bazakora uko bashoboye kugira ngo batagaruka muri PAC, keretse nibakenerwa kugira ngo babashimire cyangwa kugira ngo bagire ibindi bakemura.

 

TANGA IGITEKEREZO

Leave a Reply

Your email address will not be published. Required fields are marked *