19°C , Partly sunny | Kigali-Rwanda

Rayon Sports yegukanye igikombe k’irushanwa ry’Intwari

Yanditswe na BUGINGO FIDELE

Ku ya 02-02-2018 saa 07:41:21

Ikipe ya Rayon Sports ni yo yegukanye igikombe k’irushanwa ryitiriwe Intwari z’u Rwanda “Heroes Cup tournament 2018”.

Abakinnyi ba Rayon Sports ubwo bari bamaze gushyikiriza igikombe cy’Intwari

Iri rushanwa ryateguwe  n’Urwego rw’Igihugu  rushinzwe Itwari z’igihugu, Imidali n’Impeta by’ Ishimwe rufatanyije n’ishyirahamwe ry’umupira w’amaguru mu Rwanda “FERWAFA” ryatangiye tariki 20 Mutarama 2018 ryitabirwa n’amakipe  yasoje mu myanya 4 ya mbere muri shampiyona y’ikiciro cya mbere umwaka ushize wa 2016-2017.

Ejo hashize tariki 01 Gashyantare 2018 ni bwo habaye imikino isoza aho ikipe ya Police FC yanganyije na AS Kigali 0-0 naho umukino wari utegerejwe na benshi, ikipe ya APR FC yigaranzuye Rayon Sports iyitsinda ibitego 2-1.

Muri uyu mukino, Rayon Sports ni yo yabonye igitego kare gitsinzwe na Hussein Shaban Tshabalala n’umutwe ku mupira yari ahawe na Kwizera Pierrot bombi bakaba bakomoka i Burundi. Mu gice cya kabiri, Hakizimana Muhadjiri yatsindiye igitego APR FC ku mupira uteretse nyuma  Birigimana Issa atsinda igitego cya kabiri ku mupira yari ahawe na Nshuti Dominique Xavio wavuye muri iyi kipe ya Rayon Sports.

Uko Rayon Sports yatwaye igikombe

Iri rushanwa ryitabiriwe n’amakipe 4 ari yo Rayon Sports, Police FC, AS Kigali na APR FC. Aya makipe yose yakinnye hagati yayo hanyuma amategeko akemeza ko ikipe ifite amanota menshi ari yo ihabwa igikombe.

Umunsi wa mbere w’iyi mikino tariki 20 Mutarama 2018, ikipe ya Police FC yatsinze APR FC igitego 1-0 naho Rayon Sports inganya na AS Kigali 0-0. Umunsi wa kabiri, APR FC yanganyije na AS Kigali ibitego 2-2 naho Rayon Sports itsinda Police FC ibitego 4-0.

Ubwo imikino yasozwaga, Rayon Sports yaje imbere n’amanota 4 n’ibitego 3 izigamye, APR FC iba iya kabiri n’amanota 4 nta gitego nta n’umwenda ifite. Ku mwanya wa 3 haje Police FC n’amanota 4 nayo ariko ikaba yari ifite umwenda w’ibitego 3 mu gihe AS Kigali yaje ku mwanya wa 3 n’amanota 3 nta gitego izigamye nta n’umwenda.

Ibi ni byo byatumye n’ubwo Rayon Sports yatsinzwe na APR FC  ihabwa igikombe na miliyoni 6   z’amafaraga y’u Rwanda, APR FC yahawe miliyoni 3, Police FC ihabwa miliyoni  2  naho  AS Kigali ihabwa miliyoni 1.

Ikipe ya APR FC ni yo yari ifite iki gikombe yegukanye umwaka ushize wa 2017 aho yagitwaye itsinze Rayon Sports igitego 1-0 cya Rugwiro Herve.

TANGA IGITEKEREZO

Leave a Reply

Be the First to Comment!

avatar