21°C , Intermittent clouds | Kigali-Rwanda
Intebe y'Inteko y'Umuco n'Ururimi, prof Niyomugabo Cyprien

RALC: Imivugire y’Ikinyarwanda ntiyahindutse, hanogejwe imyandikire

Yanditswe na Rutayisire Emile

Ku ya 17-07-2019 saa 07:55:55

Amabwiriza No 001/2014 ya Minisitiri agenga imyandikire y’Ikinyarwanda yatangajwe mu Igazeti ya Leta No 41 bis yo ku wa 13 Ukwakira 2014. Aya mabwiriza yasohotse yaje yunganira ayari asanzwe kandi anayanoza kugira ngo arusheho korohera Abanyarwanda mu kuyakoresha.

Prof. Niyomugabo Cyprien akaba Intebe y’Inteko Nyarwanda y’Ururimi n’Umuco, RALC, yatangarije Imvaho Nshya ko kuva inteko Nyarwanda y’Ururimi n’Umuco yajyaho mu 2012 ndetse na mbere yaho, muri za kaminuza abashakashatsi batekerezaga ku buryo habaho guhuza imyandikire y’ikinyarwanda yagiye ikorwaho kuva mu 1928 kuzamuka kugeza mu nyandiko ziheruka cyane ko mu ntangiriro inyandiko nyinshi zagiye zikorwa n’abanyamahanga, izindi zigakorwa n’abantu bo muri kaminuza, bavangaga cyane iyigandimi n’imyandikire kandi ari ibintu bibiri bitandukanye ahubwo byuzuzanya.

Haje kubaho kubaza Abanyarwanda uburyo babona imyandikire y’Ikinyarwanda yahuzwa igafasha cyane cyane mu kwigisha Ikinyarwanda ariko nyuma herekanwa n’imivugire y’Ikinyarwanda.

Prof. Niyomugabo agira ati “Nyuma yo kubaza abarimu, abanyamakuru, abantu bakuze, ibitsina byombi abashinzwe amadini, abanyapolitiki n’abandi, tumaze kwegeranya ibyo bitekerezo binyuranye, twaricaye duhura n’abahanga kuko iby’imyandikire atari abantu bose babyishoramo bikorwa n’abahanga baba barabyize, berekana uburyo iyo myandikire yahuzwa haherewe ku yari iriho kuva kera.”

Akomeza avuga ko hitawe ku byo abantu bagiye bavuga ko bibatera ingorane nk’abarimu, abakoresha ururimi muri rusange harimo n’abanyamakuru maze abahanga babyigaho babishyikiriza Inteko Nyarwanda y’Ururimi n’Umuco, intiti zirabireba nazo zibiha umurongo. Byajyanywe mu zindi nzego bishyikirizwa urwego rw’Igihugu ku buryo hari amabwiriza yatangajwe mu igazeti ya Leta, imyandikire y’Ikinyarwanda imaze kwemezwa n’inzego zose zibifitiye ububasha.

Nk’umuntu ukurikirana iby’Ikinyarwanda umunsi ku munsi, Prof. Niyomugabo avuga ko abarimu mu mashyirahamwe bakoze y’Ikinyarwanda ndetse n’amahugurwa bahawe yo kugira ngo bahugure abandi bigaragara ko byabafashije gukemura ibibazo bari bafite mu myandikire y’Ikinyarwanda mu buryo bw’imyigishirize y’Ikinyarwanda n’imyandikire ndetse no mu bana. Ikibazo cyari gisigaye ni imfashanyigisho nk’ibitabo byanditse muri iriya myandikire gusa.

Icyo Intebe y’Inteko Nyarwanda y’Ururimi n’Umuco asaba ni uko uzagira icyo abona kitanoze azajya akijyana mu nteko y’ururimi n’umuco kuko imyandikire ihora itera imbere. Anavuga ko nta myandikire ishyirwaho ngo irahamye ahubwo ari ukuyumvikanaho kuko nta myandikire myiza wavuga ngo ibaho ahubwo ari imyandikire ifasha gukemura ibibazo byo guteza imbere ururimi hakemurwa ibibazo by’imyandikire.

Agasanga igihe nikigera Abanyarwanda bazongera bakicara bakareba ibyo bitanoze bakadanangira Ikinyarwanda kigakomera koko kuko n’izindi ndimi zivugwa ko zikomeye nk’Igifaransa, Icyongereza nazo bene zo bicara bakazigaho bagamije kunoza imyandikire yazo.

Intebe y’Inteko y’Umuco n’Ururimi, prof Niyomugabo Cyprien

Dr. James Vuningoma, Umunyamabanga Nshingwabikorwa w’Inteko Nyarwanda y’Ururimi n’Umuco (RALC), avuga ko ijanisha ry’ibyahindutse ritarenga 16% by’ibyari bisanzwe bimenyerewe kuko iyo witegereje neza usanga ikintu cyateye urujijo bigatuma abantu bagira ibitekerezo bitandukanye n’ibikubiye muri yo, ari uburyo bamwe bitiranyije imivugire n’imyandikire kandi ari ibintu bibiri bitandukanye. Ikindi ni uko hari n’abahise bihuta bakemeza abandi ko Ikinyarwanda cyahindutse, akagira ati “Nyamara Ikinyarwanda kiracyari Ikinyarwanda dusanzwe tuvuga, nta gikuba rero cyacitse.”

Akomeza avuga ko mu by’ukuri amabwiriza yasohotse yerekeye uburyo abantu bandika Ikinyarwanda kugira ngo amagambo avugwa kimwe age anandikwa kimwe kandi ko nta mabwiriza asaba abantu guhindura imivugire yigeze atangwa. Amagambo yanogerejwe imyandikire nta bwo agomba guhindurirwa uburyo avugwa.

Mungwarakarama Maurice ni umwarimu mu mashuri abanza, avuga ko amabwiriza y’imyandikire y’Ikinyarwanda agisohoka yabanje kumutera ikibazo ariko ko nyuma yaje kubona ko ari uko atari amenyereye gukoresha ayo magambo ahubwo ko asanga hari aho yagabanyije ibimenyetso kandi ibyahindutse byagiye bisobanurwa neza.

Yagize ati “Abatemera imyandikire mishya y’Ikinyarwanda ni abadakunda impinduka bagendera ku kumva uburyo ijambo rivugwa kandi imyandikire itandukanye n’uko ijambo rivugwa kandi ubisanga mu ndimi zose kuko babikoresha no mu gifaransa cyangwa Icyongereza.”

Dr. Vuningoma James Umunyamabanga Nshingwabikorwa w’Inteko Nyarwanda y’Ururimi n’Umuco, RALC

 

TANGA IGITEKEREZO

Leave a Reply

Your email address will not be published. Required fields are marked *