25°C , Partly sunny | Kigali-Rwanda

PSR yasabye inzego zibishinzwe gushyiraho amategeko atuma umukozi atekana

Yanditswe na KAYITARE JEAN PAUL

Ku ya 03-05-2018 saa 06:56:36

Umunsi mpuzamahanga w’abakozi wizihizwa tariki 01 Gicurasi buri mwaka, Ishyaka ry’abakozi mu Rwanda, PSR, ryasabye Minisiteri y’abakozi ba Leta n’umurimo, Minisiteri y’Imari n’Igenamigambi n’ibigo by’abikorera gushyiraho umushahara fatizo usobanurwa nk’amafaranga umukozi adashobora kujya munsi ku munsi kugira ngo ashobore kubaho.

Rucibigango Jean Baptiste, Perezida w’Ishyaka ry’Abakozi mu Rwanda

Perezida w’Ishyaka ry’Abakozi mu Rwanda, Hon. Rucibigango Jean Baptiste, agaragaza ko umubare munini w’Abanyarwanda utunzwe no gukora akazi k’imyuga n’ubukorikori, agasaba inzego zibishinzwe kugena amategeko atuma abakozi bakorera ibigo bitanditse, bakora batekanye.

Yagize ati “Imibare igaragaza ko 93% by’abakozi mu Rwanda batunzwe n’imyuga itanditswe, ishyaka ry’abakozi mu Rwanda PSR, tugasaba inzego za Leta zifite mu nshingano zazo ibigo bitanditse (informal sectors) gushyiraho amategeko atuma abakozi bakora mu mirimo itanditse bakora batekanye kugira ngo badakomeza guhora bahura n’ingorane mu kazi kimwe n’abagiye mu kiruhuko k’izabukuru”.

Ubuyobozi bw’ishyaka rya PSR butangaza ko kuba umushahara ukiri hasi kuva mu mwaka wa 1974, itegeko rigena amafaranga ijana ku munsi ku mukozi, ko bifite ingaruka ku igenwa ry’imishahara mu bigo byigenga mu kugena indishyi mu bigo by’ubwishingizi no mu itangwa ry’ububwishingizi mu bagiye kujya mu kiruhuko k’izabukuru.

Avuga ku kibazo gikunze kugaragara mu bucukuzi bw’amabuye y’agaciro, agashingira no ku itegeko No 13/2014 ryo ku wa 20 Gicurasi 2014 rigena ubucukuzi bw’amabuye y’agaciro na kariyeri igika cyaryo cya mbere, ishyaka PSR risaba abakoresha bo muri sosiyete z’ubucukuzi bw’amabuye y’agaciro gukuraho imbogamizi no kuzirikana ubuzima bw’abakozi mbere ya byose.

Ku wa Kabiri tariki ya 1 Gicurasi ubwo mu Rwanda hizihizwaga umunsi mpuzamahanga w’abakozi, hirya no hino mu turere hagiye hahembwa abakozi bakoze neza, ibi bikaba bituma buri mukozi yumva ko yajya akora akazi nk’uwikorera.

Minisiteri y’Abakozi ba Leta n’Umurimo by’umwihariko yahembye akarere ka Rwamagana nk’akarere kagize uruhare mu guteza imbere ihangwa ry’imirimo no guteza imbere imishinga mito.

TANGA IGITEKEREZO

Leave a Reply

Be the First to Comment!

avatar