22°C , Partly cloudy | Kigali-Rwanda
Umuyobozi w'ibikorwa muri Rayon Sports, Itangishaka Bernard

Rayon Sports yahamagaje inama y’inteko rusange y’igitaraganya

Yanditswe na BIZIMANA ERIC

Ku ya 13-06-2018 saa 06:38:17

Nyuma y’ibibazo bimaze iminsi bivugwa muri Rayon Sports, ubuyobozi bw’iyi kipe bwafashe ikemezo cyo guhamagaza inama y’inteko rusange idasanzwe izaba ku Cyumweru tariki 17 Kamena 2018.

Umuyobozi w’ibikorwa muri Rayon Sports, Itangishaka Bernard

Muri iyi nteko rusange, abanyamuryango bazagaragarizwa na komite yatowe muri Kanama 2017 uko ikipe yabo ihagaze, ibyo bakoze birimo kugabanya amadeni no guca burundu ibirarane by’imishahara y’abakinnyi n’abatoza. Bazanasobanura umusaruro mubi wakurikiye ukugera mu matsinda y’imikino y’Afurika “Total  CAF Confederation Cup 2018” byanaviriyemo ihagarikwa ry’umutoza Ivan Minnaert n’abamwungirije  tariki 11 Kamena 2018.

Umuyobozi w’ibikorwa muri  Rayon Sports, Itangishaka Bernard yabwiye Imvaho Nshya ko ifitiye akamaro gakomeye umuryango wa Rayon Sports. Ati “Nzi ko turi gushaka uburyo twakwitegura iyi nama yo ku cyumweru. Ni inama ikenewe kandi yihutirwa bijyanye n’ubuzima ikipe imazemo iminsi”.

Bakame ashobora gukina umukino wa Rayon Sports na APR FC

Umuyobozi w’ibikorwa muri Rayon Sports yanasobanuye ko bari gusuzuma ubusabe bw’abakinnyi ba Rayon Sports n’ibaruwa ya  kapiteni wayo Ndayishimiye Eric Bakame yo gusaba imbabazi ku magambo yumvikanye ku mbuga nkoranyambanga mu kiganiro n’umwe mu bakunzi ba Rayon Sports avuga ko yagambaniye ikipe ye ashaka ko itsindwa.

Itangishaka avuga ko bagombaga kubisuzuma bitonze cyane ko n’abakinnyi baragaragaje ko bakeneye kapiteni wabo mu mukino wa shampiyona uzabahuza na APR FC   ku wa Gatanu tariki 15 Kamena 2018.

Haracyategerejwe uzatoza uyu mukino  

Mu bindi, ubuyobozi bwa Rayon Sports burimo gusuzuma niba Nkunzingoma Ramadhan na Hategekimana Corneille bashobora gutoza umukino wa APR FC cyane ko ari na bo bari gukoresha.  Aba bahawe ikipe nyuma yo kwirukanwa k’umutoza mukuru Ivan Minnaert ndetse no guhagarikwa by’igihe kitazwi ku batoza bungirije Lomami Marcel na Jeannot Witakenge.

Uwari umutoza mukuru akaba yari yageze muri Rayon Sports muri Gashyantare 2018 asimbuye Karekezi wari umaze kwegura. Mu bashobora kumusimbura haravugwa Mashami Vincent wakungirizwa na Gatera Alphonse.

 

 

TANGA IGITEKEREZO

Leave a Reply

Be the First to Comment!

avatar