20°C , Mostly cloudy | Kigali-Rwanda

Rayon Sports ntiyakiriye neza ibihano yahawe na CAF

Yanditswe na BIZIMANA ERIC

Ku ya 04-04-2018 saa 08:44:38

Ubuyobozi bw’ikipe ya Rayon Sports buratangaza ko butishimiye ibihano bafitiwe n’impuzamashyirahamwe y’umupira w’amaguru muri Afurika “CAF” bukaba bwiteguye kujurira ibyo byemezo.

Ku  wa mbere tariki 02 Mata 2018, ni bwo CAF yatangaje imyanzuro ya Komisiyo y’imyitwarire ya CAF igizwe n’umunyafurika y’Epfo, Raymond Hack, umunya Djibuti Yassin Osmake n’umunyaburukinafaso, Issa Sama yateranye tariki 25 Werurwe 2018, yiga ku kirego cyatanzwe ku cyaha cyo gushaka gutanga ruswa cyakorewe i Burundi mu mukino wahuje Rayon Sports na LLB, aho bamwe mu bayobozi ba Rayon Sports bagaragaye ku cyumba 501 cya Hoteli yari icumbitsemo abasifuzi b’uyu mukino.

Umuyobozi ushinzwe ibikorwa muri Rayon Sports utangaza ko bagiye kwicarana n’umunyamategeko wabo bakareba inzira banyuramo mu gihe baba bagiye kujurira

Nyuma yo kumva ubwiregure bw’impande zombi, CAF yafashe ikemezo cyo guhagarika mu gihe k’imyaka ibiri mu bikorwa by’umupira w’amaguru Visi Perezida wa Rayon Sports, Muhirwa Prosper, uwahoze ari umubitsi Rukundo Patrick, Mudaheranwa Shaffy na Nkusi Jean Paul. Yanahagaritse Umurundi Mpundu Eloge wo muri LLB mu gihe cy’umwaka umwe.

Iyi mpuzamashyirahamwe ishingiye ku kuba batari batumwe n’ikipe ndetse nta n’ikigaragaza imisifurire mibi muri uyu mukino; yahanishije Rayon Sports gutanga amande y’ibihumbi 15 by’amadolari, ni ukuvuga miliyoni 13 z’amafaranga y’u Rwanda.

Umuyobozi ushinzwe ibikorwa muri Rayon Sports, Itangishaka Bernard yavuze ko ibi bihano ku ruhande rumwe bibabaje mu gihe bitumvikana impamvu yo guhagarika aba bakunzi ba Rayon Sports no gucibwa aya mande anavuga ariko ko bitangana no gusezererwa mu irushanwa.

Itangishaka yavuze ko bagiye kwicarana na Me Zitoni Pierre Claver umunyamategeko wa Rayon Sports barebe inzira banyuramo mu gihe baba bagiye kujurira.

Muvunyi Paul, Perezida wa Rayon Sports na we yavuze ko atumva icyatumye bacibwa ariya mafaranga. Yagize ati “Ziriya miliyoni n’iziki? Bayaduciye kubera iki? Nta bwo Rayon Sports yabatumye kandi aho bari bari byari uburenganzira bwabo.

Aho bakomiseri cyangwa abasifuzi baje gusifura umukino runaka baba bari nta tegeko ribuza umuntu ukunda ikipe kuhagera ikibazo ni uko baba bagize icyo babafatana gishobora kubangamira umukino’’.

Nyuma yo kumenya umwanzuro yafatiwe, Rayon Sports yaraye ikoreye imyitozo ku Kicukiro mbere yo kwerekeza i Shyorongi mu kwitegura umukino w’Afurika w’amakipe yitwaye neza “Total CAF Confederation Cup”, uzayihuza na Costa de Sol yo muri Mozambique kuri uyu wa Gatanu kuri Sitade ya Kigali i Nyamirambo.

 

TANGA IGITEKEREZO

Leave a Reply

Be the First to Comment!

avatar