18°C , Mostly cloudy | Kigali-Rwanda
Ubwo Rayon Sports yari imaze gutsinda APR FC mu mukino wa nyuma w'irushanwa ry'agaciro umwaka ushize wa 2017

Rayon Sports na APR FC zongeye guhurira ku mukino wa nyuma w’irushanwa ry’Agaciro

Yanditswe na BUGINGO FIDELE

Ku ya 30-09-2018 saa 08:28:27

Umwanya wa 3

AS Kigali-Etincelles FC (Amahoro-13h00)

Umukino wa nyuma

Rayon Sports-APR FC (Amahoro-15h30)

Uyu munsi tariki 30 Nzeri 2018 ni bwo hasozwa irushanwa ryitiriwe ikigega Agaciro “Agaciro Development Fund football championship 2018”. Iri rushanwa ngarukamwaka rikaba ryarahuje amakipe 4 yabaye aya mbere mu mwaka w’imikino uheruka wa 2017-2018 ari yo APR FC, AS Kigali, Rayon Sports na Etincelles FC.

Ubwo Rayon Sports yari imaze gutsinda APR FC mu mukino wa nyuma w’irushanwa ry’agaciro umwaka ushize wa 2017

Nyuma  y’imikino y’amajonjora, ikipe ya Rayon Sports n’APR FC ni zo ziza gukina umukino wa nyuma (15h30) mu gihe AS Kigali iza guhura na Etincelles FC zihatanira umwanya wa 3 (13h30).

Imikino y’amajonjora, APR FC yatsinze Etincelles FC ibitego 3-0 byatsinzwe na Byiringiro Lague watsinze ibitego 2 ku munota wa 11 n’uwa 53 ndetse na Nsengiyumva Mustafa watsinze igitego cya 3 ku munota wa 90.

Ikipe ya Rayon Sports yatsinze AS Kigali ibitego 3-1. AS kigali ni yo yafunguye amazamu ku munota wa 15 kuri penaliti yatewe neza na Ndarusanze Jean Claude nyuma y’uko umunyezzamu wa Rayon Sports, Bashunga amukoreyeho ikosa. Ku munota wa 41, Bimenyimana Bon Fils Caleb yishyuye iki gitego amakipe asoza igice cya mbere anganya igitego 1-1.

Mu gice cya kabiri, Bimenyimana Bon Fils Caleb yatsindiye Rayon Sports igitego cya kabiri ku munota wa 78 naho  mu minota y’inyongera, Nova Bayama atsindira Rayon Sports igitego cya 3.

Rayon Sports ni yo yegukanye igikombe giheruka

Rayon Sports igiye kongera guhura n’ APR FC nyuma y’uko umwaka ushize izi kipe zombi ari zo zari zakinnye umukino wa nyuma aho Rayon Sports yegukanye igikombe nyuma yo gutsinda APR FC  igitego 1-0.

Uyu mukino wa nyuma uteganyijwe uyu munsi ndetse n’uwo guhatanira umwanya wa 3 yombi irabera kuri Sitade Amahoro i Remera. Kwinjira ni ibihumbi 20 mu myanya y’icyubahiro, ibihumbi 10 iruhande rwaho, ibihumbi 5 ahatwikiriye n’ibihumbi 2 ahasigaye hose.

Ikipe iza kwegukana igikombe irahabwa miliyoni 2, iya kabiri ihabwe miliyoni imwe naho iya 3 ihabwe ibihumbi 500. Umukinnyi usoza afite ibitego byinshi azahembwa na RwandAir gutemberezwa  hamwe mu bice ikoreramo ingendo.

Iri rushanwa rikinwa buri mwaka rikaba ritegurwa n’ishyirahamwe ry’umupira w’amaguru mu Rwanda “FERWAFA”  ifatanyije n’Ikigega Agaciro Development Fund  rifite intego yo gukusanga inkunga yo gushyira muri iki kigega aho kugeza ubu hamaze gushyirwamo agera kuri miliyoni 88 avuye muri iki gikorwa.

 

TANGA IGITEKEREZO

Leave a Reply

Your email address will not be published. Required fields are marked *