18°C , Partly cloudy | Kigali-Rwanda
Dr Biruta Vincent Perezida wa PSD ubwo yari amaze gutora agirana ikiganiro n'abanyamakuru (Foto Twagira W.)

PSD: Ibizava mu matora bifitiye buri munyarwanda akamaro- Dr Biruta

Yanditswe na Amani Claude

Ku ya 04-09-2018 saa 08:20:48

Perezida w’ishyaka PSD Dr Biruta Vincent, avuga ko ibyo ishyaka ahagarariye ryemereye Abanyarwanda, guhera no mu bihe byo kwiyamamaza kw’abakandida depite baryo, kugeza babonye umwanya mu Nteko Ishinga Amategeko umutwe w’Abadepite bizashyirwa mu bikorwa, kuko ihorana ikizere. Akaba avuga ko ibizava mu matora bifitiye buri munyarwanda akamaro.

Dr Biruta Vincent Perezida wa PSD ubwo yari amaze gutora agirana ikiganiro n’abanyamakuru (Foto Twagira W.)

Mu kiganiro n’itangazamakuru, ubwo yari amaze gutora abadepite ku munsi w’ejo hashize tariki ya 3 Nzeri 2018, Dr Biruta Vincent wari kuri site y’itora ya Nyirabwana mu murenge wa Kimironko ari naho yatoreye, asanga muri rusange igikorwa cy’amatora cyaragenze neza, asobanura ko afite ikizere cy’uko ibizava mu matora bizagirira Abanyarwanda akamaro hashingiwe ku mahitamo yabo.

Ati “Dufite ikizere cy’uko ibizava muri aya matora bifitiye buri munyarwanda akamaro, kandi nk’uko bisanzwe, twizeye ko ibyo ishyaka mpagarariye PSD yemereye Abanyarwanda izabishyira mu bikorwa.”

Umuhuzabikorwa wa site y’itora ya Nyirabwana, Byamungu Julienne Noel, yabwiye abanyamakuru ko muri rusange amatora yagenze neza kuko ngo abaturage batangiye gutora hakiri kare nka saa moya zitaragera, avuga ko abenshi batoye kugira ngo bakomereze mu mirimo yabo isanzwe, kugira ngo badacikanwa n’inshingano yabo nk’abaturage bashaka gutora intumwa za rubanda zizabatorera amategeko meza.

Umwe mu baturage wo mu mudugudu wa Buranga, wari waje gutora, yishimira ko ubu nk’abaturage bamaze kumenyera kwihitirano ikibafitiye akamaro, kuko ngo byose ibigerwaho biterwa n’ubufatanye bwiza.

Akomeza agira ati “Twishimiye kuza gutora intumwa zacu zigiye kujya mu nteko, ariko icyo tubifuzaho ni uko bajya bagaruka, bagasura abaturage mu rwego rwo kumenya ibibazo bafite, kuko ni cyo twabatoreye aho kujya kwicara mu biro, ntibiba bihagije.”

Site y’itora ya Nyirabwana iri ku kigo k’ishuri rya “Kigali Christian School”, hatoreye abagera ku 6 814, hari  ibyumba by’itora bigera kuri 12, kugeza saa sita hari hamaze gutora abasaga 80% by’abari kuri lisite y’itora.

 

TANGA IGITEKEREZO

Leave a Reply

Your email address will not be published. Required fields are marked *