21°C , Mostly cloudy | Kigali-Rwanda
Dr Ndabamenye Telesphore, umuyobozi ushinzwe kongera umusaruro no kwihaza mu biribwa muri RAB ( Foto Rose M)

RAB yamaze impungenge abahinzi bafite ikibazo cy’amasoko

Yanditswe na MUKAGAHIZI ROSE

Ku ya 12-09-2018 saa 07:27:13

Dr. Ndabamenye Telesphore, Umuyobozi ushinzwe  kongera umusaruro no kwihaza mu biribwa mu Kigo k’Igihugu gishinzwe iterambere ry’Ubuhinzi n’Ubworozi, RAB, avuga ko Leta y’u Rwanda muri gahunda yo kwihaza mu biribwa yashyize imbaraga nyinshi mu gukangurira abahinzi guhinga imbuto nziza, kuyihingira igihe ndetse no gukoresha inyongeramusaruro ari na byo byatumye haboneka umusaruro mwinshi. Amara impungenge bamwe mu bahinzi bavuga ko bagize ikibazo cy’amasoko y’umusaruro wabo.

Dr Ndabamenye Telesphore, umuyobozi ushinzwe kongera umusaruro no kwihaza mu biribwa muri RAB ( Foto Rose M)

Bamwe mu bahinzi barimo Nyakarundi Telesphore, umuhinzi w’urutoki mu murenge wa Rukira Akarere ka Ngoma, bavuga ko umusaruro wabo w’ibitoki wabaye mwinshi, ugatuma ibiciro babona ku bitoki bijya hasi biva ku mafaranga y’u Rwanda 200 ku kiro bijya ku 100, bakifuza ko inzego zibishinzwe zagira icyo zikora nibura igiciro ku kiro k’igitoki ntikige munsi y’amafaranga y’u Rwanda 150.

Nyirangamije Dativa wo mu murenge wa Ndego, Akarere ka Kayonza na we ashimangira ko ibiciro bahabwa ku musaruro by’umwihariko ibitoki ari bito.

Yagize ati “Ikiro k’igitoki kikigurwa amafaranga 200 byari bishimishije, ariko ubu kiragurwa amafaranga 80 gusa mu gihe igitoki kinini ari amafaranga 4 000.”

Hari na bamwe mu bahinzi bo mu karere ka Ngoma bafite impungenge zuko guhinga ibigori ku buso bunini bishobora kubura isoko kuko bagifite umusaruro mu bubiko none bakaba bagiye guhinga ibindi.

Dr Ndabamenye avuga ko kuba harabonetse umusaruro mwinshi ari ibintu byo kwishimira ndetse ko hari ingamba zo kubona amasoko ahagije.

Yagize ati “Ahubwo ni amahire, kuba umusaruro uhari, umusaruro iyo uhari nta bwo dutegereza ko uboneka kugira ngo umuntu atangire kuganira ku ngamba z’uburyo wakoreshwa. Nk’ubu muri iki gihembwe dusoje ndetse n’icyakibanjirije cya 2018 A byagaragaye ko umusaruro w’ibigori wabaye mwinshi. Iyi ni yo gahunda yacu no muri gahunda dufite y’ubuhinzi mu rwego rw’ingamba muri Minisiteri turashaka gahunda yo guhingira isoko.”

Akomeza agira ati: “Ni ukuvuga ngo uko abaturage bahabwa imbuto dufite imbuto nyinshi muri iki gihembwe k’ihinga ku bijyanye n’imbuto y’ibigori kuko twiteguye ko abahinzi baziyongera bagakoresha imbuto nyinshi ni nako twiteguye ko umusaruro uzazamuka. Ubu hazabaho gahunda yo guhuza no kuganira n’abaguzi, gutekereza uburyo bwo gukusanya umusaruro ndetse no gutekereza uburyo bwo kuwuhunika.”

Dr. Ndabamenye akomeza avuga ko byari byarakozwe mu bihembwe bishize ariko ngo hazongerwamo imbaraga kugira ngo abahinzi umusaruro bazabona muri iki gihembwe k’ihinga 2019A, ni mu kwezi kwa 2 bazabe basarura mwinshi, abaguzi bazabe bazi aho baherereye, baramaze kuganira n’abahinzi.

Yagize ati “Muzi ko dufite gahunda yo guhuza ubutaka ndetse n’amakoperative. Hari ibiterane by’imirima tuba dufite binini cyane cyane nko mu Ntara y’Iburasirazuba usanga bafite imirima minini abo baturage bakaba baraganiriye mbere n’abaguzi ariko icyo tujyanisha ni iki kibazo kijyana n’umusaruro.”

Avuga ko hari abagura umusaruro bafite icyo basaba ugomba kuba wujuje kugira ngo umusaruro bawutware.

Dr. Ndabamenye ati “Muri uku kuganira n’abaguzi habaho no kwigisha abahinzi gahunda yo kugira ngo umusaruro uzagire ubuziranenge, iyo umusaruro udafite ubuziranenge abaguzi bagira ingorane zo kuwufata kugira ngo bawukoreshe mu nganda. Gahunda rero yo guhuza abahinzi n’abaguzi banini turayijyanisha n’itera n’ihinga, ubwo ni ukuvuga ngo iyo umusaruro utegerejwe mu gihe cy’amezi abiri ibyo biganiro byagombye kuba byarabayeho.”

Avuga ko bizafasha nk’ingamba kugira ngo umusaruro uzabe uzwi noneho n’abazawufata bazabe babizi cyane cyane nk’inganda nini.

Atanga urugero rw’uruganda runini ruri mu cyanya k’inganda rukenera kubona ibigori byiza byujuje ubuziranenge kugira ngo hakorwemo ibiryo by’abana.

Ku birebana n’igihingwa cy’urutoki bamwe mu baturage bo mu karere ka Ngoma bavuga ko ibitoki byababanye byinshi, bibaha umusaruro ariko bitabinjiriza, Dr Ndabamenye yabigarutseho, ati “Birazwi hose ko iyo umusaruro wabaye mwinshi igiciro ku isoko kiragabanuka, ni ho rero hazamo ingamba yo kubungabunga wa musaruro.”

Avuga ko uko umusaruro wabonetse hazabaho guhuza amasoko n’abafite umusaruro mwinshi, izo ngamba zigatangira kare mu buryo bwo kubiganira.

Yagize ati: “Umusaruro ubaye mwinshi ntugomba kwangirika ugomba kubikwa kugira ngo tuzashyikire ikindi gihembwe k’ihinga cyangwa nk’urutoki muzi ko rwera cyane mu kwezi kwa karindwi cyangwa ukwa munani byagera mu kwa kenda ukwa 10 umusaruro ugatangira kugabanuka, nko mu bitoki tugiramo amoko abiri ibitoki biribwa n’ibitoki bivamo urwagwa cyangwa se ibinyobwa bindi.

Ibi rero nko mu rwego rwo guhuza ubutaka no gukangurira abahinzi kugira amoko y’insina ni ukubisanisha n’ahari inganda zikora ibitoki ariko tutirengagije ko ibitoki byinshi bijya mu migi minini cyangwa amasantere manini y’ubucuruzi biba bisaba ko byiyongera kugira ngo igiciro cyo muri iryo soko kitaza kuzamuka.”

Agaragaza ko guhuza isoko ndetse no gutegura icyo yita ‘out let markets’ igihe umusaruro uzaba uboneka hakagaragazwa akarere uzaba ubonekamo ndetse uretse ibyo bazarushaho kugira ubufatanye na Minisiteri y’Ubucuruzi n’Inganda kugira ngo umusaruro witezwe uzage ugira aho ujya mu gihe wamaze kuba mwinshi.

 

 

TANGA IGITEKEREZO

Leave a Reply

Be the First to Comment!

avatar