20°C , Partly sunny | Kigali-Rwanda

Rayon Sports yerekeje i Maputo muri Mozambique

Yanditswe na BIZIMANA ERIC

Ku ya 16-04-2018 saa 07:34:00

Uyu munsi ku wa Mbere tariki 16 Mata 2018, abakinnyi b’ikipe ya Rayon Sports berekeje muri Mozambique, aho bagiye gukina na Costa do Sol mu mukino wo kwishyura mu marushanwa y’Afurika y’amakipe yitwaye neza iwayo “CAF Confederation Cup”, uzaba ku  wa Gatatu tariki 18 Mata 2018.

Iyi ni yo kipe ya Rayon Sports yabanje mu kibuga mu mukino ubanza batsinzemo Costa de Sol ibitego 3-0

Rayon Sports yitwaje impamba y’ibitego 3-0 byo yatsinze mu mukino ubanza, mu gihe yaba yitwaye neza bishobora kuyihesha amahirwe kugera mu matsinda ku nshuro ya mbere mu mateka.

Biteganyijwe ko igera muri Mozambique saa saba na mirongo 45 z’amanywa baruhuke. Ejo ku wa Kabiri Rayon Sports izakorera imyitozo kuri Sitade izakiniraho ari nako yimenyereza ikirere cy’i Maputo kizwiho gushyuha kugeza kuri 35o C.

Ndayishimiye Eric Bakame, kapiteni wa Rayon Sports yavuze ko batagiye kwirara kuko n’amakipe akomeye amaze iminsi yishyurwa nyamara yari yitwaye neza mu mukino ibanza nk’uko byagendekeye Real Madrid na FC Barcelone mu mikino y’ i Burayi.

Yagize ati “Tuzakina nk’aho ari 0-0…, Ibyabaye kuri ariya makipe akomeye twakuyemo amasomo akomeye, intego ni ugutsinda. Nta bwo tugiye kugarira izamu, ahubwo intego ni ukongera gutsindira na hariya, nidutahukana insinzi, tuzishimane n’abafana”.

Ivan Jacky Minnaert, umutoza mukuru wa Rayon Sports yongeye gushimangira ko bajyanywe no gutsinda uriya mukino.

Itangishaka Kingi Bernard, umuyobozi w’ibikorwa bya Rayon Sports yavuze ko bateguye abakinnyi mu mutwe babereka agaciro k’uyu mukino.

Aha yagize ati: “Abakinnyi twarabaganirije turababwira tuti murebe namwe mugiye mu matsinda inyungu zirimo ni nyinshi kurusha mutagiyeyo, si ukubategera gusa ariko barabizi ko byonyine uyu mukino uzatuma binjira mu mateka. Bishobora no gutuma babona ababagura”.

Muvunyi Paul, Perezida wa Rayon Sports we agaragaza ko nibasezerera Costa de Sol bazaba banditse amateka yo kugera mu matsinda y’iyi mikino ibintu bitarabaho mu mateka y’umupira w’amaguru w’u Rwanda.

Muvunyi yanatangaje ko mu mafaranga miliyoni 230 y’u Rwanda bazahabwa yo kugera mu matsinda bazakuramo miliyoni 64 bazigabanye abakinnyi n’abatoza ku buryo buri wese azabona miliyoni 2,5

Abakinnyi 19 ba Rayon Sports berekeje muri Mozambique:

Abanyezamu: Ndayishimiye Eric Bakame na Ndayisenga Kassim.

Ba Myugariro: Faustin Usengimana, Mutsinzi Ange, Mugabo Gabriel, Nyandwi Saddam, Eric Rutanga, Irambona Eric na Manzi Thierry.

Abo hagati: Kevin Muhire, Niyonzima Olivier Sefu, Yannick Mukunzi na Mugisha François.

Ba rutahizamu: Yassin Mugume, Shassir Nahimana, Djabel Manishimwe, Shaban Hussein Tchabalala. Ismaila Diarra na Christ Mbondi.

TANGA IGITEKEREZO

Leave a Reply

Your email address will not be published. Required fields are marked *