24°C , Partly sunny | Kigali-Rwanda

PSD nihagararirwa mu nteko yemeza kuzakemura ikibazo k’ibyiciro by’ubudehe

Yanditswe na UWAYISABA FRANCINE

Ku ya 22-08-2018 saa 09:42:07

Ishyaka PSD riharanira imibereho myiza y’abaturage ryijeje abaturage bo mu murenge wa Kicukiro ko igihe abakandida baryo bahatanira kurihagararira mu Nteko Ishinga Amategeko batowe, rizakemura ikibazo k’ibyiciro by’ubudehe benshi basaba ko bikwiye gukorwaho ubuvugizi bigakosorwa.

Aha PSD yari mu gikorwa cyo kwamamaza abakandida depite bayo mu Karere ka Kicukiro (Foto Uwayisaba F)

Rutayisire Georgette, umukandida depite wa PSD, yavuze ko ikibazo kiri mu byiciro by’ubudehe biteguye kubikemura.

Ati “Ingamba dufite ni ukunoza ukuntu ibyiciro byagiye bishyirwaho biherewe mu rwego rw’imidugudu. Inzego zose ni uguhaguruka zigafatanya n’abaturage buri muntu agashyirwa n’ubundi aho agomba kujya. Hari abaturage usanga bifuza kujya mu kiciro cya mbere batabigenewe bitewe n’ibihabwa abakirimo, hakaba  n’abatagishyirwamo babigenewe. Ibyo byose rero turashaka kubinoza”.

Mukamugema Triphonie, umwe mu baturage bo muri aka karere mu Murenge wa Kicukiro uri mu kiciro cya mbere cy’Ubudehe, avuga ko hari imbogamizi abo  muri icyo kiciro bahura na zo. Ati “Umuntu wo mu kiciro cya mbere  ntiyemererwa  kwaka inguzanyo  muri banki ngo abe yakwiteza imbere. Na none kandi umwana ufite umuryango wo muri icyo kiciro ntiyemerewe kwiga hanze y’igihugu ku nguzanyo”.

Rutayisire Georgette wa PSD, yavuze ko kuba uyu muntu adahabwa inguzanyo muri banki ari uko hari ibyo Leta imugenera, ndetse n’uriya mwana yitabwaho mu gihugu nta kibazo abantu bakwiye kureka iyi myumvire umwana akiga mu gihugu nta kibazo, ahubwo aharanire kukivamo.

Ati “Ariko kuko dufite gahunda yo gushyiraho banki y’ubuhinzi n’ubworozi, twe nta muntu uzaba uhejwe kwaka inguzanyo muri yo, ikiciro yaba arimo cyose azaba afite amahirwe yuzuye kuko izaba ari iy’Abanyarwanda bose”.

Yavuze ko kandi ikibazo cy’amakimbirane abera mu miryango bigasaba kujya mu nkiko, PSD izabikemura, ibi bibazo bikajya bikemurirwa mu ngo bitagombye kujya mu nzego zo hejuru, ahubwo ku bwumvikane bigakemuka.

Mu rwego rwo gukemura ikibazo cy’abana batwara inda batagejeje igihe, PSD ngo izegereza urubyiruko gahunda zo kuboneza urubyaro kandi mu buryo bubanogeye.

TANGA IGITEKEREZO

Leave a Reply

Be the First to Comment!

avatar