26°C , Partly sunny | Kigali-Rwanda
Imbuto y'ibigori yihanganira nkongwa igiye gushyirwa ahagaragara na RAB mu gihe izi nkongwa zajyaga zangiriza abahinzi bigatuma umusaruro ugabanuka

RAB igiye gushyira ahagaragara imbuto y’ibigori yihanganira nkongwa

Yanditswe na TWAGIRA WILSON

Ku ya 09-01-2018 saa 07:46:17

Umuyobozi mukuru w’Ikigo k’igihugu gishinzwe Iterambere ry’ubuhinzi mu Rwanda (RAB) Dr. Marc Cyubahiro Bagabe, yatangaje ko mu rwego rwo guteza imbere ubushakashatsi, iki kigo kigiye gushyira ahagaragara imbuto y’ibigori yihanganira nkongwa.

Dr Cyubahiro Bagabe yabitangarije mu Nteko ishinga amategeko, mu kiganiro yahaye abasenateri bagize Komisiyo y’imibereho myiza y’abaturage, uburenganzira bwa muntu n’ibibazo by’abaturage ku byerekeranye n’ubushakashatsi no guhanga ibintu bishya.

Dr Marc Cyubahiro Bagabe, Umuyobozi mukuru w’Ikigo k’igihugu gishinzwe iterambere ry’ubuhinzi mu Rwanda (Foto Gisubizo G.)

Dr. Bagabe yavuze ko mu gihe k’imyaka 3 ikigo ayobora cya RAB kizaba cyashyize ahagaragara ubwoko 12 bw’imbuto y’ibigori ifite ubushobozi bwo kwihanganira nkongwa yibasira ibihingwa, ku buryo idashobora kuyiteza ikibazo mu murima.

Imbuto y’ibigori yihanganira nkongwa igiye gushyirwa ahagaragara na RAB mu gihe izi nkongwa zajyaga zangiriza abahinzi bigatuma umusaruro ugabanuka

Naho ku birebana na gahunda yo kurambiriza ku mbuto u Rwanda rwajyaga rutumiza mu bindi bihugu, Umuyobozi Mukuru wa RAB  yijeje intumwa za rubanda ko mu gihe cya vuba hari ikizere cy’uko u Rwanda ruzaba ruzitegurira mu gihugu nta handi zituruka, cyane ko ngo RAB imaze kugira abashakashatsi babizi  kandi bafite ubushobozi.

Agira ati    “Mu gihe cya vuba gahunda yo kurambiriza kuri gahunda yo kuvana hanze imbuto ishobora kurangira, nubwo RAB yagiye igira ibibazo byo kugira ibikorwaremezo byashaje nka laboratwari na sitasiyo  bitagikora, ubu zimwe muri zo nk’iya Rwerere yatangiye gusanwa’’.

Ku kibazo k’ibikorwaremezo nka laboratwari  za RAB ziherereye hirya no hino zitagikora, ni ngombwa kugira ngo icyo kibazo gisubire mu buryo,  nk’uko byagarutsweho na Perezida wa Komisiyo y’imibereho myiza mu nteko ishinga amategeko, Hon. Gallican Niyongana.

Hari hashize iminsi ibigori byibasirwa na nkongwa, bikagira ingaruka ku musaruro, ariko ubu abahinzi barizezwa ko hagiye kuzaboneka imbuto yihanganira izo nkongwa

Umuyobozi wa RAB avuga ko nubwo ibibazo byavutse  hari ikirimo gukorwa, atanga ingero za sitasiyo ya Rwerere yatangiye gusanwa nubwo  habaye ibibazo by’ubushobozi buke.

Ati “Mu by’ukuri, nk’uko abakuru b’Afurika bari babyiyemeje ko 1% ya GDP yajya igenerwa ishami ry’ubushakashatsi, uwo mwanzuro uramutse ushyizwe mu bikorwa hari impinduka ikomeye kandi ifatika yagaragara mu bushakashatsi.”

RAB ifite gahunda yo gushyira ahagaragara imbuto y’ibigori yihanganira nkongwa, mu gihe hashize igihe mu bihembwe bishize by’ihinga mu bigori hagaragaramo nkongwa idasanzwe, bigasaba inzego zinyuranye guhagurukira kuyirwanya.

 

TANGA IGITEKEREZO

Leave a Reply

Your email address will not be published. Required fields are marked *