19°C , Mostly cloudy | Kigali-Rwanda

Rayon Sports na SKOL batashye  aho abakinnyi bazajya baruhukira banishimira igikombe

Yanditswe na BUGINGO FIDELE

Ku ya Jun 16, 2019 saa 9:25

Tariki 14 Kamena 2019, ubuyobozi   bw’uruganda rwenga ibinyobwa bisembuye n’ibidasembuye mu Rwanda “SKOL Brewery Limited Rwanda” bwashyikirije ikipe ya Rayon Sports inzu babubakiye  izajya iruhukiramo abakinnyi mu gihe k’imyitozo.

Iyi nzu yubatse mu Nzove aho uru ruganda rukorera ari naho hari ikibuga ikipe ya Rayon Sports ikoreramo imyitozo ikaba ishobora kwakira abakinnyi 40.

Aho abakinnyi ba Rayon Sports bazajya baruhukira mu gihe k’imyitozo (Foto: Ntare J.)

Umuhango wo gutaha iyi nzu wahuriranye no kwishimira igikombe cya shampiyona ya 2018-2019 iyi kipe ya Rayon Sports yegukanye aho abayobozi b’iyi kipe bagishyikirije SKOL nk’umuterankunga mukuru.

Umuyobozi wa SKOL mu Rwanda, Ivan Wulffaert yatangaje  bishimiye ibyo iyi kipe ya Rayon Sports yagezeho. Yakomeje avuga ko  bubatse inzu abakinnyi bazajya baruhukiramo basoje imyitozo mu rwego rwo gutuma iyi kipe ikora  myitozo mu  buryo bwiza.

Umuyobozi wa SKOL mu Rwanda, Ivan Wulffaert ashyikiriza urufunguzo Perezida wa Rayon Sports, Muvunyi Paul (Foto: Ntare J.)

Perezida wa Rayon Sports, Muvunyi Paul yishimiye igi kikorwa avuga ko ubundi abakinnyi bajyaga bakora imyitozo mu gitondo ariko nimugoroba umuntu ntamenye aho bari ariko ubu bajya bakora kabiri ku munsi kandi babone aho baruhukira.

Yagize ati: “Mu gihe abakinnyi bazaba bakoze mu gitondo, saa sita bazajya bafatira amafunguro hano baruhuke ku mugoroba bongere bakore imyitozo.

Muvunyi avuga ko bizaba ari byiza kuko bizatuma abakinnyi bakora cyane birenze ibyari bisanzwe bityo bage  bagaragaza imbaraga mu kibuga.

Perezida wa Rayon Sports, Muvunyi akomeza ashimira SKOL kuko byari mu masezerano ko umwaka wa 2019 iyi nyubako izaba yarangiye.

Perezida wa Rayon Sports, Muvunyi Paul ashikiriza igikombe cya shampiyona ya 2018-2019, umuyobozi wa SKOL mu Rwanda, Ivan Wulffaert mu rwego rwo kubashimira ko babafashije (Foto: Ntare J.)

Akomeza avuga ko ibi rero biri mu bizafasha kwitegura amarushanwa iyi kipe igiye kwitabira  harimo irushanwa ry’igikombe cy’Amahoro 2019 aho rigeze muri 1/8, CECAFA Kagame Cup 2019 izaba muri Nyakanga ndetse n’imikino y’Afurika y’amakipe yabaye aya mbere iwayo “Total CAF Champions League 2019-2020” izatangira muri Kanama 2019.

Hanahebwe umukinnyi witwaye neza mu kwezi kwa Gicurasi 2019

Buri kwezi, SKOL ifatanyije n’itsinda ry’abafana “March’ Generation” bahemba umukinnyi witwaye neza. Uwahembwe nk’umukinnyi witwaye neza muri Gicurasi 2019 yabaye rutahizamu Ulimwengu Jules ahigitse Manzi Thierry na Sarpong Michael.

Ulimwengu wageze muri Rayon Sports agakina imikino yo kwishyura ari mu bafashije  iyi kipe kwegukana igikombe cya 2018-2019 aho yanasoje ayoboye abatsinze ibitego byinshi (20).

Uyu rutahizamu  n’ubwo mu mikino 6 isoza shampiyona yafashije ikipe ya Rayon Sports kwitwara neza, umukino wamuhesheje amanota ni uwo Rayon Sports yatsinzemo Police FC igitego 1-0 ari na we wagitsinze. Umukino wabaye tariki 05 Gicurasi 2019.

Nyuma yo guhabwa iki gihembo, Ulimwengu Jules yashimiye abayobozi ba Rayon Sports, abakinnyi bagenzi be ndetse n’abakunzi b’iyi kipe.

Rutahizamu Ulimwengu Jules ashyikirizwa igihembo cy’umukinnyi witwaye neza muri Gicurasi 2019 (Foto: Mihigo S.)