18°C , Showers | Kigali-Rwanda
Rayon Sports iyoboye urutonde irakira Musanze FC

Rayon Sports irakira Musanze FC mu mukino  w’umunsi wa 28

Yanditswe na BUGINGO FIDELE

Ku ya 17-05-2019 saa 07:25:36

Tariki  17-05- 2019
Rayon Sports-Musanze FC (Nyamirambo-15h30)

Tariki  18-05-2019
AS Muhanga-APR FC (Muhanga-15h30)
Mukura-Marines FC (Huye-15h30)
Espoir FC-AS Kigali (Rusizi-15h30)
Sunrise FC-Kirehe FC (Nyagatare-15h30)

Tariki 19-05-2019
Amagaju FC-Bugesera FC (Nyagisenyi-15h30)
Etincelles FC-Gicumbi FC (Rubavu, 15h30)
Police FC-Kiyovu (Kicukiro-15h30)

Shampiyona y’ikiciro  cya mbere  irimo kugana ku musozo, mu mpera z’iki cyumweru  tariki 17 kugeza 19 Gicurasi 2019 haraba hakinwa imikino y’umunsi wa 28.

Kuri uyu wa Gatanu tariki 17 Gicurasi 2019 harakinwa umukino umwe aho ikipe ya Rayon Sports iyoboye urutonde rwa shampiyona yakira ikipe ya Musanze FC iri ku mwanya wa 12.

Uyu mukino  urabera kuri Sitade ya Kigali i Nyamirambo saa kenda n’igice (15h30). Ikipe ya Rayon Sports  irasabwa gutsinda uyu mukino kugira ngo ikomeze kuyobora urutonde ndetse iniyongerere amahirwe yo kwegukana igikombe.

Rayon Sports iyoboye urutonde irakira Musanze FC

Umutoza w’iyi kipe, Roberto Oliveira Gonçalves do Carmo “Robertinho” avuga ko batangiye shampiyona batakaza imikino myinshi ariko ubu aho ikipe iri nta rindi kosa bagomba gukora kugeza begukanye shampiyona kuko  amahirwe bayafite mu biganza.

Ku ruhande rwa Musanze FC havuzwe ko iyi kipe imaze iminsi yitegura cyane ngo  yitware neza muri uyu mukino. Umutoza Ruremesha Emmanuel wigeze no gutoza Rayon Sports  avuga  biteguye  cyane uyu mukino  kuko urebye nabo ikipe yabo ititwaye neza uyu mwaka w’imikino.

Mu mateka ya vuba aha kuva muri 2013, Rayon Sports  na Musanze zimaze gukina imikino 11 muri shampiyona. Muri iyi mikino Rayon Sports yatsinze Musanze FC imikino 8 zinganya imikino 2 mu gihe Musanze  FC yabashije gutsinda umukino umwe.  Uyu ukaba wari umukino wo kwishyura  muri shampiyona ya 2015-2016  wabaye tariki 17 Nyakanga 2016 aho  Musanze FC iwayo yatsinze Rayon Sports ibitego 2-0.

Umukino ubanza wa shampiyona ya 2018-2019, Rayon Sports yatsindiye Musanze FC iwayo ibitego 2-1.

Muri uyu mwaka w’imikino wa 2018-2019, ikipe ya Musanze FC nta bwo yitwaye neza  ahatari ku kibuga cyayo kuko mu mikino 27 imaze gukina, 14 yayikiniye hanze ariko nta mukino n’umwe yabashije gutsinda  kuko yatsinzwe imikino 10 inganya 4.

Kwinjira kuri uyu mukino ni ibihumbi 20 mu cyubahiro, ibihumbi 10 iruhande rwaho, ibihumbi 5 ahasakaye ndetse n’ibihumbi 2 ahasigaye hose.

Muri uyu mukino , Rayon Sports iraba yagaruye Michael Sarpong na Rutanga Eric batakinnye  umukino uheruka w’umunsi wa 27 mu gihe Niyonzima Olivier Sefu ataza kugarara kubera imvune yagize mu mukino uheruka  naho ku ruhande rwa Musanze FC irakina idafite kapiteni wayo, Nduwayo Valeur  wahagaritswe nyuma yo kuzuza  amakarita atatu y’umuhondo.

INDI MIKINO ITEGANYIJWE

 Tariki  18 Gicurasi 2019, AS Muhanga izakira APR FC,  Mukura yakire Marines FC, Espoir FC yakire AS Kigali  naho Sunrise FC ikine na Kirehe FC.  Tariki 19 Gicurasi 2019, Amagaju FC azakira Bugesera FC,  Etincelles FC yakire Gicumbi FC  naho Police FC yakire Kiyovu.

Mbere y’iyi mikino y’umunsi wa 28, Rayon Sports irayoboye n’amanota 63 ikurikiwe na APR FC n’amanota 62 naho ku mwanya wa 3 hari Mukura n’amanota  52. Ku mwanya wa nyuma wa 16 hari ikipe y’Amagaju FC n’amanota 17.

 

TANGA IGITEKEREZO

Leave a Reply

Your email address will not be published. Required fields are marked *