20°C , Mostly cloudy | Kigali-Rwanda
20

Rayon Sports iracyabura rutahizamu nka Diarra-Roberto

Yanditswe na BIZIMANA ERIC

Ku ya 02-10-2018 saa 06:13:00

Umutoza mukuru w’ikipe ya  Rayon Sports, Roberto Oliveira Goncalves do Carmo aravuga ko ikipe ye ikomeje kwiyubaka nubwo igifite ikibazo mu busatirizi.

Umutoza wa Rayon Sports, Roberto Oliveira Goncalves do Carmo uvuga ko bafite ikibazo cya ba rutahizamu

Ibi yabitangaje nyuma yo gutsinda APR FC igitego 1-0 cya Mugisha Francois ku mukino wa nyuma y’irushanwa ryitiriwe ikigega Agaciro

Uyu mutoza avuga ko mu mezi atatu amaze muri Rayon Sports yamaze kubaka ikizere mu bakinnyi nyamara yaratakaje abakinnyi  bakomeye iyi kipe yagenderagaho.

Ati “Nyuma y’ibyatubayeho dukina na USM Alger, Gor Mahia, Yanga na  Enyimba mu mikino  y’Afurika mu nama nkorana n’abakinnyi mbereka ko Rayon Sports yiteguye gukina n’ikipe iyo ari yo yose. Maze amezi atatu hano, ariko abakinnyi bose bakomeye baragiye, Pierrot, Tchabalala, Diarra,  Faustin n’abandi benshi. Ntabwo byari byoroshye. Narakoze ndwana n’igitutu ntanga imyitozo yihariye. Kandi mwibuke ko Rayon Sports niyo kipe yonyine itaragize ikiruhuko”.

Roberto  agaragaza ko ikibazo gikomeye kikiri mu busatirizi aho babura rutahizamu umeze nka Ismaila Diarra, umunya Mali uheruka kwerekeza muri Algeria  byanatumye atangira gutoza Bimenyimana Bonfils Caleb gukina kuri uyu mwanya.

Ati “Biragoye kubona umukinnyi nka Diarra. Ni we wadutsindiraga. Mbere y’uko nza Diarra ntiyakinaga yari umusimbura, abantu batamwemera. Mpageze yatsinze ibitego 9 mu mikino 3. Iyo aba agihari akazi kari kuba koroshye kuko ubu tubura wa mu rutahizamu numero 9. Ndi kurwana no kuhashyira Caleb ariko we amenyereye guca ku ruhande kandi amaze gutsinda ibitego bitanu, icyo ni ikintu kiza ariko dukeneye ba rutahizamu bazadufasha kuko umwaka w’imikino atari amezi abiri”.

Ku rundi ruhande uyu mutoza agaragaza ko agiye kwicarana n’ubuyobozi bwa Rayon Sports kugira ngo bumuhe amasezerano  y’igihe kirekire. Ati “Hari amakipe abiri yanyifuje byemewe ariko amasezerano azarangira tariki 03 Ukuboza, kuko nasinye amasezerano y’amezi atandatu, nanabwiye Perezida ko ntazagenda, naniyemeje kutavugana n’andi makipe kuko nubaha Rayon Sports. Ngomba kwicarana ariko na komite kugira ngo dukemure iki kibazo. Gusa umwanya wa mbere ni uwa Rayon Sports”.

TANGA IGITEKEREZO

Leave a Reply

Your email address will not be published. Required fields are marked *