20°C , Partly cloudy | Kigali-Rwanda
Jonathan Raphael Da Silva watsinze igitego ke cya mbere muri Rayon Sports

Rayon Sports iyoboye urutonde, Amagaju FC yasubiye mu kiciro cya kabiri

Yanditswe na BUGINGO FIDELE

Ku ya 12-05-2019 saa 19:21:33

Gicumbi FC 1-3 APR FC

AS Kigali 2-1 AS Muhanga

Kirehe FC 2-1 Mukura

Kiyovu 3-0 Espoir FC

Musanze FC 2-1 Sunrise FC

Bugesera FC  1-3 Police FC

Amagaju FC 1-2 Rayon Sports

Mu gihe shampiyona y’ikiciro cya mbere mu mupira w’amaguru irimo kugenda igana ku musozo, ikipe ya Rayon Sports ikomeje kwitwara neza   aho inayoboye urutonde rwa shampiyona ikaba  inafite amahirwe yo kwegukana igikombe  cy’uyu mwaka w’imikino wa 2018-2019.

Iyi kipe ya Rayon Sports yongeye kwisubiza umwanya wa mbere ku rutonde rwa shampiyona nyuma yo gutsinda ikipe y’Amagaju FC  ibitego 2-1  mu mukino w’umunsi wa 27.  Muri uyu mukino wabereye i Nyamagabe  tariki 11 Gicurasi 2017, Rayon Sports yabonye igitego ku munota wa 14  gitsinzwe na Jonathan Raphael Da Silva, rutahizamu  ukomoka muri  Brazil wari utsinze igitego ke cya mbere muri iyi kipe.

Jonathan Raphael Da Silva watsinze igitego ke cya mbere muri Rayon Sports

Amagaju FC yaje kwishyura iki gitego gitsinzwe na Ndubuisi Emmanuel nyuma ku munota  86 Mudeyi Suleiman atsinda igitego cya kabiri cya Rayon Sports cyayihesheje amanota 3.

Nyuma yo gutsinda uyu mukino, Rayon Sports iyoboye urutonde rwa shampiyona n’amanota 63 mu gihe ikipe y’Amagaju FC yagumye ku mwanya wa nyuma n’amanota 17 bidasubirwaho ikaba  yahise imanuka mu kiciro cya kabiri nyuma y’imyaka isaga 10 yari imaze mu  kiciro cya mbere.

Ikipe ya APR FC ihanganiye igikombe cya shampiyona na Rayon Sports yo yari yatsinze Gicumbi FC ibitego 3-1, umukino wabereye i Gicumbi tariki 09 Gicurasi 2019.

Izi kipe ubu zisigaje imikino 3 aho Rayon Sports igomba gukina na Musanze FC, Kirehe FC na Marines FC mu gihe APR FC isigaje AS Muhanga, Espoir FC na Police FC.

Indi mikino yabaye

Mu yindi mikino y’umunsi wa 27  yabaye, ikipe ya AS Kigali yatsinze AS Muhanga ibitego 2-1, Kirehe FC itsinda Mukura ibitego 2-1, Kiyovu itsinda Espoir FC ibitego 3-0, Musanze FC itsinda Sunrise FC ibitego 2-1  naho Police FC itsinda Bugesera FC ibitego 3-1.

Iyi mikino y’umunsi wa 27 izasozwa tariki 14 Gicurasi 2019 aho ikipe ya Marines FC igomba kwakira Etincelles FC  kuri Sitade ya Rubavu.

Kugeza ubu Rayon Sports irayoboye n’amanota 63 ikaba ikurikiwe na APR FC ifite amanota 62, ku mwanya wa 3 hari ikipe ya Mukura n’amanota 52 naho  ku mwanya wa nyuma hari Amagaju FC ifite amanota 17.

Ulimwengu Jules ukinira Rayon Sports ni we uyoboye  abamaze gutsinda ibitego byinshi ( 17) akurikiwe na Hakizimana Muhadjiri  ukinira APR FC ufite ibitego 14 naho ku mwanya wa 3 hakaza Michael Sarpong ukinira Rayon Sports akaba amaze gutsinda ibitego 13.

TANGA IGITEKEREZO

Leave a Reply

Your email address will not be published. Required fields are marked *