28°C , Sunny | Kigali-Rwanda

Rayon Sports na  Mukura zizakina umukino wa nyuma w’irushanwa ryitiriwe ikigega “Agaciro”

Yanditswe na BUGINGO FIDELE

Ku ya 13-09-2019 saa 19:05:32
Ikipe ya Rayon Sports igiye kongera guhura na Mukura ku mukino wa nyumwa w'irushanwa ryitiriwe Agaciro

APR FC 2-2 Mukura (2-3)
Rayon Sports 0-0 Police FC (4-3)

Tariki 15-09-2019

APR FC-Police FC (Amahoro-13h00)

Rayon Sports-Mukura (Amahoro-15h00)

Ikipe ya Rayon Sports  na Mukura ni zo zabonye itike yo gukina umukino wa nyuma w’irushanwa  ryitiriwe ikigega Agaciro “Agaciro Development Fund football championship 2019” ritegurwa n’ishyirahamwe ry’umupira w’amaguru mu Rwanda «FERWAFA» ku bufatanye  n’ikigega «Agaciro Development Fund».

Iyi mikino yatangiye tariki 13 Nzeri 2019 haba imikino ya ½, ikipe ya Mukura na APR FC  zanganyije ibitego 2-2 byatsinzwe na  Nwosu Samuel na Ntwali Evode ku ruhande rwa  Mukura  mu gihe APR FC yatsindiwe na Usengimana Danny na Byiringiro Rague.

Nyuma yo kunganya ibitego 2-2,  hitabajwe penariti maze ikipe ya Mukura yinjiza 3 kuri 2 za APR FC, bituma ikipe ya Mukura ikomeza ku mukino wa nyuma yaherukagaho muri 2012 ubwo iri rushanwa ryakinwaga bwa mbere.

Undi mukino wa ½  wagombaga guhuza ikipe ya Police FC na Rayon Sports. Izi kipe nazo zakinnye umukino mwiza  gusa  hagwa  imvura nyinshi. Ikipe ya Police FC  yagaragaje umukino mwiza  ndetse inahusha uburyo bwinshi bwashoboraga kuba bwavuyemo ibitego n’ubwo na Rayon Sports nk’ikipe ikomeye  yanyuzagamo nayo igahusha uburyo bwabaga bwabazwemo ibitego.

Izi kipe nyuma yo kunganya 0-0, hitabajwe penariti maze ikipe ya Rayon Sports yinjiza 4 kuri 3 za Police FC.

Ikipe ya Rayon Sports na Mukura  zakomeje zizakina umukino wa nyuma uteganyijwe tariki 15 Nzeri 2015, saa kenda (15h00).Izi kipe zongeye guhurira ku mukino wa nyuma   aho zaherukaga guhura muri 2012 ubwo iri rushanwa ryakinwaga bwa mbere aho Rayon Sports yatsinze Mukura igitego 1-0 cya Kambale Salita Gentil.

Mbere y’umukino wa nyuma  hazaba uwo guhatanira umwanya wa 3  uzahuza ikipe ya Police FC na APR FC. Uyu mukino uzaba saa saba (13h00). Iyi mikino yombi izabera kuri Sitade  Amahoro i Remera.

Ikipe izegukana igikombe izahabwa miriyoni 3, iya kabiri ihabwe 1.5 naho iya gatatu ihabwe ibihumbi 500. Umukinnyi uzitwara neza mu irushanwa  azahabwa ibihumbi 150 naho uzatsinda ibitego byinshi ahabwe ibihumbi 100.

Iri rushanwa ni ku nshuro  ya 5, mu nshuro 4 ziheruka, Rayon Sports ni yo yegukanye iki gikombe inshuro 3 (2012, 2017 na 2018) mu gihe Police FC yegukanye  iri irushanwa muri 2015.

Mu nshuro  iri rushanwa rimaze gukinwa  rimaze kwinjiza mu kigega Agaciro asaga miriyoni 130 z’amafaranga y’u Rwanda.

Ikipe ya Rayon Sports igiye kongera guhura na Mukura ku mukino wa nyumwa w’irushanwa ryitiriwe Agaciro

Abakinnyi ba Mukura mu byishimo nyuma yo gusezerera ikipe ya APR FC muri 1/2

APR FC yasezerewe na Mukura izahatanira umwanya wa 3

Police FC yasezerewe na Rayon Sports izakina na APR FC mu guhatanira umwanya wa 3

TANGA IGITEKEREZO

Leave a Reply

Your email address will not be published. Required fields are marked *