17°C , Partly cloudy | Kigali-Rwanda
R Kelly aha yari ajyanywe gufungwa mu minsi yashize

R.Kelly yitabye urukiko ngo yisobanure ku kwanga gutanga indezo

Yanditswe na Ndamyirokoye François

Ku ya 08-03-2019 saa 11:29:28

Robert Sylvester Kelly uzwi nka R.Kelly n’umwuganizi we mu mategeko bitabye urukiko rwo mu gace ka Cook muri Illinois (Chicago) muri Leta zunze Ubumwe z’Amerika kugira ngo uyu muhanzi yisobanure ku cyaha cyo kwanga gutanga ibirera umwana yabyaranye n’uwahoze ari umugore we.

Umuhanzi R.Kelly ufite imyaka 52, yari mu rukiko ubwo yasomerwaga ibirego bishya akurikiranyweho. Urubuga rwa Mail Online rwanditse ko R.Kelly yavuze ko adashobora gutanga amadorari 161,000 (Asaga amafaranga y’u Rwanda 142.485.000) asabwa na Andrea Kelly wahoze ari umugore we.

Ku ruhande rwa Andrea Kelly, yari ahagarariwe n’umwunganizi we mu mategeko. Mu gusomerwa ingingo zatumye Kelly ashyirwa muri gereza, umucamanza yavuze ko itariki ntarengwa yo gutanga iyi ndezo yari ku wa 5 Werurwe 2019 ndetse ko bigaragara ko uyu muhanzi yanze kwishyura nkana.

Kelly yasohotse mu rukiko aciye mu yindi miryango itandukanye n’aho yari yinjiriye gusa amaboko ye ntiyari abohesheje amapingu nk’uko byagenze ajya gufungwa mu minsi mike ishize.

Yavuze ku birimo kumubaho

R.Kelly kuva yashinjwa gusambanya abakobwa bato ku gahato, yavuze bwa mbere kuri ibi birego mu kiganiro yagiranye na Gayle King ukorera Televiziyo CBS.

Iki kiganiro cyagoye cyane R.Kelly kuko akenshi yavuganaga ikiniga ubundi kwihangana bikamunanira agaturika akarira.

Mu gace gato k’iki kiganiro Televiziyo CBS yasohoye, R.Kelly yabajijwe icyo yavuga ku bagore bakuze bamushinja ko bagifite munsi y’imyaka umunani yabasambanyije ku gahato.

R.Kelly yasubije agira ati “Nta bwo ari byo, ni ibinyoma. Niba ibi bihuha bishaje cyangwa ari bishya cyangwa hari ibindi bizavuka, nta bwo ari ukuri.”

Yanabajijwe niba koko nta mwangavu n’umwe yakoresheje ibikorwa by’urukozasoni mu gushimisha umubiri we, R. Kelly agira ati “Nta bwo ibyo nari mbikeneye. Ni gute nakora ibyo bintu? Ni gute R.Kelly yaba ari igicucu n’ibyo naciyemo byose. Ni gute naba ndi injiji ku buryo nakora ibyo bintu?”

Yahise abaza umunyamakuru niba camera irimo kumureba neza ngo abwire abantu, arakomeza ati “Ni ubucucu ibi bintu! Mukoreshe inyurabwenge. Iyibagize gato uko untekereza. Nyanga niba ubishaka, nkunda niba ubishaka, ariko koresha inyurabwenge. Ni gute ubu bucucu nabukora n’ahashize hanjye n’ibyo naciyemo byose…”

R Kelly aha yari ajyanywe gufungwa mu minsi yashize

Umuvugizi w’Urukiko, Sophia Ansari yavuze ko R.Kelly agiye kuba afunzwe by’agateganyo ndetse ngo arahita yoherezwa muri Gereza y’agace ka Cook muri Illinois.

Icyamamare R.Kelly azwi ku ndirimbo nyinshi zirimo iyitwa “sing of a victory”, “U saved me”, “Fellin single”, “I believe I can fly” kandi afite n’izindi ndirimbo azwiho.

TANGA IGITEKEREZO

Leave a Reply

Your email address will not be published. Required fields are marked *