RBC: Abafite ibibazo byo mu mutwe, 4% ni bo bagana amavuriro

Yanditswe na Mutungirehe Samuel

Ku ya 19-10-2019 saa 08:51:04
Misago Claire Nansi ushinzwe ubuvuzi bw'ibanze ku bafite ibibazo byo mu mutwe yavuze ko hakenewe kongera ubukangurambaga bwo gusaba abantu kwisuzumisha no kwivuza kare (Foto RBC)

Ushinzwe ubuzima bwo mu mutwe ku rwego rw’ibanze mu Kigo k’Igihugu cy’Ubuzima RBC, Misago Claire Nansi, yatangaje ko mu bafite ibibazo byo mu mutwe, abagana amavuriro bakiri bake, ku kigero cya 4%, bakaba bifuza ubufatanye n’inzego zose n’Abanyarwanda kubakangurira kumenya ubuvuzi bw’indwara zo mu mutwe n’uko zifata.

Yabitangaje kuwa 18 Ukwakira 2019, ku Kigo ‘Icyizere Psychotherapeutic’ giherereye mu murenge wa Niboye mu karere ka kicukiro, ubwo Ibitaro bivura abafite ibibazo byo mu mutwe “Caraes Ndera” byafatanyaga n’abafatanyabikorwa babyo kwizihiza Umunsi Mpuzamahanga w’Ubuzima bwo mu mutwe, ku nsanganyamatsiko isaba kwita ku buzima bwo mu mutwe bw’abana n’urubyiruko.

Misago yavuze ko mu bushakashatsi buheruka Minisiteri y’Ubuzima yakoze mu 2018, yasanze mu rubyiruko ruri hagati y’imyaka 14 na 18 abagera ku 10.2% bagaragaza ibimenyetso by’uburwayi bwo mu mutwe, mu gihe mu banyarwanda muri rusange abasaga 11% babana n’agahinda gakabije, bikarushaho ku barokotse Jenoside yakorewe Abatutsi kuko abasaga 32% babana n’agahinda gakabije ku buryo bishobora no kubaganisha mu kwiyahura no kwiheba no kwigunga n’ibindi bimenyetso by’uburwayi bwo mu mutwe bukomeye.

Akomeza agira ati “Minisiteri y’Ubuzima yafashe iya mbere kugira ngo yongere imbaraga mu batanga serivisi z’ubuvuzi bw’indwara zo mu mutwe bashyirwa mu bitaro hose mu gihugu. Mu bigo nderabuzima, imiti yegerezwa serivisi z’ubuvuzi bw’izo ndwara, ishyirwa no muri serivisi zitangwa mu bitaro hirya no hino mu gihugu kuva ku rwego rw’ikigo nderabuzima kugeza ku rwego rw’igihugu, rw’ibitaro nk’ibi bya Caraes Ndera. Hashyirwamo n’imbaraga kugira ngo abantu bamenye ibimenyetso by’indwara zo mu mutwe kare kandi babashe kugana amavuriro no kwivuza kare kandi neza.”

Akomeza avuga ko nubwo ibyo byakozwe ariko hakiri ikibazo kuko abagana amavuriro bakiri bake ugereranyije n’abo ubushakashatsi bwasanganye ibibazo bitandukanye byo mu mutwe.

Ati “Abagana amavuriro baracyari bake, ni 4% by’abagaragaza ibibazo by’uburwayi bwo mu mutwe. Akaba ari nayo mpamvu tuvuga ko twifuza gufatanya n’itangazamakuru, twifuza gufatanya n’Abanyarwanda muri rusange, binyuze mu migoroba y’ababyeyi, tubinyuza mu midugudu, mu bukangurambaga, aho bishoboka hose kugira ngo Abanyarwanda bakangurirwe kumenya ubuvuzi bw’indwara zo mu mutwe, bakangurirwe kumenya ibimenyetso by’ibanze bituma babasha kugana serivisi kuko iyo umurwayi avujwe neza kare arakira.”

Ku ruhande rw’abavuwe bagakira, barimo abari barabaswe n’inzoga bagafashwa n’ikigo ‘Icyizere Psychotherapeutic’, bavuze ko umuntu wahuye n’ikibazo cyo mu mutwe avurwa nk’abandi barwayi, ariko bakongeraho ko banamufasha kwisanga mu buzima busanzwe iyo arimo gukira akabasha kugaruka afite icyo yakwimarira muri sosiyete nyarwanda.

Abavuwe indwara zo mu mutwe bakoze ihuriro ryabo, riyobowe na Iyakare Rwema Gustave, bakaba bamaze kugera ku 3972 hirya no hino mu gihugu, mu turere 17. yavuze ko bafite intego yo kurwanya akato bagirirwa na sosiyete, mu muryango n’akato umuntu warwaye mu mutwe yigirira ubwe.

Frere Nkubiri Charles, umuyobozi w’ibitaro bya Caraes Ndera, avuga ko ku munsi baba bafite abarwayi 350 mu bitaro, abaza kwisuzumisha bataha buri munsi baba barenga 170.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.