18°C , Partly cloudy | Kigali-Rwanda

RAB: Abahinzi 76% bamaze kugerwaho n’ifumbire mvaruganda

Yanditswe na Mugisha Benigne

Ku ya 07-11-2019 saa 16:25:34
Abahinzi barerekwa uko batera imbuto mu buryo bwa kijyambere

Umuyobozi wa gahunda ya Nkunganire ku ifumbire n’imbuto mu Kigo k’Igihugu cy’Ubuhinzi (RAB), Gatari Egide,  atangaza ko ifumbire mvaruganda imaze kugera ku baturage 76% mu gihugu hose, kuko ari bo babashije kuyigura.

Nk’uko bisobanurwa na Gatari, ngo nyuma yo gutangiza igihembwe k’ihinga cy’umuhindo, abaturage begerejwe amafumbire, kuri ubu abamaze kugura izo bashyira mu mirima yabo bakaba bageze kuri 76%.

Ati “Ubusanzwe hari ba rwiyemezamirimo bafite ibigo byemerewe kwinjiza ifumbire ku Rwanda ndetse na RAB bashoboye kugeza izi nyongeramusaruro hafi y’abaturage, igihembwe k’ihinga cyatangiye amafumbire ahari, ari nako bagenda bayagura uko bagenda bahinga, kuri ubu abagera kuri 76% b’abahinzi bamaze kugura amafumbire bakeneye.

Avuga ko kugeza tariki ya 01 Ugushyingo 2019, ifumbire ya DAP imaze gutangwa ingana na Kg 23 033610, ifumbire ya Urea yatanzwe ingana na Kg 9 996 442, ifumbire ya NPK ingana na Kg 5 505 590, ifumbire ya KCI imaze gutangwa ni Kg 6 313 156 n’ifumbire ivanze ingana na Kg 1 318 422.

Gatari Egide kandi avuga ko muri iki gihembwe k’ihinga cya 2020 A muri gahunda ya Nkunganire muhinzi ifasha abahinzi batishoboye bari mu kiciro cya mbere n’icya kabiri, ndetse n’izahawe abaturage ku buntu, hatanzwe imbuto y’ibigori ingana na Kg 3 801 918, imbuto ya soya ingana na Kg 152 535 n’ingano zingana na Kg 208 440.

Abahinzi bahawe imbuto ni 969 396 bahinga mu mirima 1 687 120.

Abahinzi bo mu gishanga cya Makera, mu Murenge wa Cyeza, mu Karere ka Muhanga, bavuga ko bagezweho n’ifumbire mvaruganda kuko bamaze guhinga ibigori bakaba barabonye ifumbire bazashyiramo.

Mukamazera Dative ni umwe mu bahinga muri icyo gishanga, avuga ko ubu bamaze guhinga kandi imbuto barayibonye ndetse n’ifumbire ngo yabagezeho.

Ati « Rwose ifumbire twarayibonye ndetse n’imbuto, twarateye ubu imirima imeze neza kandi n’imvura turayifite ikirere nigikomeza kuba kiza tuzeza neza.»

Rwamugenga Valens ahinga mu gishanga cya Mombori, giherereye mu Murenge wa Nyarubaka, Akarere ka Kamonyi, avuga ko na we yahinze kuko yabonye imbuto ku gihe ndetse ngo n’ifumbire yamugezeho, ubu ngo nta kibazo kandi ngo yizeye ko umusaruro uzaba mwiza ikirere ni kigumya kumera neza.

Uyu muhinzi avuga ko mbere bajyaga bahura n’ikibazo cyo kubona inyongeramusaruro bitinze, bikagira ingaruka ku musaruro, ariko ngo muri iyi myaka ishize kugeza ubu byaravuguruwe, kuri ubu ngo bagezwaho inyongeramusaruro kare bagahinga kare.

Umwanditsi:

Mugisha Benigne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.